ರಾಜಧಾನಿ ಬೈರುತ್ ಸೇರಿದಂತೆ ಲೆಬನಾನ್ನ ನೂರಾರು ಸ್ಥಳಗಳಲ್ಲಿ ಮಂಗಳವಾರ ಏಕಕಾಲಕ್ಕೆ ಸಾವಿರಾರು ಪೇಜರ್ಗಳು ಸ್ಪೋಟಗೊಂಡ ಘಟನೆ ಇಡೀ ಜಗತ್ತನ್ನು ಬೆಚ್ಚಿಬೀಳಿಸಿದೆ. 11 ಜನ ಮೃತಪಟ್ಟು 4 ಸಾವಿರಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಇವರಲ್ಲಿ ಬಹುತೇಕರು ಹಿಜ್ಬುಲ್ಲ್ಲಾ ಉಗ್ರ ಸಂಘಟನೆಯ ಸದಸ್ಯರಿದ್ದಾರೆ. ಅವರ ಪ್ಯಾಂಟಿನ ಜೇಬಿನಿಂದ, ಶರ್ಟಿನ ಕಿಸೆಯಿಂದ, ಕೈ ಬೆರಳುಗಳಿಂದ, ಮುಖ-ಕುತ್ತಿಗೆಯಿಂದ ರಕ್ತ ಸೋರುತ್ತಿರುವ ವಿಡಿಯೋಗಳು ಎಲ್ಲೆಡೆ ಹರಿದಾಡುತ್ತಿವೆ. ತರಕಾರಿ ಖರೀದಿಸುತ್ತಿದ್ದವರ ಕೈಚೀಲದಿಂದ, ದಿನಸಿ ಅಂಗಡಿಯ ಕ್ಯಾಷ್ ಕೌಂಟರ್ನಿಂದ ಹೊಗೆ ಬರುತ್ತಿದ್ದ ದೃಶ್ಯಗಳೂ ವೈರಲ್ ಆಗಿವೆ. ರಕ್ತದಲ್ಲಿ ತೊಯ್ದುಹೋದವರನ್ನು ಅಕ್ಕಪಕ್ಕದಲ್ಲಿದ್ದ ಜನರೇ ಆಂಬುಲೆನ್ಸ್ ಗಳಲ್ಲಿ ಸಾಗಿಸಿದ್ದಾರೆ. ಈ ಗಾಯಾಳುಗಳಿಂದ ಆಸ್ಪತ್ರೆಗಳು ತುಂಬಿ ಹೋಗಿವೆ. ಇದೆಲ್ಲವನ್ನೂ ನೋಡಿದ ಸಾಮಾನ್ಯ ಜನ ‘ಏನಾಯಿತು, ಏಕಾಯಿತು, ಹೇಗಾಯಿತು’ ಎಂದು ತಿಳಿಯದೆ ಗಾಬರಿಗೀಡಾಗಿದ್ದಾರೆ. ಇದರ ಹಿಂದೆ ಇಸ್ರೇಲ್ ಕೈವಾಡ ಇದೆ ಎಂಬ ಆರೋಪವನ್ನು ಹಿಜ್ಬುಲ್ಲ್ಲಾ ಉಗ್ರ ಸಂಘಟನೆ ಮಾಡಿದೆ. ಆದರೆ ಇಸ್ರೇಲ್ ಈವರೆಗೆ ಒಪ್ಪಿಯೂ ಇಲ್ಲ, ನಿರಾಕರಿಸಿಯೂ ಇಲ್ಲ. ಆದರೆ, ಸಾವಿರಾರು ಸಂಪರ್ಕ ಸಾಧನಗಳು ಹೀಗೆ ಏಕಕಾಲಕ್ಕೆ ಏಕಾಏಕಿ ಸ್ಪೋಟಗೊಂಡಿದ್ದು ಹೇಗೆ ಎಂಬ ಬಗ್ಗೆ ಇಡೀ ಜಗತ್ತು ತಲೆಕೆಡಿಸಿಕೊಂಡಿರುವುದಂತೂ ನಿಜ.
