180ಕ್ಕೂ ಹೆಚ್ಚು ಪ್ರಯಾಣಿಕರ ಜೀವ ಉಳಿಸಿದ ಕ್ಯಾಪ್ಟನ್ ಈಗ ಹೇಗಿದ್ದಾರೆ? ಸ್ಮಿತ್​ ಮಚ್ಚಾರ್​ ಆರೋಗ್ಯ ಸ್ಥಿತಿ ಬಗ್ಗೆ ವಿದೇಶಾಂಗ ಇಲಾಖೆ ಹೇಳಿದ್ದೇನು? Captain Smith Machchhar

ನವದೆಹಲಿ: ದುಬೈನಿಂದ ಇಸ್ರೇಲ್​ಗೆ ಪ್ರಯಾಣ ಬೆಳೆಸಿದ್ದ, ಫ್ಲೈದುಬೈ (Flydubai) ವಿಮಾನದಲ್ಲಿ ನಡೆದ ಘಟನೆ ಬಗ್ಗೆ ಈಗ ಜಾಗತಿಕವಾಗಿ ಎಲ್ಲಡೆ ಚರ್ಚೆಯಾಗುತ್ತಿದೆ.

ವಿಮಾನದ ಕ್ಯಾಪ್ಟನ್​ ಸ್ಮಿತ್​ ಮಚ್ಚಾರ್​ ಮೇಲೆ ಸಹ ಪೈಲಟ್​ ಸ್ಥಾನದಲ್ಲಿದ್ದ ಹಮಾಮ್ ಅಲ್-ಹಮ್ಮಾಮಿ ಎಂಬಾತ ದಿಢೀರನೆ ಹಲ್ಲೆ ನಡೆಸಿ, ವಿಮಾನವನ್ನು ತನ್ನ ಹತೋಟಿಗೆ ತೆಗೆದುಕೊಳ್ಳಲು ಮುಂದಾಗಿದ್ದಾನೆ. ಆದರೆ, ತೀವ್ರ ಗಾಯಗೊಂಡಿದರೂ, ಭಾರತ ಮೂಲಕದ ಪೈಲಟ್​ ಸ್ಮಿತ್​ ಮಚ್ಚಾರ್​, ಕಾಕ್​ಪಿಟ್​ ದ್ವಾರವನ್ನು ತೆರೆಯುವಲ್ಲಿ ಯಶಸ್ವಿಯಾಗಿದ್ದು, ಭಾರಿ ದುರ್ಘಟನೆಯೊಂದನ್ನು ತಡೆದಿದ್ದಾರೆ.

ನಂತರ ವಿಮಾನದಲ್ಲಿದ್ದ ಪ್ರಯಾಣಿಕರು, ಆಗಂತುಕ ಹಮಾಮ್ ಅಲ್-ಹಮ್ಮಾಮಿ ಯನ್ನು ಕಟ್ಟಿಹಾಕಿದರೆ, ಹೆಚ್ಚುವರಿ ಪೈಲಟ್​ಗಳು ವಿಮಾನವನ್ನು ಸೌದಿ ಅರೇಬಿಯಾದಲ್ಲಿ ತುರ್ತು ಭೂಸ್ಪರ್ಶ ಮಾಡಿದ್ದರು. ನಂತರ ಕ್ಯಾಪ್ಟನ್​ ಸ್ಮಿತ್ ಮಚ್ಚಾರ್​ನನ್ನು ಸೌದಿಯ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಚಿಕಿತ್ಸೆ ನಡೆಸಲಾಗುತ್ತಿದೆ. ಈಗ ಗಾಯಗೊಂಡಿರುವ ಕ್ಯಾಪ್ಟನ್​ ಮಚ್ಚಾರ್​ ಆರೋಗ್ಯ ಸ್ಥಿತಿ ಬಗ್ಗೆ ವಿದೇಶಾಂಗ ಇಲಾಖೆ ಮಾಹಿತಿ ಹಂಚಿಕೊಂಡಿದೆ.

ಸ್ಮಿತ್​ ಚೇತರಿಸುತ್ತಿದ್ದಾರೆ...!

ಭಾರತದ ಹೆಮ್ಮೆ ಹಾಗೂ ಧೀರ ಕ್ಯಾಪ್ಟನ್​ ಸ್ಮಿತ್​ ಮಚ್ಚಾರ್​ ಸೌದಿಯ ಆಸ್ಪತ್ರೆಯಲ್ಲಿ ಅತ್ಯುತ್ತಮ ಹಾಗೂ ಅತ್ಯಾಧುನಿಕ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅವರ ಆರೋಗ್ಯ ಈಗ ಮೊದಲಿಗಿಂತ ಬಹಳ ಚೇತರಿಕೆ ಕಾಣಿಸುತ್ತಿದೆ. ಭಾರತದ ರಾಯಭಾರ ಕಚೇರಿ ಅವರ ಮೇಲೆ ತೀವ್ರ ನಿಗಾ ವಹಿಸಿದೆ ಎಂದು ಟ್ವಿಟ್​ ಮಾಡಿದೆ.

ಹಾಗೆಯೇ, ಕ್ಯಾಪ್ಟನ್​ ಸ್ಮಿತ್​ ಆರೋಗ್ಯದ ಬಗ್ಗೆ ಅವರ ಕುಟುಂಬ ವರ್ಗಕ್ಕೆ ಕ್ಷಣ-ಕ್ಷಣದ ಮಾಹಿತಿಯನ್ನು ನೀಡಲಾಗುತ್ತಿದ್ದು, ಅವರು ಶೀಘ್ರದಲ್ಲಿ ಸಂಪೂರ್ಣ ಗುಣಮುಖಲಾಗಲಿದ್ದಾರೆ ಎಂಬ ಭರವಸೆ ನೀಡಿದೆ. ಅಂತಯೇ, ವೈಧ್ಯಕೀಯ ನೆರವನ್ನು ನೀಡುತ್ತಿರುವ ಸೌದಿ ಸರ್ಕಾರಕ್ಕೆ ಧನ್ಯವಾದವನ್ನು ತಿಳಿಸಿದೆ.

ಚಾಕು ಅಲ್ಲ, ಕೊಡಲಿಯಿಂದ ಹಲ್ಲೆ!

ಇಷ್ಟು ದಿನ ಹೊರಬಂದ ಮಾಹಿತಿ ಪ್ರಕಾರ, ಸಹ-ಪೈಲಟ್​ ಹಮಾಮ್ ಅಲ್-ಹಮ್ಮಾಮಿ ಪಾಕೆಟ್​ ಚಾಕು ಮೂಲಕ ಸ್ಮಿತ್​ ಮಚ್ಚಾರ್​ ಮೇಲೆ ಹಲ್ಲೆ ನಡೆಸಿದ್ದ ಎಂದು ಹೇಳಲಾಗುತ್ತಿತ್ತು. ಆದರೆ ಯುಎಇ ನೀಡಿರುವ ಮಾಹಿತಿ ಪ್ರಕಾರ, ವಿಮಾನದಲ್ಲಿ ತುರ್ತು ಪರಿಸ್ಥಿತಿ ನಿರ್ಮಾಣವಾದಾಗ ಗಾಜನ್ನು ಒಡೆಯಲು ಕೊಡಲಿಯೊಂದನ್ನು ಇಟ್ಟಿರಲಾಗುತ್ತದೆ. ಈ ಕೊಡಲಿಯನ್ನು ಆಯುಧವಾಗಿ ಬಳಸಿಕೊಂಡು ಹಮಾಮ್ ಅಲ್-ಹಮ್ಮಾಮಿ , ಸ್ಮಿತ್​ ಮಚ್ಚಾರ್​ ಮೇಲೆ ದಾಳಿ ನಡೆಸಿದ್ದಾನೆಂದು ತಿಳಿಸಿದೆ.

ಈ ಭೀಕರ ದಾಳಿಯಿಂದ ಗಾಯಗೊಂಡರೂ, ಕ್ಯಾಪ್ಟನ್​ ಮಚ್ಚಾರ್​ ಕಾಕ್​ಪಿಟ್​ ದ್ವಾರವನ್ನು ತೆಗೆದ ಫಲವಾಗಿ ವಿಮಾನದಲ್ಲಿದ್ದ ಸುಮಾರು 180 ಕ್ಕೂ ಹೆಚ್ಚಿನ ಜನರು ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಇಲ್ಲದಿದ್ದರೆ, ಇವರೆಲ್ಲ ಜೀವ ಉಳಿಯುವುದು ಬಹಳ ಕಷ್ಟವಾಗಿತ್ತೆಂದು ಯುಎಇ ತಿಳಿಸಿದೆ, (ಏಜೆನ್ಸೀಸ್​).