ಗುರುಗಳ ಹಾದಿಯಲ್ಲೇ ನಡೆಯುವೆವು; ಮಹಾರಾಧನೆ ಬಳಿಕ ವೃಂದಾವನ ನಿರ್ಮಾಣ ಸ್ವರೂಪ ತೀರ್ಮಾನ

• ಗುರುಗಳ ವೃಂದಾವನ ನಿರ್ಮಾಣ ಬಗ್ಗೆ ಏನು ತೀರ್ಮಾನಗಳಾಗಿವೆ?

ಮಹಾರಾಧನೆ ಬಳಿಕ ವೃಂದಾವನ ನಿರ್ಮಾಣ ಸ್ವರೂಪ, ವಿನ್ಯಾಸಗಳ ಬಗ್ಗೆ ಸಂಬಂಧಪಟ್ಟವರ ಜತೆ ರ್ಚಚಿಸಿ ತೀರ್ಮಾನಿಸುತ್ತೇವೆ. 1 ವರ್ಷ ಕಾಲಾವಕಾಶವಿದೆ. ಅಷ್ಟರವರೆಗೆ ತುಳಸಿ ವೃಂದಾವನದಲ್ಲಿ ನಿತ್ಯ ತೀರ್ಥ, ಹಸ್ತೋದಕ ನೀಡಲಾಗುತ್ತದೆ. ಮಂತ್ರ ಪಠನೆ, ಪಾರಾಯಣ, ಭಜನೆ, ವಿದ್ವಾಂಸರ ಗೋಷ್ಠಿ ನಡೆಯಲಿವೆ.

• ಪೇಜಾವರ ಶ್ರೀಗಳು ತಮ್ಮ ಗುರುಗಳಾದ ವಿದ್ಯಾಮಾನ್ಯರ ಮೃತ್ತಿಕಾ ವೃಂದಾವನವೂ ವಿದ್ಯಾಪೀಠದಲ್ಲಿರಬೇಕು ಎಂದು ಬಯಸಿದ್ದರು. ಈ ಬಗ್ಗೆ ಏನಾದರೂ ಕ್ರಮವಾಗಿದೆಯೇ?

ಗುರುಗಳ ವೃಂದಾವನದ ಮುಂಭಾಗದಲ್ಲೇ ವಿದ್ಯಾಮಾನ್ಯ ತೀರ್ಥರ ಮೃತ್ತಿಕಾ ವೃಂದಾವನ ನಿರ್ಮಾಣ ಮಾಡಲಾಗುವುದು. ವಾರ್ಷಿಕ ಆರಾಧನೆ ಸಂದರ್ಭದಲ್ಲಿ ಇಬ್ಬರ ಶಿಲಾವೃಂದಾವನವನ್ನೂ ಸ್ಥಾಪಿಸಲಾಗುವುದು.

• ರಾಮಮಂದಿರ ನಿರ್ಮಾಣ ಶ್ರೀಗಳ ಕನಸಾಗಿತ್ತು. ಕೇಂದ್ರ ಸರ್ಕಾರ ರಚಿಸುವ ಟ್ರಸ್ಟ್ ನಲ್ಲಿ ನಿಮ್ಮ ಪಾತ್ರವೇನಾದರೂ ಇರುತ್ತದೆಯೇ?

ಈ ಬಗ್ಗೆ ಖಚಿತ ಮಾಹಿತಿಗಳಿಲ್ಲ. ಆದರೆ ಶ್ರೀಗಳು ರಾಮಜನ್ಮಭೂಮಿ ಚಳವಳಿಯಲ್ಲಿ ಸಂಪೂರ್ಣವಾಗಿ ತೊಡಗಿಸಿಕೊಂಡಿದ್ದರು. ಗುರುಗಳು ಹಾಕಿಕೊಟ್ಟ ಹಾದಿಯಲ್ಲೇ ನಾವು ಮುನ್ನಡೆಯುತ್ತೇವೆ.

• ಗುರುಗಳ ಅಪೂರ್ಣ ಕಾರ್ಯಯೋಜನೆ ಪೂರ್ಣಗೊಳಿಸುವಲ್ಲಿ ಹೇಗೆ ಮುಂದುವರಿಯುತ್ತೀರಿ?

ಶ್ರೀಗಳ ಅಪೂರ್ಣ ಕಾರ್ಯಯೋಜನೆಗಳು ಅಂತೇನಿಲ್ಲ. ಪೂರ್ಣಪ್ರಜ್ಙ ವಿದ್ಯಾಪೀಠ, ಪಾಜಕ ಅನಂದ ತೀರ್ಥ ವಿದ್ಯಾಲಯ, ಮೈಸೂರಿನ ವಿದ್ಯಾರ್ಥಿ ನಿಲಯ, ಬೆಂಗಳೂರು ಸೇವಾಶ್ರಮ ಮೊದಲಾದ ಸಂಸ್ಥೆಗಳನ್ನು ಚೆನ್ನಾಗಿ ಮುನ್ನಡೆಸುವಂತೆ ಸೂಚಿಸಿದ್ದರು. ಈ ಬಗ್ಗೆ ವಿಶೇಷ ಗಮನ ಹರಿಸಲಾಗುವುದು.

• ಪೇಜಾವರ ಮಠದ ಉತ್ತರಾಧಿಕಾರಿಯಾಗಿ ಭಕ್ತರಿಗೆ ನೀಡುವ ಸಂದೇಶ....

ಗುರುಗಳು ಹರಿಪಾದ ಸೇರಿ ಒಂದು ದಿನ ಕಳೆದಿದೆ. ಅನಾರೋಗ್ಯ, ಪ್ರಕೃತಿ ವಿಕೋಪ, ಬರಗಾಲ ಸಮಯದಲ್ಲಿ ಅವರು ದುಡಿದಿದ್ದಾರೆ. ಹೀಗಾಗಿ ಎಲ್ಲರೂ ಸೇರಿ ಗುರುಗಳ ಪಾರ್ಥಿವ ಶರೀರಕ್ಕೆ ಅಂತ್ಯಸಂಸ್ಕಾರ ನಡೆಸಿದ್ದಾರೆ. ಸರ್ಕಾರ ಕುಶಾಲುತೋಪು ಒಳಗೊಂಡ ಗೌರವ ನೀಡಿದೆ. ಇದರ ಬಗ್ಗೆ ಹೆಮ್ಮೆಪಡುತ್ತೇವೆ. ಸರ್ಕಾರ, ಅಧಿಕಾರಿಗಳನ್ನು ನಾವು ಅಭಿನಂದಿಸುತ್ತೇವೆ. ಶ್ರೀಗಳನ್ನು ಅನುಸರಿಸುವ ನಿಟ್ಟಿನಲ್ಲಿ ಕಾರ್ಯತತ್ಪರರಾಗಲಿದ್ದೇವೆ. ಎಲ್ಲರ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ.

• ಗುರುಗಳ ಚರಮಶ್ಲೋಕದ ರಚನೆ ಸಂದರ್ಭ ನಿಮ್ಮಲ್ಲಿದ್ದ ಭಾವನೆ?

ಶ್ರೀಗಳನ್ನು ಸದಾಕಾಲ ನೆನಪು ಮಾಡಿಕೊಳ್ಳುವ ಉದ್ದೇಶದಿಂದ ಈ ಶ್ಲೋಕ ರಚಿಸಲಾಗಿದೆ. ಇದನ್ನು ನಿತ್ಯ ಪಠಿಸುವುದರಿಂದ ಗುರುಗಳ ಹಾದಿಯಲ್ಲಿ ಸಾಗಲು ಸ್ಪೂರ್ತಿ ಲಭಿಸಲಿದೆ.

| ಗೋಪಾಲಕೃಷ್ಣ ಪಾದೂರು ಬೆಂಗಳೂರು