ಐವರಿಗೆ ಕಸಾಪ ಗೌರವ ಸದಸ್ಯತ್ವ

ಬೆಂಗಳೂರು: ಕನ್ನಡ ಸಾಹಿತ್ಯ ಪರಿಷತ್ತಿನ ಗೌರವ ಸದಸ್ಯರನ್ನಾಗಿ ಐವರು ಸಾಹಿತಿಗಳನ್ನು ಆಯ್ಕೆ ಮಾಡಲಾಗಿದೆ. ಆಜೀವ ಗೌರವವಾದ ಸದಸ್ಯತ್ವವನ್ನು 9 ವರ್ಷದ ನಂತರ ನೀಡಲಾಗುತ್ತಿದ್ದು, ಖ್ಯಾತ ವಿಮರ್ಷಕಿ ಡಾ. ವೀಣಾ ಶಾಂತೇಶ್ವರ, ಜಾನಪದ ವಿದ್ವಾಂಸ ಡಾ. ಗೊ.ರು. ಚನ್ನಬಸಪ್ಪ, ಹಿರಿಯ ವಿದ್ವಾಂಸ ಡಾ. ಹಂ. ಪ. ನಾಗರಾಜಯ್ಯ, ಹಿರಿಯ ಕವಿ ಡಾ. ದೊಡ್ಡರಂಗೇಗೌಡ ಹಾಗೂ ಹಿರಿಯ ವಿದ್ವಾಂಸ ಪ್ರೊ. ಮಲ್ಲೇಪುರಂ ಜಿ. ವೆಂಕಟೇಶ್ ಅವರನ್ನು ಆಯ್ಕೆ ಮಾಡಲಾಗಿದೆ ಎಂದು ಕಸಾಪ ಅಧ್ಯಕ್ಷ ಡಾ. ಮನು ಬಳಿಗಾರ್ ಪ್ರಕಟಿಸಿದ್ದಾರೆ.

ಮರಾಠಿ ಭಾಷೆಯ ನಿಗಮವಾದರೆ ವಿರೋಧ
ಮರಾಠ ಸಮುದಾಯ ಹಾಗೂ ಮರಾಠಿ ಭಾಷಿಕರು ಪ್ರತ್ಯೇಖವಾಗಿದ್ದು, ಸರ್ಕಾರವು ಮರಾಠ ಸಮುದಾಯಕ್ಕೆ ನಿಗಮ ಮಾಡಿದ್ದರೆ ಕಸಾಪ ಆಕ್ಷೇಪ ಇಲ್ಲ ಎಂದು ಮನು ಬಳಿಗಾರ್ ಹೇಳಿದರು. ಮರಾಠ ಸಮುದಾಯದವರು ತಲೆಮಾರುಗಳಿಂದ ಕರ್ನಾಟಕದಲ್ಲಿದ್ದು, ಅನೇಕರಿಗೆ ಕನ್ನಡವೇ ಮಾತೃಭಾಷೆ. ಸರ್ಕಾರ ಸ್ಥಾಫಿಸಿರುವ ನಿಗಮವು ಮರಾಠ ಸಮುದಾಯಕ್ಕೆ ಎಂದು ಹೇಳಲಾಗುತ್ತಿದೆ. ಆದರೆ ನಿಗಮಕ್ಕೆ ಕಾರ್ಯಸೂಚಿ ರೂಪಿಸುವಾಗ ಸರ್ಕಾರ ಎಚ್ಚರಿಕೆ ವಹಿಸಬೇಕು. ಮರಾಠ ಭಾಷೆಯ ಕುರಿತಾಗಿ ಕಾರ್ಯವಿದ್ದರೆ ಕಸಾಪ ಅದನ್ನು ವಿರೋಧಿಸುತ್ತದೆ ಎಂದರು.

ಇನ್ನು ಸರ್ಕಾರದ ಹೊಣೆ
ಕಸಾಪಕ್ಕೆ ಸಮಯಕ್ಕೆ ಸರಿಯಾಗಿ ಚುನಾವಣೆ ನಡೆಸುವಂತೆ ಮೂರು ತಿಂಗಳಿಗೂ ಮುಂಚಿತವಾಗಿಯೇ ಪತ್ರ ಬರೆಯಲಾಗಿದ್ದು, ಇನ್ನು ಸರ್ಕಾರದ ನಿರ್ಧಾರದ ಮೇಲೆ ಚುನಾವಣೆ ಅವಲಂಬಿತವಾಗಿದೆ ಎಂದು ಮನು ಬಳಿಗಾರ್ ತಿಳಿಸಿದ್ದಾರೆ. ಮೂರು ತಿಂಗಳು ಮೊದಲು ಪತ್ರ ಬರೆಯಬೇಕು ಎಂದು ನಿಯಮದಲ್ಲಿದೆ. ಆದರೆ ನಾನು ಸುಮಾರು ನಾಲ್ಕು ತಿಂಗಳಿದ್ದಾಗಲೇ ಚುನಾವಣೆ ಕುರಿತ ಪ್ರಕ್ರಿಯೆಗೆ ಚಾಲನೆ ನೀಡಿದ್ದೇನೆ. ಬೆಂಗಳೂರಿನಲ್ಲಿ ಕೇವಲ ಒಂದಿದ್ದ ಮತಗಟ್ಟೆಯನ್ನು 28ಕ್ಕೆ ಹೆಚ್ಚಿಸುವುದು, ಚುನಾವಣಾ ವೆಚ್ಚ ಉಳಿಸಲು ಐದು ವರ್ಷಕ್ಕೊಮ್ಮೆ ಚುನಾವಣೆ ನಡೆಸುವುದು, ಕಾರ್ಯಕಾರಿ ಸಮಿತಿಯಲ್ಲಿ ಎಸ್‌ಸಿಎಸ್‌ಟಿ, ಮಹಿಳಾ ಪ್ರಾತಿನಿಧ್ಯ ಹೆಚ್ಚಿಸುವ ಅನೇಕ ಸುಧಾರಣೆಗಳನ್ನು ತಮ್ಮ ಅವಧಿಯಲ್ಲಿ ಕೈಗೊಳ್ಳಲಾಗಿದೆ ಎಂದರು.