ಮಿಸ್ ಫೆಸ್ಟಿವಲ್ ಆಪ್ ನೇಷನ್ಸ್ ಫಸ್ಟ್ ರನ್ನರ್ ಅಪ್ ಪ್ರಶಸ್ತಿ ಗೆದ್ದು ಮಾತನಾಡಿದ ಜೀವಿಕಾ, "ನನ್ನ ಈ ಪ್ರಶಸ್ತಿಯನ್ನು ಕೆಲ ದಿನಗಳ ಹಿಂದೆಯಷ್ಟೇ ನಿಧನರಾದ ನನ್ನ ತಾತನಿಗೆ (ತಾಯಿಯ ತಂದೆ) ಅರ್ಪಿಸುತ್ತಿದ್ದೇನೆ. ನಿಧನದ ವಿಷಯ ತಿಳಿದ ತಕ್ಷಣ ನನ್ನ ತಾಯಿ ಉಮಾ ಇಂಡಿಯಾಕ್ಕೆ ಧಾವಿಸಿ ಹೋಗಿದ್ದಾರೆ. ಇವತ್ತು ನನ್ನ ತಾಯಿಯನ್ನು ತುಂಬಾ ಮಿಸ್ ಮಾಡಿಕೊಂಡೆ. ನನ್ನ ತಂದೆ ಬೆಂಕಿ ಬಸಣ್ಣ ನನಗೆ ಎಲ್ಲಾ ರೀತಿಯ ಪ್ರೋತ್ಸಾಹಗಳನ್ನು ಕೊಟ್ಟಿದ್ದಾರೆ. ಜೊತೆಗೆ ಇಲ್ಲಿಯ ಕನ್ನಡ ಕಲಿ ಶಾಲೆಯ ಗುರುಗಳಾದ ಲತಾ ಮೇಡಂ ನನಗೆ ಮಾರ್ಗದರ್ಶನ ಮಾಡಿದ್ದಾರೆ. ನನ್ನ ತಾಯಿ ಇಲ್ಲಿ ಇಲ್ಲದ ಕಾರಣ ಕವಿತಾ ಆಂಟಿ ನನ್ನ ಮೇಕಪ್ ಮಾಡಿದ್ದು, ಜೊತೆಗೆ ನನ್ನಿಷ್ಟದ ರುಚಿಯಾದ ಅಡುಗೆಯನ್ನು ಮಾಡಿ ಪ್ರೀತಿಯಿಂದ ಉಣಬಡಿಸಿದ್ದಾರೆ. ಜೊತೆಗೆ ಆಲ್ಬನಿ ಕನ್ನಡ ಸಂಘದ ಬಹಳಷ್ಟು ಜನರು ಫೆಸ್ಟಿವಲ್ ಆಫ್ ನೇಶನ್ಸ್ಗೆ ಬಂದು ಮೆರವಣಿಗೆಯಲ್ಲಿ ಭಾಗವಹಿಸಿ ನನಗೆ ಧೈರ್ಯ, ಸಹಕಾರ, ಪ್ರೋತ್ಸಾಹ ಮತ್ತು ಬೆಂಬಲವನ್ನು ಕೊಟ್ಟಿದ್ದಾರೆ. ಅವರೆಲ್ಲರಿಗೂ ನಾನು ಚಿರಋಣಿಯಾಗಿದ್ದೇನೆ. ಸ್ವಲ್ಪದರಲ್ಲಿ ಮಿಸ್ ಫೆಸ್ಟಿವಲ್ ಆಫ್ ನೇಶನ್ಸ್ ಕಿರೀಟ ತಪ್ಪಿದ್ದಕ್ಕೆ ಕೊಂಚ ಬೇಜಾರಾಗಿದೆ. ಆದರೆ, ಇದನ್ನು ನಾನು ಸ್ಪೋಟಿವ್ ಆಗಿ ತೆಗೆದುಕೊಳ್ಳುತ್ತೇನೆ. ಪ್ರಶಸ್ತಿ ಗೆದ್ದ "ಮಿಸ್ ಬೋಸ್ನಿಯಾ"ಗೆ ನನ್ನ ತುಂಬು ಹೃದಯದ ಅಭಿನಂದನೆಗಳನ್ನು ಹೇಳುತ್ತೇನೆ. ಈ ಸ್ಪರ್ಧೆಯಲ್ಲಿ ಭಾಗವಹಿಸುವ ಅನುಭವವೇ ಒಂದು ರೋಚಕ ಹಾಗೂ ಗೌರವದ ವಿಷಯವಾಗಿದೆ. ಇದು ನನ್ನ ಜೀವನದ ಒಂದು ಪ್ರಮುಖ ಮೈಲುಗಲ್ಲಾಗಿದೆ. ನಾನು ಜೀವನದಲ್ಲಿ ಇನ್ನೂ ಬಹಳಷ್ಟು ಸಾಧನೆ ಮಾಡುವುದು ಇದೆ" ಎಂದು ತಿಳಿಸಿದಳು.
