ಹೈಟೆಕ್ ಪ್ರವಾಸಿ ತಾಣವಾಗಿಸಲು ಜೋಗ ಅಭಿವೃದ್ಧಿ

ಕಾರ್ಗಲ್: ಹೈಟೆಕ್ ಪ್ರವಾಸಿ ತಾಣವಾಗಿಸಲು 185 ಕೋಟಿ ರೂ. ವೆಚ್ಚದಲ್ಲಿ ವಿಶ್ವವಿಖ್ಯಾತ ಜೋಗ ಜಲಪಾತದಲ್ಲಿ ಅಭಿವೃದ್ಧಿ ಕಾಮಗಾರಿಗಳು ತ್ವರಿತಗತಿಯಲ್ಲಿ ನಡೆಯುತ್ತಿವೆ ಎಂದು ಶಾಸಕ ಗೋಪಾಲಕೃಷ್ಣ ಬೇಳೂರು ಹೇಳಿದರು.

ಜೋಗ ಜಲಪಾತಕ್ಕೆ ಜಿಲ್ಲಾಧಿಕಾರಿ ಹಾಗೂ ಜಿಲ್ಲಾಮಟ್ಟದ ಅಧಿಕಾರಿಗಳ ಜತೆ ಭೇಟಿ ನೀಡಿ ವಿವಿಧ ಕಾಮಗಾರಿಗಳನ್ನು ಪರಿಶೀಲಿಸಿ ಮಾತನಾಡಿ, ಪ್ರವಾಸಿಗರು ವರ್ಷಪೂರ್ತಿ ಆಗಮಿಸಿ ಜಲಪಾತದ ವೀಕ್ಷಣೆ ಜತೆಗೆ ಯುವಪೀಳಿಗೆಗೆ ಆಕರ್ಷಿಸುವ ವಿನೂತನ ಕಾಮಗಾರಿ ಅಳವಡಿಸಲಾಗುತ್ತಿದೆ ಎಂದು ತಿಳಿಸಿದರು.

ಜೋಗ ಜಲಪಾತದಲ್ಲಿ 185 ಕೋಟಿ ರೂ. ವೆಚ್ಚದ ಕಾಮಗಾರಿ ಪೈಕಿ ಹಿಂದಿನ ಸರ್ಕಾರ 20 ಕೋಟಿ ರೂ. ನೀಡಿತ್ತು. ರಾಜ್ಯ ಸರ್ಕಾರ ಈಗಾಗಲೇ 75 ಕೋಟಿ ರೂ. ಹಣ ಬಿಡುಗಡೆ ಮಾಡಿದೆ. ಒಟ್ಟು 95 ಕೋಟಿ ರೂ. ಹಣ ನೀಡಲಾಗಿದೆ. ಗುತ್ತಿಗೆ ಕಂಪನಿಗೆ 99 ಕೋಟಿ ರೂ. ಬಾಕಿ ನೀಡಬೇಕಿರುತ್ತದೆ ಎಂದರು.

ಜೋಗ ಜಲಪಾತ ಮುಖ್ಯದ್ವಾರಕ್ಕೆ ಹೊಂದಿಕೊಂಡಂತೆ ದ್ವಿಪಥ ಕಾಂಕ್ರೀಟ್ ರಸ್ತೆ ಮಾಡಬೇಕಿದೆ. ತ್ರಿಸ್ಟಾರ್ ಹೋಟೆಲ್ ನಿರ್ಮಾಣ ಮಾಡಲಾಗುವುದು. ಈ ಹಿಂದೆ ನಿರ್ಮಾಣ ಮಾಡಲಾದ ಜಿಪ್‌ಲೈನ್ ಇದ್ದು, ಸರಿಪಡಿಸಿ ಸೇವೆಗೆ ನೀಡಲಾಗುವುದು ಎಂದು ಮಾಹಿತಿ ನೀಡಿದರು.

ತಳಕಳಲೆ ಹಿನ್ನೀರಿನ ದಡದಲ್ಲಿ ಪ್ರವಾಸಿಗರಿಗೆ ಬೋಟಿಂಗ್ ವ್ಯವಸ್ಥೆ ಮಾಡುವುದು ಕಾಮಗಾರಿ ಪ್ಯಾಕೇಜ್‌ನಲ್ಲಿದೆ. ಜೋಗದಲ್ಲಿ ಕೆಲಸಕ್ಕೆ ಸ್ಥಳೀಯರಿಗೆ ಮೊದಲ ಅವಕಾಶ ನೀಡಲಾಗುವುದು. ಆದರೆ ಎಷ್ಟು ಮಂದಿ ಬೇಕು ಎನ್ನುವ ಬಗ್ಗೆ ಇನ್ನೂ ನಿರ್ಧಾರವಾಗಿಲ್ಲ ಎಂದರು. ಹಿಂದಿನ ಬಿಜೆಪಿ ಸರ್ಕಾರ ಕೆಲಸಕ್ಕೆ ಆದೇಶ ಮಾಡಿತ್ತಾದರೂ ಹಣ ಬಿಡುಗಡೆ ಮಾಡಿರಲಿಲ್ಲ. ಇದರಿಂದ ಕಾಮಗಾರಿಗಳನ್ನು ಮುಗಿಸಲು ವಿಳಂಬವಾಗಿದೆ. ಇದೀಗ ತ್ವರಿತಗತಿಯಲ್ಲಿ ಕಾಮಗಾರಿ ನಡೆಯುತ್ತಿದ್ದು, ಹಂತ ಹಂತವಾಗಿ ಕಾಮಗಾರಿ ಮುಗಿಸಲಾಗುವುದು ಎಂದು ತಿಳಿಸಿದರು.

ಪಪಂ ಅಧ್ಯಕ್ಷ ಎಂ.ರಾಜು, ಉಪಾಧ್ಯಕ್ಷೆ ಜಯಲಕ್ಷ್ಮೀ, ಸದಸ್ಯರಾದ ಪಿ.ಮಂಜುನಾಥ್, ಸುಜಾತಾ ಜೈನ್, ಪ್ರವಾಸೋದ್ಯಮ ಇಲಾಖೆ ಸಹಾಯಕ ನಿರ್ದೇಶಕ ಧರ್ಮಪ್ಪ, ಸಾಗರ ನಗರಸಭೆ ಸದಸ್ಯ ಗಣಪತಿ ಮಂಡಗಳಲೆ, ಪ್ರಮುಖರಾದ ಕಲಸೆ ಚಂದ್ರಪ್ಪ, ವಿ.ಸಂತೋಷ್‌ಕುಮಾರ್, ಸಂದೀಪ್, ರವಿ ಲಿಂಗನಮಕ್ಕಿ, ಶ್ರೀಧರ್ ಲಿಂಗನಮಕ್ಕಿ, ಸತೀಶ್ ಮಹಾಲೆ, ವಿಜಯ್ ಕುಮಾರ್, ಸಣ್ಣಪ್ಪ ಇತರರಿದ್ದರು.

https://www.vijayavani.net/be-aware-of-the-child-adoption-law