Animal Behavior: ‘ಹುಲಿ ಹುಲ್ಲು ತಿನ್ನಲ್ಲ’ ಎನ್ನುವ ಮಾತಿದೆ. ಈ ಮಾಂಸಾಹಾರಿ ಪ್ರಾಣಿಗಳಾದ ಹುಲಿ, ನಾಯಿ ಮತ್ತು ಬೆಕ್ಕುಗಳು ಮಾಂಸ ಬಿಟ್ಟು ಹುಲ್ಲು ತಿನ್ನುವುದನ್ನು ಎಲ್ಲಾದರೂ ನೋಡಿದ್ದೀರಾ? 'ಇವೇನು ಮಾಂಸ ಬಿಟ್ಟು ಹುಲ್ಲು ಮೇಯ್ತಿವೆಯಲ್ಲಾ' ಅಂತ ನಿಮಗೂ ಅನಿಸಿರಬಹುದು. ಆದರೆ ಇವು ಹಸಿವಿಗಾಗಿ ಹುಲ್ಲು ತಿನ್ನಲ್ಲ, ಬದಲಿಗೆ ತಮ್ಮ ಆರೋಗ್ಯ ಕಾಪಾಡಿಕೊಳ್ಳೋಕೆ ತಿನ್ನುತ್ತವೆ.
ಹುಲ್ಲು ತಿನ್ನಲು ಪ್ರಮುಖ ಕಾರಣಗಳು ಇಲ್ಲಿವೆ ನೋಡಿ
1. ಹೊಟ್ಟೆ ಸ್ವಚ್ಛ ಮಾಡಿಕೊಳ್ಳಲು
ಮಾಂಸಾಹಾರಿ ಪ್ರಾಣಿಗಳು ಮಾಂಸ ತಿನ್ನುವಾಗ ಅದರ ಜತೆಗೆ ಪ್ರಾಣಿಗಳ ಕೂದಲು, ಗರಿ ಹಾಗೂ ಸಣ್ಣ ಸಣ್ಣ ಮೂಳೆಗಳು ಹೊಟ್ಟೆ ಸೇರುತ್ತವೆ. ಇವು ಸುಲಭವಾಗಿ ಜೀರ್ಣವಾಗುವುದಿಲ್ಲ. ಇಂತಹ ಸಮಯದಲ್ಲಿ ಇವು ಹುಲ್ಲನ್ನು ತಿಂದು ವಾಂತಿ ಮಾಡಿಕೊಳ್ಳುತ್ತವೆ. ಇದರಿಂದ ಹೊಟ್ಟೆಯಲ್ಲಿ ಸಿಲುಕಿಕೊಂಡಿದ್ದ ತ್ಯಾಜ್ಯವೆಲ್ಲ ಹೊರಬಂದು ಹೊಟ್ಟೆ ಕ್ಲೀನ್ ಆಗುತ್ತದೆ.
2. ಹೊಟ್ಟೆ ನೋವು ಅಥವಾ ಅಜೀರ್ಣ ನಿವಾರಣೆಗೆ
ಪ್ರಾಣಿಗಳಿಗೆ ಹೊಟ್ಟೆ ಉಬ್ಬರ, ಅಜೀರ್ಣ ಅಥವಾ ಹೊಟ್ಟೆ ನೋವು ಬಂದಾಗ ಅವು ನೈಸರ್ಗಿಕ ಔಷಧಿಯಂತೆ ಹುಲ್ಲನ್ನು ತಿನ್ನುತ್ತವೆ. ಹುಲ್ಲು ಅವುಗಳ ಜೀರ್ಣಾಂಗವ್ಯೂಹವನ್ನು ಉತ್ತೇಜಿಸಿ, ಆರಾಮ ಸಿಗುವಂತೆ ಮಾಡುತ್ತದೆ.
3. ಪೋಷಕಾಂಶಗಳ ಕೊರತೆ ನೀಗಿಸಲು
ಹುಲ್ಲಿನಲ್ಲಿ ನಾರು (Fibre) ಮತ್ತು ಕೆಲವೊಂದು ಅಗತ್ಯ ವಿಟಮಿನ್‌ಗಳು ಇರುತ್ತವೆ. ತಮ್ಮ ದೈನಂದಿನ ಆಹಾರದಲ್ಲಿ ಈ ಪೋಷಕಾಂಶಗಳ ಕೊರತೆ ಉಂಟಾದಾಗ ಪ್ರಾಣಿಗಳು ಹುಲ್ಲನ್ನು ತಿನ್ನುತ್ತವೆ.
