ಪಟ್ಟಣದ 30 ಹಾಸಿಗೆಗಳ ಆಸ್ಪತ್ರೆ ಇದೀಗ ಸುಧಾರಣೆ ಕಾಣುತ್ತಿದೆ. ವೈದ್ಯಾಧಿಕಾರಿ ನೇಮಕವಾಗಿದ್ದು, ನಿಯೋಜನೆ ಮೇಲೆ ಕೆಲ ವೈದ್ಯರು ಕಾರ್ಯನಿರ್ವಹಿಸುತ್ತಿದ್ದಾರೆ. ಇದರಿಂದ ಸಾಮಾನ್ಯ ರೋಗಗಳಿಗೆ ಚಿಕಿತ್ಸೆ ದೊರೆಯುತ್ತಿದೆ. ಆಸ್ಪತ್ರೆ ವ್ಯಾಪ್ತಿಯಲ್ಲಿ ಅಪಘಾತಗಳು ಸಂಭವಿಸಿ ಗಾಯಗೊಂಡವರಿಗೆ, ಕಷ್ಟಕರ ಹೆರಿಗೆ, ತೀವ್ರ ಸ್ವರೂಪದ ಕಾಯಿಲೆಗಳಿಂದ ಬಳಲುತ್ತಿರುವವರಿಗೆ ಹೆಚ್ಚಿನ ಸೌಲಭ್ಯವಿರುವ ಆಸ್ಪತ್ರೆಗಳಿಗೆ ಸಾಗಿಸಲು ಆಂಬುಲೆನ್ಸ್ ಬೇಕು. ಆದರೆ, ಇಲ್ಲಿನ ಸರ್ಕಾರಿ ಆಸ್ಪತ್ರೆಯಲ್ಲಿರುವ ಆಂಬುಲೆನ್ಸ್ ತಳ್ಳಿದರೆ ಮಾತ್ರ ಚಾಲು ಆಗುತ್ತಿದೆ. ಅದೂ ಒಮ್ಮೊಮ್ಮೆ ಆಗಲ್ಲ. ದಾರಿಮಧ್ಯೆ ಕೈಕೊಟ್ಟರೆ ಏನು ಗತಿ ಎಂಬ ಭಯ ರೋಗಿಗಳು, ಸಂಬಂಧಿಕರನ್ನು ಕಾಡುತ್ತಿದೆ. ಆಂಬುಲೆನ್ಸ್ ಹಳೆಯದಾಗಿದ್ದು, ಎಷ್ಟೇ ಸಲ ರಿಪೇರಿ ಮಾಡಿಸಿದರೂ ಅಷ್ಟೇ ಎನ್ನುವಂತಿದೆ. ಇದರಿಂದ ತುರ್ತಾಗಿ ಆಂಬುಲೆನ್ಸ್ ಬೇಕೆಂದು 108 ಸಂಖ್ಯೆಗೆ ಕರೆ ಮಾಡಿದರೆ, ಅದು ಬರುವವರೆಗೆ ಜೀವ ಕೈಯಲ್ಲಿ ಹಿಡಿದು ಕಾಯಬೇಕಾಗಿದೆ.
