ಕೊಲೆ ರಹಸ್ಯ ಭೇದಿಸಿದ ಬರಿಗಣ್ಣಿಗೆ ಕಾಣದ ಪರಾಗರೇಣು: ವೈಜ್ಞಾನಿಕ ಜಗತ್ತನ್ನೇ ಅಚ್ಚರಿಗೊಳಿಸಿದ ಶಾಕಿಂಗ್​ ಸಂಗತಿ ಇದು! Flower Pollen

Flower Pollen :  ಅಪರಾಧಿಗಳನ್ನು ಸೆರೆಹಿಡಿಯಲು ರಕ್ತದ ಕಲೆಗಳು, ಬೆರಳಚ್ಚುಗಳು ಹಾಗೂ ಮಾರಕಾಸ್ತ್ರಗಳು ಸಾಮಾನ್ಯ ಸಾಕ್ಷ್ಯಗಳಾದರೆ, ಬರಿಗಣ್ಣಿಗೆ ಕಾಣಿಸದ ಸಣ್ಣ 'ಪರಾಗರೇಣುಗಳು' (Pollen) ಕೊಲೆ ಪ್ರಕರಣವೊಂದರ ಮರ್ಮ ಭೇದಿಸಿದ ರೋಚಕ ಘಟನೆ ಈ ಹಿಂದೆ ನ್ಯೂಜಿಲ್ಯಾಂಡ್‌ನಲ್ಲಿ ನಡೆದಿತ್ತು.  

ಹೌದು, 2008ರಲ್ಲಿ ಕ್ರೈಸ್ಟ್‌ಚರ್ಚ್‌ನಲ್ಲಿ ಮೆಲ್ಲೊರಿ ಮ್ಯಾನಿಂಗ್ ಎಂಬ 27 ವರ್ಷದ ಯುವತಿಯ ಭೀಕರ ಕೊಲೆಯಾಗಿದ್ದಾಗ, ಆಕೆಯ ಹತ್ಯೆ ಎಲ್ಲಿ ನಡೆಯಿತು ಎಂಬುದೇ ತಿಳಿಯದೆ ತಿಂಗಳುಗಟ್ಟಲೆ ತಲೆ ಚಚ್ಚಿಕೊಳ್ಳುತ್ತಿದ್ದ ಪೊಲೀಸರಿಗೆ ಆಕೆಯ ಮೂಗು ಮತ್ತು ಉಡುಪಿನ ಮೇಲಿದ್ದ ಪರಾಗರೇಣುಗಳೇ ದಾರಿದೀಪವಾದವು. ಪ್ರತಿಯೊಂದು ಅಪರಾಧದ ಸ್ಥಳದಲ್ಲೂ ತಪ್ಪಿತಸ್ಥರನ್ನು ಹಿಡಿದುಕೊಡಲು ಕನಿಷ್ಠ ಒಂದು ಸಾಕ್ಷಿಯಾದರೂ ಇದ್ದೇ ಇರುತ್ತದೆ ಎಂಬುದನ್ನು ನಿರೂಪಿಸಿದ ಈ ಅಚ್ಚರಿಯ ಘಟನೆ, ಅಪರಾಧ ತನಿಖಾರಂಗದಲ್ಲಿ ಸಸ್ಯಶಾಸ್ತ್ರದ ಮಹತ್ವವನ್ನು ಇಡೀ ಜಗತ್ತಿಗೆ ಸಾರಿದೆ.

ತನಿಖಾ ತಂಡವು ಬರಿಗಣ್ಣಿಗೆ ಸರಿಯಾಗಿ ಕಾಣಿಸದ ಈ ಪರಾಗರೇಣುಗಳನ್ನು ವಿಧಿವಿಜ್ಞಾನ ಪರಾಗತಜ್ಞರಾದ (Forensic Palynologist) ಡಲ್ಲಾಸ್ ಮಿಲ್ಡೆನ್‌ಹಾಲ್ ಅವರಿಗೆ ಹಸ್ತಾಂತರಿಸಿತು. ಮ್ಯಾನಿಂಗ್ ದೇಹದ ಮೇಲಿದ್ದ ಪರಾಗಗಳನ್ನು ಕೂಲಂಕುಷವಾಗಿ ಪರೀಕ್ಷಿಸಿದಾಗ, ಕಳೆನಾಶಕಗಳ ಬಳಕೆಯಿಂದಾಗಿ ತಳೀಯ ಬದಲಾವಣೆಗೊಂಡು ಒಂದಕ್ಕಿಂತ ಹೆಚ್ಚು ರಂಧ್ರಗಳನ್ನು ಹೊಂದಿದ್ದ ಅತ್ಯಂತ ಅಪರೂಪದ ಪರಾಗ ರೇಣುಗಳು ಕಂಡುಬಂದವು. ಕೊಲೆಯ ಶಂಕೆಯಿದ್ದ 'ಮಾಂಗ್ರೆಲ್ ಮಾಬ್' ಗ್ಯಾಂಗ್‌ನ ಅಡಗುತಾಣವಾದ ಗೋದಾಮಿನಲ್ಲಿ ನಡೆಸಿದ ಪರೀಕ್ಷೆಯಲ್ಲೂ ಇಂತಹದ್ದೇ ಪರಾಗಗಳು ಸಿಕ್ಕಿದವು. ಆದರೂ, ತನಿಖಾ ತಂಡಕ್ಕೆ ತಕ್ಷಣಕ್ಕೆ ಯಾವುದೇ ಸ್ಪಷ್ಟ ಸುಳಿವು ಸಿಗಲಿಲ್ಲ.

ಮಿಲ್ಡೆನ್‌ಹಾಲ್ ಅವರು ಗೋದಾಮಿನ ಪರಿಸರದಿಂದ ಸಂಗ್ರಹಿಸಿದ ಪರಾಗಗಳ ಕುರಿತು ಅಧ್ಯಯನ ನಡೆಸಿದಾಗ, ಕಳೆದ ವರ್ಷವಷ್ಟೇ ಆ ಜಾಗದಲ್ಲಿ ಕಳೆನಾಶಕ ಸಿಂಪಡಿಸಲಾಗಿತ್ತು ಎಂಬ ಸತ್ಯ ಬಯಲಾಗಿ ಗ್ಯಾಂಗ್‌ನ ಸದಸ್ಯರನ್ನು ತೀವ್ರ ವಿಚಾರಣೆಗೆ ಒಳಪಡಿಸಲಾಯಿತು. ಅಂತಿಮವಾಗಿ ವರ್ಷಗಳ ಸುದೀರ್ಘ ತನಿಖೆಯ ನಂತರ, 2014 ರಲ್ಲಿ ಕೋರ್ಟ್ ಈ ಗ್ಯಾಂಗ್‌ನ ಸದಸ್ಯ ಮಹುಆ ಹುವಾತಕಿ ಫಾಸೆಟ್ ಎಂಬಾತನನ್ನು ತಪ್ಪಿತಸ್ಥನೆಂದು ಘೋಷಿಸಿ ಶಿಕ್ಷೆ ವಿಧಿಸಿತು. 

ಹೂವುಗಳನ್ನು ಬಿಡಿಸುವಾಗ ಕೈಗೆ ಅಂಟಿಕೊಳ್ಳುವ ಹಳದಿ ಬಣ್ಣದ ವಸ್ತುವೇ ಈ 'ಪರಾಗ'ವಾಗಿದ್ದು, ಇದು ಸಸ್ಯಗಳ ಸಂತಾನೋತ್ಪತ್ತಿಗೆ ಮತ್ತು ಜಗತ್ತಿನ ಆಹಾರ ಉತ್ಪಾದನೆಗೆ ಅತ್ಯಗತ್ಯವಾದ ನೈಸರ್ಗಿಕ ಪ್ರಕ್ರಿಯೆಯಾಗಿದೆ. ಹೂಬಿಡುವ ಸಸ್ಯಗಳು ಫಲವತ್ತತೆಯನ್ನು ಪಡೆಯಲು ದೊಡ್ಡ ಪ್ರಮಾಣದಲ್ಲಿ ಈ ಪರಾಗರೇಣುಗಳನ್ನು ಗಾಳಿಯಲ್ಲಿ ಪಸರಿಸುತ್ತವೆ.

ಗಾಳಿಯ ಮೂಲಕ ಹರಿದುಬರುವ ಲಕ್ಷಾಂತರ ಪರಾಗರೇಣುಗಳು ನೆಲಕ್ಕೆ ಬಿದ್ದು ‘ಪರಾಗ ಮಳೆ’ (Pollen rain) ಸೃಷ್ಟಿಸುವುದಲ್ಲದೆ, ನದಿ ಹಾಗೂ ಭೂಮಿಯ ಮೇಲ್ಮೈಯನ್ನು ಹಳದಿ ಮಯವಾಗಿಸಿ ಆಯಾ ಪ್ರದೇಶಕ್ಕೆ ನಿರ್ದಿಷ್ಟವಾದ ‘ಪರಾಗ ಮುದ್ರೆ’ ರೂಪಿಸುತ್ತವೆ. ಮ್ಯಾನಿಂಗ್ ಕೊಲೆ ಪ್ರಕರಣದಲ್ಲೂ ಮೈಕ್ರೋಸ್ಕೋಪ್ ಮೂಲಕ ಮಾತ್ರ ನೋಡಬಹುದಾದ ಈ ಪರಾಗ ಮುದ್ರೆಯೇ ತನಿಖೆಗೆ ಬಹುದೊಡ್ಡ ತಿರುವು ನೀಡಿತು. 

ಕೆಲವರಿಗೆ ಅಲರ್ಜಿ ಉಂಟುಮಾಡುವ ಈ ಸೂಕ್ಷ್ಮ ರೇಣುಗಳು, ಅಪರಾಧ ವಿಜ್ಞಾನಿಗಳಿಗೆ ಕೊಲೆಗಾರರನ್ನು ಹಿಡಿಯುವ ಪ್ರಬಲ ಸಾಕ್ಷ್ಯವಾಗಿದ್ದು, 1959 ರಲ್ಲಿ ಆಸ್ಟ್ರೇಲಿಯಾದಲ್ಲಿ ಪ್ರಥಮ ಬಾರಿಗೆ ಇಂತಹ ತಂತ್ರಜ್ಞಾನ ಬಳಸಿ ಕೊಲೆ ಪ್ರಕರಣವೊಂದನ್ನು ಭೇದಿಸಲಾಗಿತ್ತು. ದಶಕಗಳಿಂದ ನ್ಯೂಜಿಲ್ಯಾಂಡ್‌ನಲ್ಲಿ ಪ್ರಚಲಿತದಲ್ಲಿರುವ ಈ 'ಫೋರೆನ್ಸಿಕ್ ಪಾಲಿನಾಲಜಿ' ವಿಧಾನವು, ಇಂದು ಯುಕೆ, ಕೆನಡಾ ಮತ್ತು ಅಮೆರಿಕದಂತಹ ದೇಶಗಳಲ್ಲೂ ಅಪರಾಧ ತನಿಖೆಯಲ್ಲಿ ವ್ಯಾಪಕವಾಗಿ ಬಳಕೆಯಾಗುತ್ತಿದೆ.

2008ರ ಡಿಸೆಂಬರ್‌ನಲ್ಲಿ ನ್ಯೂಜಿಲ್ಯಾಂಡ್‌ನ ಕ್ರೈಸ್ಟ್‌ಚರ್ಚ್‌ನಲ್ಲಿ ನಡೆದ 27 ವರ್ಷದ ಮೆಲ್ಲೋರಿ ಮ್ಯಾನಿಂಗ್‌ ಕೊಲೆ ಪ್ರಕರಣವು ಅಪರಾಧ ತನಿಖಾ ಇತಿಹಾಸದಲ್ಲೇ ಅತ್ಯಂತ ಅಪರೂಪದ ಹಾಗೂ ರೋಚಕ ಪ್ರಕರಣಗಳಲ್ಲಿ ಒಂದಾಗಿದೆ. ಲೈಂಗಿಕ ಕಾರ್ಯಕರ್ತೆಯಾಗಿದ್ದ ಮ್ಯಾನಿಂಗ್ ಅವರನ್ನು ಭೀಕರವಾಗಿ ಹತ್ಯೆ ಮಾಡಿ ಆವೋನ್ ನದಿಗೆ ಎಸೆಯಲಾಗಿತ್ತು, ಆದರೆ ಕೊಲೆ ನಡೆದ ನೈಜ ಸ್ಥಳ ಯಾವುದೆಂದು ತಿಳಿಯದೆ ಪೊಲೀಸರು ಕತ್ತಲಲ್ಲಿ ತಡಕಾಡುತ್ತಿದ್ದರು. ಈ ಹಂತದಲ್ಲಿ ವಿಧಿವಿಜ್ಞಾನ ಪರಾಗತಜ್ಞ ಡಲ್ಲಾಸ್ ಮಿಲ್ಡೆನ್‌ಹಾಲ್ ಅವರು ಮ್ಯಾನಿಂಗ್ ದೇಹ ಹಾಗೂ ಉಡುಪಿನ ಮೇಲಿದ್ದ ಸೂಕ್ಷ್ಮ ಪರಾಗರೇಣುಗಳನ್ನು ಪರೀಕ್ಷಿಸಿದಾಗ, ಕಳೆನಾಶಕದಿಂದ ತಳೀಯ ಬದಲಾವಣೆ ಹೊಂದಿದ್ದ ಅಪರೂಪದ ಪರಾಗಗಳು ಪತ್ತೆಯಾದವು. ಈ ನಿರ್ದಿಷ್ಟ 'ಪರಾಗ ಮುದ್ರೆ'ಯನ್ನು ಬೆನ್ನಟ್ಟಿದ ತನಿಖಾ ತಂಡವು 'ಮಾಂಗ್ರೆಲ್ ಮಾಬ್' ಗ್ಯಾಂಗ್‌ನ ಅಡಗುತಾಣವೇ ಕೊಲೆ ನಡೆದ ಸ್ಥಳವೆಂದು ಸಾಬೀತುಪಡಿಸಿ, ಸುದೀರ್ಘ ವಿಚಾರಣೆಯ ನಂತರ 2014 ರಲ್ಲಿ ಅಪರಾಧಿ ಮಹುಆ ಹುವಾತಕಿ ಫಾಸೆಟ್‌ಗೆ ಶಿಕ್ಷೆಯಾಗುವಂತೆ ಮಾಡುವಲ್ಲಿ ಯಶಸ್ವಿಯಾಯಿತು, (ಏಜೆನ್ಸೀಸ್​).