ಟ್ರಂಪ್ ಮಾತುಕತೆ ಪ್ರಸ್ತಾಪವನ್ನು ತಿರಸ್ಕರಿಸಿದ ಇರಾನ್​: ಅಮೆರಿಕ ನಮ್ಮ ಪರಮಾಣು ಸ್ಥಾವರಗಳನ್ನು ನಾಶಪಡಿಸಿಲ್ಲ ಎಂದ ಸರ್ವೋಚ್ಚ ನಾಯಕ Ayatollah Ali Khamenei

ಟೆಹ್ರಾನ್: ಇರಾನ್‌ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ(Ayatollah Ali Khamenei) ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್​ರ ಹೊಸ ಮಾತುಕತೆಯ ಪ್ರಸ್ತಾಪವನ್ನು ಸೋಮವಾರ (ಅಕ್ಟೋಬರ್, 20) ತಿರಸ್ಕರಿಸಿದ್ದಾರೆ. ಅಲ್ಲದೆ, ಅಮೆರಿಕವು ನಮ್ಮ ಪರಮಾಣು ಸಾಮರ್ಥ್ಯಗಳನ್ನು ನಾಶಪಡಿಸಿದೆ ಎಂಬ ಟ್ರಂಪ್​ ಹೇಳಿಕೆಯನ್ನು ನಿರಾಕರಿಸಿದ್ದಾರೆ.

ಈ ಬಗ್ಗೆ ಮಾತನಾಡಿರುವ ಖಮೇನಿ, ಟ್ರಂಪ್ ತಾವು ಡೀಲ್‌ಮೇಕರ್ ಎಂದು ಹೇಳುತ್ತಾರೆ. ಆದರೆ ಒಂದು ಒಪ್ಪಂದವು ಬಲವಂತದಿಂದ ಕೂಡಿದ್ದರೆ ಮತ್ತು ಅದರ ಫಲಿತಾಂಶವು ಪೂರ್ವನಿರ್ಧರಿತವಾಗಿದ್ದರೆ, ಅದು ಒಪ್ಪಂದವಲ್ಲ, ಬದಲಿಗೆ ಹೇರಿಕೆ ಮತ್ತು ಬೆದರಿಸುವಿಕೆಯಾಗಿದೆ ಎಂದು ಕಿಡಿಕಾರಿದ್ದಾರೆ.

ಇರಾನ್​ ಪರಮಾಣು ಕೇಂದ್ರಗಳ ಬಗ್ಗೆ ಕಳೆದ ವಾರ ​ಇಸ್ರೇಲಿ ಸಂಸತ್ತಿನಲ್ಲಿ ಮಾತನಾಡಿದ್ದ ಟ್ರಂಪ್, ಇಸ್ರೇಲ್ ಮತ್ತು ಪ್ಯಾಲೆಸ್ಟೀನಿಯನ್ ಉಗ್ರಗಾಮಿ ಗುಂಪು ಹಮಾಸ್ ನಡುವೆ ಗಾಜಾದಲ್ಲಿ ಕದನ ವಿರಾಮ ಪ್ರಾರಂಭವಾದ ನಂತರ, ಅಮೆರಿಕವು ಟೆಹ್ರಾನ್ ಜೊತೆ ಶಾಂತಿ ಒಪ್ಪಂದ ಮಾಡಿಕೊಳ್ಳಲು ಸಾಧ್ಯವಾದರೆ ಉತ್ತಮವಾಗಿರುತ್ತದೆ ಎಂದು ಹೇಳಿದ್ದರು.

ಇದನ್ನೂ ಓದಿ: ಖಾಲಿಸ್ತಾನ್ ಸಮಸ್ಯೆಗೆ ಕೆನಡಿಯನ್ನರು ಕಾರಣ, ಭಾರತವನ್ನು ದೂಷಿಸಲು ಸಾಧ್ಯವಿಲ್ಲ: ಕೆನಡಾದ ಭಾರತೀಯ ರಾಯಭಾರಿ Dinesh Patnaik

ಅಮೆರಿಕದ ಅಧ್ಯಕ್ಷ ಟ್ರಂಪ್​ ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ. ಇರಾನ್‌ನ ಪರಮಾಣು ಉದ್ಯಮದ ಮೇಲೆ ಬಾಂಬ್ ದಾಳಿ ಮಾಡಿ ನಾಶಪಡಿಸಿದರು. ಸರಿ, ಕನಸು ಕಾಣುತ್ತಲೇ ಇರಿ ಎಂದು ಖಮೇನಿ ತಿಳಿಸಿದ್ದಾರೆ. ಇರಾನ್ ಪರಮಾಣು ಸೌಲಭ್ಯಗಳನ್ನು ಹೊಂದಿದ್ದರೂ ಅಥವಾ ಇಲ್ಲದಿದ್ದರೂ ಅಮೆರಿಕಕ್ಕೂ ಇದಕ್ಕೂ ಏನು ಸಂಬಂಧವಿಲ್ಲ. ಈ ಹಸ್ತಕ್ಷೇಪಗಳು ತಪ್ಪು ಮತ್ತು ಬಲವಂತವಾಗಿದೆ ಎಂದು ವಾಗ್ದಾಳಿ ನಡೆಸಿದ್ದಾರೆ.

ಯುರೇನಿಯಂ ಮೂಲಕ ಇರಾನ್ ರಹಸ್ಯವಾಗಿ ಪರಮಾಣು ಬಾಂಬ್ ಅಭಿವೃದ್ಧಿಪಡಿಸಲು ಪ್ರಯತ್ನಿಸುತ್ತಿದೆ ಎಂದು ಪಾಶ್ಚಿಮಾತ್ಯ ಶಕ್ತಿಗಳು ಆರೋಪಿಸುತ್ತವೆ. ಅಲ್ಲದೆ, ಇಂತಹ ಚಟುವಟಿಕೆಯನ್ನು ನಿಲ್ಲಿಸಬೇಕೆಂದು ಬಯಸುತ್ತವೆ. ಅದರೆ, ಈ ಆರೋಪವನ್ನು ಇರಾನ್​ ನಿರಾಕರಿಸುತ್ತದೆ. ಈ ಕಾರ್ಯಕ್ರಮವು ಕೇವಲ ನಾಗರಿಕ ಇಂಧನ ಉದ್ದೇಶಗಳನ್ನು ಹೊಂದಿದೆ ಎಂದು ಹೇಳಿದ್ದಾರೆ. (ಏಜೆನ್ಸೀಸ್​)

https://www.vijayavani.net/india-on-verge-of-eradicating-naxal-terrorism-pm-modi