ರೈಲ್ವೇ ಪ್ಯಾಂಟ್ರಿಯಲ್ಲಿ ಆಹಾರದ ಮೇಲೆ ಇಲಿಗಳನ್ನು ನೋಡಿ 'ಅಸಹ್ಯ'ಪಟ್ಟುಕೊಂಡ ಪ್ರಯಾಣಿಕರು; ವಿಡಿಯೋ ವೈರಲ್

ನವದೆಹಲಿ: ಪ್ರಯಾಣಿಕರು ಪದೇ ಪದೇ ದೂರು ನೀಡುವುದರಿಂದ ಭಾರತೀಯ ರೈಲ್ವೇಯಲ್ಲಿ ಆಹಾರದ ಗುಣಮಟ್ಟದ ಬಗ್ಗೆ ಯಾವಾಗಲೂ ಚರ್ಚೆ ನಡೆಯುತ್ತದೆ. ಆದರೂ ಗುಣಮಟ್ಟದಲ್ಲಿ ಹೆಚ್ಚಿನ ಬದಲಾವಣೆ ಕಾಣುತ್ತಿಲ್ಲ. ಆಹಾರದಲ್ಲಷ್ಟೇ ಅಲ್ಲ, ರೈಲ್ವೆ ಪ್ಯಾಂಟ್ರಿಗಳಲ್ಲೂ ಗುಣಮಟ್ಟ ಕಾಯ್ದುಕೊಂಡಿಲ್ಲ. ಇದೀಗ ರೈಲ್ವೆ ಪ್ಯಾಂಟ್ರಿಯಲ್ಲಿ ಇಲಿಗಳು ಓಡಾಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಹೌದು, ಪ್ಯಾಂಟ್ರಿಯಲ್ಲಿದ್ದ ಆಹಾರ ಪದಾರ್ಥಗಳ ಮೇಲೆ ಇಲಿಗಳು ಓಡಾಡುತ್ತಿರುವುದನ್ನು ನೀವು ನೋಡಬಹುದು. ಇದನ್ನು ಪ್ರಯಾಣಿಕರೊಬ್ಬರು ವಿಡಿಯೋ ಮಾಡಿ ಪೋಸ್ಟ್ ಮಾಡಿದ್ದಾರೆ. ಅಕ್ಟೋಬರ್ 15 ರಂದು ರೈಲಿನಲ್ಲಿ ಪ್ರಯಾಣಿಸುವಾಗ ಈ ವಿಡಿಯೋ ತೆಗೆಯಲಾಗಿದೆ ಎಂದು ಹೇಳಲಾಗಿದೆ. ಇಂತಹ ಘಟನೆಗಳನ್ನು ನೋಡಿ ರೈಲ್ವೆ ಗೌರವ ಕಳೆದುಕೊಳ್ಳುತ್ತಿದೆ ಎಂದು ಅಸಹನೆ ವ್ಯಕ್ತಪಡಿಸಲಾಗಿದೆ. ರೈಲು ಪ್ರಯಾಣದ ಮೇಲಿನ ಪ್ರೀತಿಯಿಂದ ವಿಡಿಯೋ ತೆಗೆಯುವಾಗ ಈ ರೀತಿಯ ಇಲಿಗಳು ಕಂಡವು ಎಂದು ಮಂಗಿರೀಶ್ ತೆಂಡೂಲ್ಕರ್ ಹೆಸರಿನ ಇನ್​ಸ್ಟಾಗ್ರಾಂ ಖಾತೆಯಿಂದ ಪೋಸ್ಟ್ ಮಾಡಲಾಗಿದೆ.

"ನಾನು ಯಾವಾಗಲೂ ರೈಲಿನಲ್ಲಿ ಪ್ರಯಾಣಿಸುತ್ತೇನೆ. ನನಗೆ ರೈಲು ಪ್ರಯಾಣವೆಂದರೆ ಇಷ್ಟ. ಆದರೆ ಈಗ ನಡೆದಿರುವ ಘಟನೆ ನನ್ನನ್ನು ತುಂಬಾ ನೋವುಂಟು ಮಾಡಿದೆ. ಅಕ್ಟೋಬರ್ 15 ರಂದು ನಾನು ರೈಲಿನಲ್ಲಿ ಪ್ರಯಾಣಿಸುವಾಗ ವಿಡಿಯೋ ತೆಗೆಯಲು ಬಯಸಿದ್ದೆ. ನಾನು ಎಲ್ಲೆಡೆ ಶೂಟಿಂಗ್ ಮಾಡುವಾಗ ಪ್ಯಾಂಟ್ರಿಯಲ್ಲಿ ಇಲಿಗಳು ಕಂಡುಬಂದವು. ಸುಮಾರು 6-7 ಇಲಿಗಳು ಅಲ್ಲಿ ಆಹಾರವನ್ನು ತಿನ್ನುತ್ತಿದ್ದವು. ಆಹಾರ ಪದಾರ್ಥಗಳನ್ನು ತೆಗೆದು ತೆಗೆದು ನೋಡುತ್ತಿದ್ದವು'' ಎಂದು ಪೋಸ್ಟ್ ಮಾಡಿದ್ದಾರೆ.

ಸ್ಪಂದಿಸದ ಸಿಬ್ಬಂದಿ..

ಮೊದಲಿಗೆ ಇದಕ್ಕೆ ಸಂಬಂಧಿಸಿದವರಿಗೆ ಮಂಗಿರೀಶ್ ತೆಂಡೂಲ್ಕರ್ ದೂರು ನೀಡಿದಾಗ ಅವರ ಉತ್ತರ ಅಸಹನೆ ಮೂಡಿಸಿದೆ. ಆ ನಂತರ IRCTC ಪ್ರತಿಕ್ರಿಯಿಸಿ, ಈ ಘಟನೆಯನ್ನು ಗಂಭೀರವಾಗಿ ಪರಿಗಣಿಸುವುದಾಗಿ ಭರವಸೆ ನೀಡಿದ್ದಾರೆ. ಪ್ಯಾಂಟ್ರಿ ಸ್ವಚ್ಛವಾಗಿಡುವುದು ತಮ್ಮ ಜವಾಬ್ದಾರಿ ಎಂದು ಸ್ಪಷ್ಟಪಡಿಸಿದ್ದಾರೆ. ಅಷ್ಟೇ ಅಲ್ಲ, ಮುಂದೆ ಇಂತಹ ಘಟನೆಗಳು ಮರುಕಳಿಸದಂತೆ ಕ್ರಮಕೈಗೊಳ್ಳಲಾಗುವುದು ಎಂದು ಹೇಳಿದ್ದಾರೆ.

https://www.vijayavani.net/man-dies-of-heart-attack-during-staging-of-ramlila-in-garhwa