ಈ ಜಗತ್ತಿನಲ್ಲಿ ಹೇಗೆ ಇರಬೇಕು? ಈ ಪ್ರಶ್ನೆಗೆ ಸಾಧು-ಸಂತರು, ಮಹಾತ್ಮರು, ಯತಿಶ್ರೇಷ್ಠರು ನಾನಾ ವಿಧದಲ್ಲಿ ತಿಳಿಸಿದ್ದಾರೆ. ದಾಸವರೇಣ್ಯರಂತೂ ‘ಇರಬೇಕು, ಇರದಿರಬೇಕು, ಸಂಸಾರಾದಿ ಜನಕಾದಿ ರಾಜ ಋಷಿಗಳಂತೆ’ ಎಂದೆಲ್ಲ ವಿವರಿಸಿದ್ದಾರೆ. ಮತ್ತೊಂದೆಡೆ ‘ಪಕ್ಷಿ ಅಂಗಳದಲ್ಲಿ ಬಂದು ಕೂತಂತೆ! ಆ ಕ್ಷಣದಲ್ಲಿ ಹಾರಿ ಹೋದಂತೆ...’ ಎಂದಿದ್ದಾರೆ. ನಿಜ! ಈ ಸಂಸಾರದಲ್ಲಿ ಹೇಗೆ ಇರಬೇಕು ಎಂಬುದರ ಅರಿವು ಬಂತೆಂದರೆ ಅವನೇ ಸುಖಿ! ಪ್ರತಿಯೊಬ್ಬರಿಗೂ ಸಂಸಾರದಲ್ಲಿರಬೇಕು, ಆನಂದ, ಸಂತೋಷ, ಸುಖ-ಭೋಗಗಳ ವರ್ತಲದಲ್ಲಿ ಸುತ್ತುತ್ತಲೇ ಇರಬೇಕು ಎಂಬಾಸೆ. ಇಂತಹ ಜನರಿಗೆ ಅತ್ಯಂತ ಸುಲಭವಾಗಿ, ಮನಸ್ಸಿಗೆ ಆಘಾತವಿಲ್ಲದೆ ಸರಳ ಉಪಾಯಗಳನ್ನು ಭಗವಾನ್ ಶ್ರೀ ರಾಮಕೃಷ್ಣ ಪರಮಹಂಸರು ತಮ್ಮ ವಚನವೇದದಲ್ಲಿ ಬಾರಿ ಬಾರಿಗೂ ತಿಳಿಯಪಡಿಸುತ್ತಾರೆ. ಸಂಸಾರದಲ್ಲಿರುವವರಿಗೆ ಭಗವಂತನ ಸಾಕ್ಷಾತ್ಕಾರ ದೊರೆಯುತ್ತದೆಯೇ? ಎಂಬ ಪ್ರಶ್ನೆಗೆ ಅವರ ಉತ್ತರವಿದು: ಏಕೆ ದೊರೆಯುವುದಿಲ್ಲ? ಕೆಸರು ಮೀನಿನ ಹಾಗೆ ಇರಿ.
