ಬೆಂಗಳೂರು: ಪರಿಸ್ಥಿತಿ ಸರಿಯಾಗಿದ್ದರೆ ಇವರೆಲ್ಲ ಎಸಿ ಕಚೇರಿಯಲ್ಲಿ ಕುಳಿತು ದುಡಿಯುತ್ತಿದ್ದರು, ವಾರಾಂತ್ಯದಲ್ಲಿ ಕುಟುಂಬದ ಜತೆ ಕಾಲಕಳೆಯುತ್ತಿದ್ದರು. ಆದರೆ ಕರೊನಾ ಇವರನ್ನು ಅಕ್ಷರಶಃ ಬೀದಿಗೆ ತಂದಿದೆ! ಅರ್ಥಾತ್ ಬಡವರು, ಕಾರ್ವಿುಕರು, ವಲಸಿಗರಿಗೆ ಆಹಾರ ಸಾಮಗ್ರಿ, ಊಟ ನೀಡುತ್ತಲೇ ಇವರೆಲ್ಲ ಉದ್ಯೋಗದ ಪ್ರತಿಷ್ಠೆ ಬಿಟ್ಟು ರಸ್ತೆಗಿಳಿದು ಮೂಟೆ ಹೊರುವ ಕಾಯಕ ಆರಂಭಿಸಿದ್ದಾರೆ. ದೂರದಲ್ಲೆಲ್ಲೋ ಇರುವ ಪಾಲಕರಿಗೆ ಅತ್ಯವಶ್ಯಕ ಔಷಧ ಬೇಕೆಂದು ಮಕ್ಕಳು ಕರೆ ಮಾಡಿದರೆ ಸಾಕು ಹಿಂದುಮುಂದು ನೋಡದೆ ಇವರೇ ಹೋಗಿ ಕೊಟ್ಟು ಬರುತ್ತಾರೆ, ವಲಸಿಗ ಕಾರ್ವಿುಕರ ಕಾಲನಿಗಳಿಗೆ ತೆರಳಿ ಊಟ, ನೀರು ಹಂಚುತ್ತಾರೆ. ಸುಮಾರು 10 ಸಾವಿರ ಐಟಿ, ಬಿಟಿ ಉದ್ಯೋಗಿಗಳು ರಾಜ್ಯ ಸರ್ಕಾರದ ಕರೊನಾ ಟಾಸ್ಕ್ ಫೋರ್ಸ್ಗೆ ಹೆಗಲುಕೊಟ್ಟು ಬಡವರು, ನಿರ್ಗತಿಕರಿಗಾಗಿ ದುಡಿಯುತ್ತಿದ್ದಾರೆ.
