ಒನ್ ನೇಷನ್-ಫ್ರೀ ಎಜ್ಯುಕೇಶನ್ ಯೋಜನೆ ಜಾರಿ ಮಾಡಲಿ; ಪ್ರಧಾನಿಗೆ ಸಚಿವ ಲಾಡ್ ಸಲಹೆ

ಬೆಂಗಳೂರು: ಒಂದು ರಾಷ್ಟ್ರ ಒಂದು ಚುನಾವಣೆ ಎಂಬ ಪ್ರಧಾನಿ ನರೇಂದ್ರ ಮೋದಿ ಮತ್ತು ಬಿಜೆಪಿಯ ಹೊಸ ಘೋಷಣೆಯ ಬದಲಾಗಿ, ಒನ್ ನೇಷನ್-ಫ್ರೀ ಎಜ್ಯುಕೇಶನ್’ ಯೋಜನೆ ಜಾರಿ ಮಾಡಲಿ ಎಂದು ಕಾರ್ಮಿಕ ಸಚಿವ ಸಂತೋಷ್ ಲಾಡ್ ಕೇಂದ್ರ ಸರ್ಕಾರವನ್ನು ಆಗ್ರಹಿಸಿದ್ದಾರೆ.

ಕೇಂದ್ರ ಸರ್ಕಾರ ಪ್ರಚಾರ ಮಾಡಿಕೊಳ್ಳುವುದರಲ್ಲಿ ನಂಬರ್ ಒನ್ ಆಗಿದೆ. ಚುನಾವಣೆ ಹತ್ತಿರ ಬಂದಂತೆ ತಮ್ಮದೇ ಗಿಮಿಕ್ ಮೂಲಕ ಸಮಾಜ ಹಾಗೂ ಜನರ ಕಣ್ಣು ಕಟ್ಟುವ ವಿದ್ಯೆಯನ್ನು ಕರಗತ ಮಾಡಿಕೊಂಡಿದೆ. ಇದರ ಭಾಗವಾಗಿಯೇ ‘ಒನ್ ನೇಷನ್-ಒನ್ ಎಲೆಕ್ಷನ್’ ಎಂಬ ಒಕ್ಕೂಟ ವ್ಯವಸ್ಥೆಯ ವಿರೋಧಿ ಆಲೋಚನೆಯ ಪರಿಕಲ್ಪನೆಯನ್ನು ಜನರ ಮಧ್ಯೆ ಅತಿರಂಜಿತವಾಗಿ ಬಿತ್ತಲಾಗುತ್ತಿದೆ. ಇದರಿಂದ ದೇಶದ ಪ್ರಜಾಪ್ರಭುತ್ವದ ಮೌಲ್ಯಗಳಿಗೆ ದೊಡ್ಡ ಹೊಡೆತ ಬೀಳಲಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಒನ್ ನೇಷನ್ ಎನ್ ಎಲೆಕ್ಷನ್ ಬದಲಾಗಿ ‘ಒನ್ ನೇಷನ್-ಫ್ರೀ ಎಜ್ಯುಕೇಶನ್’ ಕಾಯ್ದೆಯನ್ನು ಜಾರಿಗೆ ತಂದು ಅತ್ಯಂತ ಹಿಂದುಳಿದಿರುವ ದೇಶದ ಶೈಕ್ಷಣಿಕ ವ್ಯವಸ್ಥೆಯನ್ನು ಸುಧಾರಿಸಿ, ದೇಶದ ಪ್ರತಿಯೊಬ್ಬ ಮಗುವು ಕೂಡ ಉಚಿತ ಶಿಕ್ಷಣ ಹೊಂದಬಹುದಾಗಿದೆ ಎಂದ ಅವರು ಪ್ರಧಾನಿ ಮೋದಿ ಅವರು ತಮ್ಮ ಪ್ರಚಾರ ಕಾರ್ಯಗಳಿಗೆ ಖರ್ಚು ಮಾಡುವ ಹಣವನ್ನು ಬಡವರ ಮಕ್ಕಳಿಗೆ ಉಚಿತ ಶಿಕ್ಷಣ ನೀಡಲು ಬಳಸಲಿ ಎಂದು ಸಲಹೆ ನೀಡಿದ್ದಾರೆ.