ರಾಮನಗರದಲ್ಲಿ ಹೈಟೆಕ್ ಸಿಲ್ಕ್ ಮಾರುಕಟ್ಟೆ, ವಿಜಯಪುರ ಜಿಲ್ಲೆಯ ಇಟ್ಟಂಗಿಹಳ್ಳಿಯಲ್ಲಿ ಫುಡ್ಪಾರ್ಕ್ ಮಾಡುವುದರಿಂದ ಕೃಷಿ ಉತ್ಪನ್ನಗಳ ಮೌಲ್ಯವರ್ಧನೆ ಹಾಗೂ ಮಾರುಕಟ್ಟೆಗೆ ಸಹಕಾರಿಯಾಗುವ ನಡೆಯಾಗಿದೆ. ಪಿಎಂ ಕಿಸಾನ್ ಸಂಚಯ ಹಾಗೂ ಇತರ ಕಾರ್ಯಕ್ರಮಗಳಿಗೆ ರಾಜ್ಯದಲ್ಲಿಯೂ ಪೂರಕವಾಗಿ ಅನುದಾನ ನೀಡಲಾಗಿದೆ. ತೋಟಗಾರಿಕೆ, ಸಾವಯವ ಕೃಷಿ, ಬೆಂಗಳೂರಿನ ಹೆಸರಘಟ್ಟದಲ್ಲಿ 100 ಎಕರೆ ಪ್ರದೇಶದಲ್ಲಿ ಸಂಶೋಧನೆಗೆ ಆದ್ಯತೆ, ಹೈಬ್ರಿಡ್ ಬೀಜ ವಿತರಣೆಗೆ ಕ್ರಮ, ರಸಗೊಬ್ಬರ ವಿತರಣೆ ಸೂಕ್ತವಾಗಿ ನಡೆಯಲು 10 ಕೋಟಿ ರೂ., ಅಡಕೆಗೆ ತಗುಲಿರುವ ಹಳದಿ ಎಲೆರೋಗ ಸಂಶೋಧನಾ ಕೇಂದ್ರಕ್ಕೆ 25 ಕೋಟಿ ರೂ. ನೀಡುವ ಮೂಲಕ ಕೃಷಿಯ ಸಮಗ್ರ ಆಯಾಮವನ್ನು ಸರ್ಕಾರ ನೋಡಿದೆ. ನೀರಾವರಿಗೂ ಆದ್ಯತೆ ನೀಡಲಾಗಿದೆ. ರೈತರಿಗೆ ಅಡಮಾನ ಸಾಲದ ಮೇಲಿನ ಬಡ್ಡಿ ಕಡಿಮೆ ಮಾಡಿರುವ ಕ್ರಮವು ಸಾಕಷ್ಟು ಅನುಕೂಲವನ್ನುಂಟು ಮಾಡುತ್ತದೆ. ಹೂವು, ಒಣಮೆಣಸಿನಕಾಯಿಗೆ ಪ್ರತ್ಯೇಕ ಮಾರುಕಟ್ಟೆ ಸ್ಥಾಪಿಸಲು ಮುಂದಾಗಿರುವುದು ಒಳ್ಳೆಯದು. ಕುರಿ ಸಂವರ್ಧನೆ ಕೇಂದ್ರ ಮಾಡುವುದು, ಬೇಡ್ತಿ ಹಾಗೂ ವರದಾನದಿಗಳ ಜೋಡಣೆಗೆ ಒತ್ತು ನೀಡಿರುವುದು ಸಹ ಕೃಷಿ ಹಾಗೂ ಗ್ರಾಮೀಣಾಭಿವೃದ್ಧಿಗೆ ಪೂರಕವಾಗಿಯೇ ಇವೆ.
