ಬೆಂಗಳೂರು: ಕಾಂಗ್ರೆಸ್ ಮುಖಂಡ ಕೆ.ಜೆ.ಜಾರ್ಜ್ ಗುರುವಾರ ಶಾಂತಿನಗರದಲ್ಲಿರುವ ಜಾರಿ ನಿರ್ದೇಶನಾಲಯ (ಇಡಿ) ಕಚೇರಿಗೆ ತೆರಳಿ, ವಿಚಾರಣೆ ಎದುರಿಸಿದರು. 11 ಗಂಟೆಗೆ ಲೆಕ್ಕಪರಿಶೋಧಕರ ಜತೆ ಇಡಿ ಕಚೇರಿಗೆ ಹಾಜರಾದ ಜಾರ್ಜ್ರನ್ನು ಇಡಿ ಉಪನಿರ್ದೇಶಕ ರಾಹುಲ್ ಸಿನ್ಹಾ ಮತ್ತು ಇತರ ಅಧಿಕಾರಿಗಳು ಸತತ 4 ಗಂಟೆಗೂ ಅಧಿಕ ಕಾಲ ವಿಚಾರಣೆ ನಡೆಸಿದರು. ಇಡಿ ಅಧಿಕಾರಿಗಳು ಜಾರ್ಜ್ ಕುಟುಂಬ ಸದಸ್ಯರ ಆದಾಯ, ಹೂಡಿಕೆಗಳು, ಐಟಿ ರಿಟರ್ನ್ಸ್ ಸಲ್ಲಿಸಿರುವ ದಾಖಲೆ ಪರಿಶೀಲಿಸಿದರು. 2005- 06 ಸಾಲಿನ ಆದಾಯ ತೆರಿಗೆ ವಿವರ ಸಲ್ಲಿಕೆ ಜತೆಗೆ ಆಡಿಟ್ ಬ್ಯಾಲೆನ್ಸ್ ಶೀಟ್ ಪರಿಶೀಲನೆ ನಡೆಸಿದರು. ಬಳಿಕ ವಿವಿಧ ಕಂಪನಿಗಳಲ್ಲಿ ಕುಟುಂಬ ಸದಸ್ಯರ ಹೆಸರಿನಲ್ಲಿರುವ ಷೇರುಗಳು, ದೇಶದಲ್ಲಿ ಹೂಡಿಕೆ ಮಾಡಿರುವ ಆಸ್ತಿ-ಪಾಸ್ತಿಗಳು, ವಿದೇಶದಲ್ಲಿ ಹೊಡಿಕೆ ಮಾಡಲಾದ ಬಂಡವಾಳ ಹಾಗೂ ಅದರ ವಿವರ, ಯಾರ ಹೆಸರಿನಲ್ಲಿ ಹೂಡಿಕೆ ಮಾಡಲಾಗಿದೆಂಬ ಕುರಿತು ಅಧಿಕಾರಿಗಳು ಪ್ರಶ್ನಿಸಿದ್ದಾರೆ. ಹೊಂದಿರುವ ಆಸ್ತಿಗಳು ಹಾಗೂ ವಿದೇಶದಲ್ಲಿ ಮಾಡಿರುವ ಹೂಡಿಕೆ ಬಗ್ಗೆ ಜಾರ್ಜ್ ಮಾಹಿತಿ ನೀಡಿದ್ದಾರೆ ಎನ್ನಲಾಗಿದೆ.
