ಪಾಲಕರನ್ನು ಕರೆದೊಯ್ದರೂ ಶರಣಾಗದ ಉಗ್ರರನ್ನು ಹೊಡೆದುರುಳಿಸಿದ ಸೇನೆ

ನವದೆಹಲಿ: ಲಾಕ್​ಡೌನ್​ ನಡುವೆಯೂ ಭಾರತದ ಮೇಲೆ ದಾಳಿ ನಡೆಸಲು ಸಜ್ಜಾಗಿ ನಿಂತಿರುವ ಪಾಕಿಸ್ತಾನದ ಉಗ್ರರ ಹೆಣಗಳನ್ನು ಭಾರತೀಯ ಯೋಧರು ಉರುಳಿಸುತ್ತಲೇ ಇದ್ದಾರೆ. ಕಳೆದ ವಾರವಷ್ಟೇ ಕಾಶ್ಮೀರದ ಕುಲ್ಗಾಂವ್​ ಜಿಲ್ಲೆಯಲ್ಲಿ ಭಾರತೀಯ ಸೇನೆ ಇಬ್ಬರು ಉಗ್ರರನ್ನು ಹೊಡೆದುರುಳಿಸಿದ ಬೆನ್ನಲ್ಲೇ ನಿನ್ನೆ ಸಂಜೆ ಮತ್ತೆ ಇಬ್ಬರು ಉಗ್ರರನ್ನು ಯೋಧರು ಎನ್​ಕೌಂಟರ್​ ಮಾಡಿದ್ದಾರೆ.

ಈ ಇಬ್ಬರು ಉಗ್ರರನ್ನು ಹಿಜ್ಬುಲ್‌ ಮುಜಾಹಿದೀನ್‌ ಸಂಘಟನೆಯ ಸದಸ್ಯರು ಎಂದು ಗುರುತಿಸಲಾಗಿದೆ. ಕುಲ್ಗಾಮ್‌ ಜಿಲ್ಲೆಯ ವಾನ್‌ಪೊರಾ ಪ್ರಾಂತ್ಯದಲ್ಲಿ ಈ ಘಟನೆ ನಡೆದಿದೆ.

ಇದನ್ನೂ ಓದಿ: VIDEO: ರೋಗ ನಿರೋಧಕ ಶಕ್ತಿಗೆ ಆಯುರ್ವೇದ, ಯೋಗ ಪರಿಣಾಮಕಾರಿ: ‘ಮನ್​ ಕೀ ಬಾತ್​’ನಲ್ಲಿ ಪ್ರಧಾನಿ

ವಾನ್​ಪೊರಾ ಪ್ರಾಂತ್ಯದಲ್ಲಿ ಉಗ್ರರು ಅಡಗಿರುವ ಬಗ್ಗೆ ಭಾರತೀಯ ಯೋಧರಿಗೆ ಮಾಹಿತಿ ಸಿಕ್ಕಿತ್ತು. ಇದರ ಜಾಡು ಹಿಡಿದ ಯೋಧರು ಶುಕ್ರವಾರವೇ ಉಗ್ರರ ಅಡಗುತಾಣದ ಸಮೀಪ ಹೋಗಿದ್ದರು. ಆಗ ಸುಮಾರು ಮಧ್ಯರಾತ್ರಿ 2 ಗಂಟೆಯ ಸಮಯ. ಏಕಾಏಕಿ ದಾಳಿ ಮಾಡದ ಯೋಧರು ಮೊದಲಿಗೆ, ಶರಣಾಗುವಂತೆ ಉಗ್ರರಿಗೆ ತಿಳಿಸಿದರು. ಆದರೆ ಉಗ್ರರು ಈ ಮಾತನ್ನು ಕೇಳಲಿಲ್ಲ. ಬದಲಿಗೆ ಜೀವದಾನ ಮಾಡಲು ಬಂದ ಭಾರತೀಯ ಯೋಧರ ಮೇಲೆಯೇ ಗುಂಡಿನ ಚಕಮಕಿ ನಡೆಸಿದರು.

ಈ ಚಕಮಕಿಯು ನಸುಕಿನ 5 ಗಂಟೆವರೆಗೂ ಜಾರಿಯಲ್ಲಿತ್ತು. ಈ ಸಮಯದಲ್ಲಿ ಕೂಡ ಯೋಧರು ಉಗ್ರರನ್ನು ಹೊಡೆದುರುಳಿಸಲಿಲ್ಲ. ಬದಲಿಗೆ ಮೊದಲೇ ಮಾಡಿಕೊಂಡ ಯೋಜನೆಯಂತೆ ಈ ಉಗ್ರರ ಪಾಲಕರನ್ನು ಕರೆಯೊಯ್ದು ಶರಣಾಗುವಂತೆ ಮನವಿ ಮಾಡಿಕೊಳ್ಳಲಾಯಿತು. ಪಾಲಕರು ಶರಣಾಗುವಂತೆ ಹೇಳಿದರೂ ಉಗ್ರರು ಕೇಳಲಿಲ್ಲ. ಅವರ ಮನವೊಲಿಸಲು ಮಾಡಿದ ಪ್ರಯತ್ನಗಳು ವಿಫಲವಾದವು. ಅಷ್ಟೇ ಅಲ್ಲದೇ ಉಗ್ರರು ಪ್ರತಿ ದಾಳಿ ನಡೆಸಲು ಶುರು ಮಾಡಿದರು.

ಇದನ್ನೂ ಓದಿ: VIDEO: ಕರೊನಾ ಸ್ಯಾಂಪಲ್​ಗಳನ್ನೇ​ ಹೊತ್ತೊಯ್ದು ತಿಂದ ಮಂಗ! ವಿಡಿಯೋ ಆಗಿದೆ ಭಾರಿ ವೈರಲ್​

ಬೇರೆ ದಾರಿ ಕಾಣದ ಭಾರತೀಯ ಯೋಧರು ಎನ್​ಕೌಂಟರ್​ ಮಾಡಬೇಕಾಯಿತು. ಈ ಸಮಯದಲ್ಲಿ ಇಬ್ಬರು ಉಗ್ರರು ಹತರಾದರು ಎಂದು ಜಮ್ಮು ಮತ್ತು ಕಾಶ್ಮೀರದ ಇನ್ಸ್‌ಪೆಕ್ಟರ್‌ ಜನರಲ್‌ ವಿಜಯ್‌ ಕುಮಾರ್‌ ಹೇಳಿದ್ದಾರೆ. (ಏಜೆನ್ಸೀಸ್​)