ಪುತಿನ್ ಅವರ ದಾಳಿ ಯೂಕ್ರೇನ್ನಾದ್ಯಂತ ಅಪಾರ ಸಾವುನೋವು ಮತ್ತು ವಿನಾಶಕ್ಕೆ ಕಾರಣವಾಗಿದೆ. ವಿವೇಚನಾರಹಿತ ದಾಳಿಗಳು ಮತ್ತು ಉದ್ದೇಶಪೂರ್ವಕವಾಗಿ ನಾಗರಿಕರನ್ನೇ ಗುರಿಯಾಗಿಸಿಕೊಂಡು ನಡೆಸಿದ ದಾಳಿಗಳು ಮತ್ತು ದೌರ್ಜನ್ಯಗಳ ಕುರಿತು ಅನೇಕ ವಿಶ್ವಾಸಾರ್ಹ ವರದಿಗಳನ್ನು ನೋಡಿದ್ದೇವೆ. ರಷ್ಯಾದ ಪಡೆಗಳು ವಸತಿ ಸಮುಚ್ಛಯಗಳು, ಶಾಲೆಗಳು, ಆಸ್ಪತ್ರೆಗಳು, ಪ್ರಮುಖ ಮೂಲಸೌಕರ್ಯಗಳು, ನಾಗರಿಕ ವಾಹನಗಳು, ಶಾಪಿಂಗ್ಸೆಂಟರ್ಗಳು ಮತ್ತು ಆಂಬುಲೆನ್ಸ್ಗಳನ್ನು ನಾಶಮಾಡಿವೆ. ಇದರಲ್ಲಿ ಸಾವಿರಾರು ಅಮಾಯಕ ನಾಗರಿಕರು ಮೃತರಾಗಿದ್ದು, ಅನೇಕರು ಗಾಯಗೊಂಡಿದ್ದಾರೆ. ರಷ್ಯಾ ಪಡೆಗಳ ದಾಳಿಗೆ ತುತ್ತಾದ ಕಟ್ಟಡಗಳು ಜನಬಳಕೆಯಲ್ಲಿದ್ದವು ಎಂಬುದನ್ನು ಸ್ಪಷ್ಟವಾಗಿ ಗುರುತಿಸಬಹುದಾಗಿತ್ತು. ಮಾರಿಯುಪೊಲ್ನಲ್ಲಿನ ಹೆರಿಗೆ ಆಸ್ಪತ್ರೆ ಮತ್ತು ರಂಗಮಂದಿರದ ಹೊರಗಡೆ ಆಕಾಶದಿಂದಲೇ ಕಾಣುವಂತೆ ದೊಡ್ಡ ದೊಡ್ಡ ಅಕ್ಷರಗಳಲ್ಲಿ ರಷ್ಯನ್ ಭಾಷೆಯಲ್ಲೇ ಮಕ್ಕಳು ಎಂದು ಬರೆಯಲಾಗಿತ್ತು. ಪ್ರತಿದಿನ ರಷ್ಯಾ ನಡೆಸುತ್ತಿರುವ ಬರ್ಬರದಾಳಿಗೆ ಮಹಿಳೆಯರು ಮಕ್ಕಳೂ ಸೇರಿದಂತೆ ಅಮಾಯಕ ನಾಗರಿಕರು ಬಲಿಯಾಗುತ್ತಿದ್ದಾರೆ, ಗಾಯಗೊಂಡವರ ಸಂಖ್ಯೆಯೂ ಏರುತ್ತಿದೆ.
