ಪ್ರಾದೇಶಿಕ ವೈಶಿಷ್ಟ್ಯತೆ ಅರಿತು ಮೌಲ್ಯಯುತ ಉದ್ಯಮ ಸ್ಥಾಪಿಸಿ: ಡಿ. ಸಿದ್ಧರಾಜು ಸಲಹೆ

ಶಿವಮೊಗ್ಗ: ಯುವ ಸಮುದಾಯವು ಪದವಿ, ಸ್ನಾತಕೋತ್ತರ ಪದವಿಗಳನ್ನು ಅಭ್ಯಸಿಸುತ್ತಿರುವಾಗಲೇ ಪ್ರಾದೇಶಿಕ ವೈಶಿಷ್ಟ್ಯತೆಗಳನ್ನು ಅರಿತು ಮೌಲ್ಯಯುತವಾದ ನವ ಉದ್ಯಮಗಳನ್ನು ಸ್ಥಾಪಿಸಲು ಮುಂದಾಗಬೇಕು ಎಂದು ಚಿಕ್ಕಮಗಳೂರು ಜಿಲ್ಲಾ ಔದ್ಯೋಗಿಕ ಕೇಂದ್ರದ ಜಂಟಿ ನಿರ್ದೇಶಕ ಡಿ. ಸಿದ್ಧರಾಜು ಹೇಳಿದರು.

ಕುವೆಂಪು ವಿವಿಯ ಬಸವ ಸಭಾಭವನದಲ್ಲಿ ಶುಕ್ರವಾರ ವಿವಿಯ ವಾಣಿಜ್ಯ ವಿಜ್ಞಾನ, ನಿರ್ವಹಣಾ ವಿಜ್ಞಾನ ಮತ್ತು ಪ್ರವಾಸೋದ್ಯಮ ಅಧ್ಯಯನ ವಿಭಾಗಗಳು, ಚಿಕ್ಕಮಗಳೂರು ಜಿಲ್ಲಾ ಔದ್ಯೋಗಿಕ ಕೇಂದ್ರ ಮತ್ತು ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾದ ಸಹಯೋಗದಲ್ಲಿ ವಾಣಿಜ್ಯ ಕ್ಷೇತ್ರದಲ್ಲಿ ಉದ್ಯಮ ಸ್ಥಾಪಿಸಲು ಇರುವ ಅವಕಾಶಗಳು ಕುರಿತ ಒಂದು ದಿನದ ಕಾರ್ಯಾಗಾರ ಉದ್ಘಾಟಿಸಿ ಮಾತನಾಡಿದರು.

ಸ್ಥಳೀಯವಾಗಿ ದೊರೆಯುವ ಸಂಪನ್ಮೂಲಗಳನ್ನು ಬಳಸಿಕೊಂಡು ಉದ್ಯಮ ಆರಂಭಿಸಲು ಇರುವ ಅವಕಾಶಗಳನ್ನು ವಿದ್ಯಾರ್ಥಿ ದೆಸೆಯಲ್ಲೇ ಯುವಸಮೂಹವು ಅಧ್ಯಯನಿಸಬೇಕು. ವಿಶೇಷವಾಗಿ ಇದಕ್ಕಾಗಿ ಸ್ಥಳೀಯವಾಗಿ ದೊರೆಯುವ ಸಂಪನ್ಮೂಲಗಳನ್ನು ಬಳಸಿಕೊಳ್ಳುವ ಕುರಿತು ಸಂಶೋಧನೆ ಕೈಗೊಂಡಲ್ಲಿ ಖಂಡಿತ ಯಶಸ್ಸು ಕಾಣಬಹುದು ಎಂದರು.

ಉದ್ಯಮ ಸ್ಥಾಪನೆ ಕೇವಲ ಒಬ್ಬರ ಲಾಭಕ್ಕಾಗಿ ಅಲ್ಲ. ಉದ್ಯಮಗಳು ದೇಶದ ಆರ್ಥಿಕತೆಯ ನಡೆಸುತ್ತಿರುವ ಚಾಲಕ ಶಕ್ತಿಗಳು. ಸರ್ಕಾರವು ನವೋದ್ಯಮ, ಸ್ಟಾರ್ಟಪ್‌ಗಳನ್ನು ಸ್ಥಾಪಿಸಲು ಹತ್ತಾರು ಯೋಜನೆಗಳನ್ನು, ಪ್ರೋತ್ಸಾಹದಾಯಕ ಕ್ರಮಗಳನ್ನು ಪರಿಚಯಿಸಿದೆ. ಇವುಗಳನ್ನು ಸಮರ್ಥವಾಗಿ ಅರಿತು ಬಳಸಿಕೊಂಡಲ್ಲಿ ಹೊಸ ಉದ್ಯಮಗಳನ್ನು ಸ್ಥಾಪಿಸಿ ಜನರಿಗೆ ಉದ್ಯೋಗ ನೀಡಬಹುದು ಎಂದರು.

ವಾಣಿಜ್ಯ ವಿಭಾಗದ ಅಧ್ಯಕ್ಷ ಪ್ರೊ.ಎಸ್.ವೆಂಕಟೇಶ್ ಮತ್ತು ಅಧ್ಯಕ್ಷತೆ ವಹಿಸಿದ್ದ ನಿರ್ವಹಣಾ ವಿಭಾಗದ ಪ್ರೊ. ಎಚ್.ಎನ್.ರಮೇಶ್, ಸಹ ಪ್ರಾಧ್ಯಾಪಕ ಡಾ. ಕೆ.ಆರ್.ಮಂಜುನಾಥ್ ಮಾತನಾಡಿದರು. ವಿಭಾಗದ ಪ್ರೊ. ಆರ್.ಹಿರೇಮಣಿನಾಯ್ಕ್, ಲೀಡ್ ಬ್ಯಾಂಕ್‌ನ ಸುರೇಶ್, ಪ್ರವಾಸೋದ್ಯಮ ಇಲಾಖೆ ಅಧಿಕಾರಿ ನಾಗರಾಜ್, ರವೀಶ್ ಪ್ರಸಾದ್ ಉಪಸ್ಥಿತರಿದ್ದರು.