ಭಾರತದಲ್ಲಿ ಬೈಡೆನ್ ಸಂಬಂಧಿಗಳು?

ಜೋ ಬೈಡೆನ್ ಅವರ ದೂರದ ಸಂಬಂಧಿಕರು ಈಗಲೂ ಭಾರತದಲ್ಲಿ ವಾಸವಾಗಿದ್ದಾರೆಯೇ ಎಂಬ ವಿಷಯ ಅವರು ಅಧ್ಯಕ್ಷರಾದ ಬೆನ್ನಲ್ಲೇ ಮತ್ತೆ ಮುನ್ನೆಲೆಗೆ ಬಂದಿದೆ. ಆದಾಗ್ಯೂ ಭಾರತದಲ್ಲಿ ಯಾರೊಬ್ಬರೂ ತಾವು ಬೈಡೆನ್ ಸಂಬಂಧಿಗಳು ಎಂದು ಈಗ ಹೇಳಿಕೊಂಡಿಲ್ಲ. 2013ರಲ್ಲಿ ಉಪಾಧ್ಯಕ್ಷರಾಗಿದ್ದ ಬೈಡೆನ್ ಮುಂಬೈಗೆ ಭೇಟಿ ನೀಡಿದ್ದರು. ಆಗ ಆಶ್ಚರ್ಯಕರ ಮಾಹಿತಿ ಬಿಚ್ಚಿಟ್ಟಿದ್ದ ಬೈಡೆನ್, ತಾವು 29 ವರ್ಷದವರಾಗಿದ್ದಾಗ 1972ರಲ್ಲಿ ಮೊದಲ ಬಾರಿ ಅಮೆರಿಕದ ಸೆನೆಟ್​ಗೆ ಆಯ್ಕೆಯಾದ ವೇಳೆ ಭಾರತದಿಂದ ಬೈಡೆನ್ ಎಂಬ ಹೆಸರಿನವರಿಂದ ಬಂದಿದ್ದ ಪತ್ರವೊಂದರ ಬಗ್ಗೆ ಹೇಳಿದ್ದರು.

ಪತ್ರದಲ್ಲಿ ‘ಜೋ ಬೈಡೆನ್ ದೊಡ್ಡ ಅಜ್ಜ ಭಾರತದಲ್ಲಿ ಈಸ್ಟ್ ಇಂಡಿಯಾ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರು. ಬಳಿಕ ಅವರು ಇಲ್ಲಿನ ಮಹಿಳೆಯನ್ನು ಮದುವೆಯಾಗಿ ಭಾರತದಲ್ಲೇ ನೆಲೆಸಿದ್ದರು ಎನ್ನಲಾಗಿದೆ. ಹೀಗಾಗಿ ಜೋ ಬೈಡೆನ್​ಗೂ ನಮಗೂ ಸಂಬಂಧವಿರಬಹುದು ಎಂದು ಬರೆಯಲಾಗಿತ್ತು’. ಆದರೆ ಆ ಪತ್ರದ ಬಗ್ಗೆ ತಾವು ಹೆಚ್ಚು ಆಸಕ್ತಿಯನ್ನು ವಹಿಸಲಿಲ್ಲ. ತಮಗೆ ತಿಳಿದಿರುವ ಮಾಹಿತಿಯ ಪ್ರಕಾರ ಮುಂಬೈನಲ್ಲಿ 5 ಮಂದಿ ಬೈಡೆನ್ ಹೆಸರಿನವರಿದ್ದಾರೆ. ಬಹುಶಃ ಯಾರಾದರೂ ಈ ವಿಷಯದ ಬೆನ್ನು ಹತ್ತಬಹುದು ಎಂದು ಜೋ ಬೈಡೆನ್ ಹೇಳಿದ್ದರು. ಈ ಕುರಿತು 2015ರಲ್ಲಿ ವಾಷಿಂಗ್ಟನ್​ನಲ್ಲೂ ಮಾತನಾಡಿದ್ದ ಬೈಡೆನ್, ತಮ್ಮ ದೊಡ್ಡ ಅಜ್ಜ ಜಾರ್ಜ್ ಬೈಡೆನ್ ಈಸ್ಟ್ ಇಂಡಿಯಾ ಟ್ರೇಡಿಂಗ್ ಕಂಪನಿಯಲ್ಲಿ ಕ್ಯಾಪ್ಟನ್ ಆಗಿದ್ದರು ಹಾಗೂ ಅವರು ಅಲ್ಲೇ ಮದುವೆಯಾಗಿ ನೆಲೆಸಿದ್ದರು ಎಂದು ಹೇಳಿದ್ದರು.

ಬೆಂಬಲಿಗರಿಂದ ಸಂಭ್ರಮಾಚರಣೆ

ಅಮೆರಿಕದಲ್ಲಿ ಡೆಮಾಕ್ರಟರ ಸಂಭ್ರಮ ಎಲ್ಲೆಲ್ಲೂ ಕಾಣುತ್ತಿದೆ. ರಸ್ತೆಗಳಲ್ಲಿ ಅಮೆರಿಕದ ಧ್ವಜಗಳ ಹಾರಾಟ, ಬೆಂಬಲಿಗರ ನೃತ್ಯ, ಮೆಕ್ಸಿಕನ್ ವೇವ್​ಗಳ ಸಂಭ್ರಮಾಚರಣೆಗಳು ನಡೆಯುತ್ತಿವೆ. ಟ್ರಂಪ್ ಬೆಂಬಲಿಗರಿಂದ ಆಕ್ರೋಶ ಮತ್ತು ಫಲಿತಾಂಶವನ್ನು ಒಪ್ಪಿಕೊಳ್ಳುವ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಮತಗಳ ಆಡಿಟ್ ಆಗಬೇಕು, ಕೋರ್ಟ್​ನಲ್ಲಿ ನಾವು ಜಯಗಳಿಸುತ್ತೇವೆ ಎಂದು ಹಲವರು ಹೇಳಿದ್ದಾರೆ. ಆದರೆ, ಎಲ್ಲೂ ದೊಡ್ಡ ಮಟ್ಟದ ಪ್ರತಿಭಟನೆ ವ್ಯಕ್ತವಾಗಿಲ್ಲ.

ವಿಶ್ವ ನಾಯಕರಿಂದ ಅಭಿನಂದನೆ

ಜೋ ಬೈಡೆನ್​ಗೆ ವಿಶ್ವ ನಾಯಕರಿಂದ ಅಭಿನಂದನೆಯ ಮಹಾಪೂರವೇ ಹರಿದುಬಂದಿದೆ. ಭಾರತದ ಪ್ರಧಾನಿ ನರೇಂದ್ರ ಮೋದಿ, ಬ್ರಿಟನ್ ಪ್ರಧಾನಿ ಬೋರಿಸ್ ಜಾನ್ಸನ್, ಕೆನಾಡದ ಪ್ರಧಾನಿ ಜಸ್ಟಿನ್ ಟ್ರುಡೊ, ಜರ್ಮನಿಯ ಚಾನ್ಸಲರ್ ಏಂಜೆಲಾ ಮರ್ಕೆಲ್ ಇನ್ನಿತರರು ಶುಭಕೋರಿದ್ದಾರೆ.

ಬೈಡೆನ್ ಟೀಂಗೆ ಮಂಡ್ಯ ವೈದ್ಯ?

ಮಂಡ್ಯ: ಅಮೆರಿಕ ಅಧ್ಯಕ್ಷೀಯ ಚುನಾವಣೆ ಯಲ್ಲಿ ಜೋ ಬೈಡೆನ್ ಮತ್ತು ಕಮಲಾ ಹ್ಯಾರಿಸ್ ಪರ ಸಕ್ರಿಯವಾಗಿ

ಹಲ್ಲೆಗೆರೆ ಗ್ರಾಮದ ಡಾ.ಎಚ್.ಎನ್.ಲಕ್ಷ್ಮೀನರಸಿಂಹಮೂರ್ತಿ ಮತ್ತು ಮೈತ್ರೇಯಿ ದಂಪತಿಯ ಮಗ ವಿವೇಕ್, ಲಂಡನ್​ನಲ್ಲಿ ಜನಿಸಿದರು. ನಂತರ ಬೆಳೆದಿದ್ದು ಅಮೆರಿಕದಲ್ಲಿ. ಡಾಕ್ಟರ್ ಫಾರ್ ಅಮೆರಿಕ ಸಂಘಟನೆಯ ಸಂಸ್ಥಾಪಕರಾಗಿ, ಬರಾಕ್ ಒಬಾಮ ಹೆಲ್ತ್​ಕೇರ್ ಮುಖ್ಯಸ್ಥ ಹಾಗೂ ವೈದ್ಯಕೀಯ ಸಲಹೆಗಾರರಾಗಿಯೂ ಸೇವೆ ಸಲ್ಲಿಸಿದ್ದಾರೆ. ವಿವೇಕ್ ಆಶಯದಂತೆ ಹಲ್ಲೆಗೆರೆ ಗ್ರಾಮದಲ್ಲಿ ಸರ್ವಧರ್ಮದ ಪ್ರತೀಕವಾಗಿ ಪ್ರಪಂಚದ 36 ಮಹಾನ್ ಮಾನವತಾವಾದಿಗಳ ಪ್ರತಿಮೆ ನಿರ್ವಣಕ್ಕೆ ಸಿದ್ಧತೆ ನಡೆದಿದೆ.

ಕರೊನಾ ಟಾಸ್ಕ್​ಫೋರ್ಸ್​ಗೆ ವಿವೇಕ್ ನೇತೃತ್ವ

ದೇಶದಲ್ಲಿ ಕಾಡುತ್ತಿರುವ ಕರೊನಾ ಜಾಡ್ಯವನ್ನು ಹತೋಟಿಗೆ ತರಲು ವಿಜ್ಞಾನಿಗಳು ಮತ್ತು ತಜ್ಞರನ್ನು ಒಳಗೊಂಡ ಟಾಸ್ಕ್​ಫೋರ್ಸ್ ಅನ್ನು ಸೋಮವಾರ ರಚಿಸುವುದಾಗಿ ಬೈಡೆನ್ ಹೇಳಿದರು. ಈ ಟಾಸ್ಕ್​ಫೋರ್ಸ್​ನ ಯೋಜನೆಗಳು ವಿಜ್ಞಾನಿಗಳ ಅಭಿಪ್ರಾಯದಂತೆ ರೂಪಿತವಾಗುತ್ತವೆ ಮತ್ತು ಈ ವಿಚಾರದಲ್ಲಿ ರಾಜಕೀಯ ಹಸ್ತಕ್ಷೇಪ ಇರುವುದಿಲ್ಲ ಎಂದರು. ಈ ಟಾಸ್ಕ್​ಫೋರ್ಸ್​ನ ಸಹಅಧ್ಯಕ್ಷರಾಗಿ ಒಬಾಮಾ ಅವಧಿಯಲ್ಲಿ 19ನೇ ಜನರಲ್ ಸರ್ಜನ್ ಆಗಿದ್ದ ಮಂಡ್ಯದ ಹಲ್ಲೆಗೆರೆ ಮೂಲದ ಡಾ. ವಿವೇಕ್ ಮೂರ್ತಿ ಮತ್ತು ಆಹಾರ ಹಾಗೂ ಔಷಧ ನಿಯಂತ್ರಣದ ಮಾಜಿ ಆಯುಕ್ತ ಡೇವಿಡ್ ಕೆಸ್ಲರ್ ಇರಲಿದ್ದಾರೆ.

• ಡೊನಾಲ್ಡ್ ಟ್ರಂಪ್ ಅವರಿಗೆ ವಿಚ್ಛೇದನ ನೀಡುವ ಬಗ್ಗೆ ಅವರ ಪತ್ನಿ ಮೆಲನಿಯಾ ಯೋಚಿಸುತ್ತಿದ್ದಾರೆ ಎಂದು ಅವರ ಮಾಜಿ ಸಹಾಯಕರ ಮೂಲಗಳು ತಿಳಿಸಿವೆ. ಈ ಕುರಿತು ಮೆಲನಿಯಾ ಅಧಿಕೃತ ಹೇಳಿಕೆ ನೀಡಿಲ್ಲ.
• ಅಧ್ಯಕ್ಷೀಯ ಚುನಾವಣೆಯಲ್ಲಿ ಸೋತ ಬೆನ್ನಲ್ಲೇ ಜೆರುಸಲೇಂ ನಗರ ಪಾಲಿಕೆ ಟ್ರಂಪ್​ಗೆ ಉದ್ಯೋಗದ ಆಫರ್ ನೀಡಿದೆ. ಟ್ರಂಪ್ ನೀವು ಚಿಂತಿಸಬೇಡಿ, ನಿಮಗೆ ಅರ್ಹ ವಾಗುವ ಹಲವಾರು ಹುದ್ದೆಗಳು ಖಾಲಿ ಇದ್ದು, ಅರ್ಜಿ ಸಲ್ಲಿಸಬಹುದು ಎಂದು ನಗರ ಪಾಲಿಕೆ ಹೇಳಿದೆ.