ರಷ್ಯಾ-ಉಕ್ರೇನ್ ಯುದ್ಧಕ್ಕೆ ಅಂತ್ಯ ಹಾಡಲಿದ್ದಾರಾ ಪುಟಿನ್? 'ವಿಜಯ ದಿನ'ದಂದು ಶಾಂತಿ ಮಾತುಕತೆ ಸುಳಿವು ನೀಡಿದ ಅಧ್ಯಕ್ಷ! Vladimir Putin on Russia Ukraine War

ಮಾಸ್ಕೋ: ಕಳೆದ ನಾಲ್ಕು ವರ್ಷಗಳಿಂದ ನಡೆಯುತ್ತಿರುವ ರಷ್ಯಾ-ಉಕ್ರೇನ್​ ಯುದ್ಧವು ಈಗ ಸಮಾಪ್ತಿಯಾಗುವ ಲಕ್ಷಣ ಕಂಡುಬರುತ್ತಿದ್ದು, ಶನಿವಾರ (ಮೇ.9) ಮಾಸ್ಕೋದಲ್ಲಿ ರಷ್ಯಾ ವಿಜಯ ದಿನದಂದು ಮಾತನಾಡಿದ ಅಧ್ಯಕ್ಷ ವ್ಲಾಡಿಮಿರ್​ ಪುಟಿನ್ ​(Vladimir Putin on Russia Ukraine War), ಆ ವಿಷಯ ಈಗ ಮುಗಿಯುವ ಹಂತವನ್ನು ತಲುಪಿದೆ ಎಂದು ಅನಿಸುತ್ತದೆ ಎಂದು ಹೇಳಿಕೆ ನೀಡಿದ್ದಾರೆ.

ಈ ಮೂಲಕ ರಷ್ಯಾ ಹಾಗೂ ಉಕ್ರೇನ್​ ನಡುವೆ ನಡೆಯುತ್ತಿದ್ದ ಯುದ್ಧವು ಶಾಂತಿ ಮಾತುಕತೆಗೆ ಮುಂದಾಗಲಿದೆ ಎಂಬ ಸೂಚನೆ ದೊರೆಯುತ್ತಿದೆ. ಹಾಗೆಯೇ ಈ ಹೇಳಿಕೆ ಕದನ ವಿರಾಮ ಘೋಷಣೆಯಾಗಿ ಉಭಯ ದೇಶಗಳು ತಲಾ 1,000 ಯುದ್ಧ ಕೈದಿಗಳನ್ನು ಹಸ್ತಾಂತರಿಸಲು ಸಮ್ಮತಿ ನೀಡಿದ ತರುವಾಯ ಕೇಳಿ ಬಂದಿದೆ.

ಶನಿವಾರ ನಡೆದ ರಷ್ಯಾ ವಿಜಯೋತ್ಸವ ಪರೇಡ್​​, ಕಳೆದ ವರ್ಷಕ್ಕಿಂತ ವಿಭಿನ್ನವಾಗಿ ನಡೆದಿದೆ. ಈ ಭಾರಿ ಕೇವಲ ಸೈನಿಕರ ಕವಾಯತು ಮಾತ್ರ ನಡೆದಿದ್ದು, ಯಾವುದೇ ಯುದ್ಧ ಟ್ಯಾಂಕ್​, ಮಿಲಿಟರಿ ವಾಹನಗಳ ಪ್ರದರ್ಶನ ನಡೆದಿಲ್ಲ. ದೊಡ್ಡದಾದ ಪರದೆ ಮೇಲೆ ಮಿಸೈಲ್​ಗಳ ಹಾಗೂ ಯುದ್ಧೋತ್ಪನ್ನಗಳ ವಿಡಿಯೋಗಳನ್ನಷ್ಟೆ ಪ್ರದರ್ಶಿಸಲಾಗಿದೆ.

ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಅಧ್ಯಕ್ಷ ಪುಟಿನ್​, ಎಂದಿನಂತೆ ರಷ್ಯನ್​ ಸೈನಿಕರ ಸಾಹಸವನ್ನು ಹೊಗಳುತ್ತಾ, ನಾಟೋ ಬಣವನ್ನು ದೂಷಿಸಿದರು. ಉಕ್ರೇನ್​ ಜೊತೆ ಮಾತುಕತೆ ಬಗ್ಗೆ ಹೇಳಿಕೆ ನೀಡಿದ ಪುಟಿನ್​, ಉಭಯ ದೇಶಗಳು ಸಂಪೂರ್ಣ ಶಾಂತಿ ಬಯಸಿದರೆ ನಾವು ಮಾತುಕತೆಗೆ ಸಿದ್ಧ ಎಂದು ಹೇಳಿದ್ದಾರೆ.

ರಷ್ಯಾ ಹಾಗೂ ಉಕ್ರೇನ್​ ನಡುವೆ ಏರ್ಪಟ್ಟಿರುವ ಬಿಕ್ಕಟ್ಟನ್ನು ಬಗೆಹರಿಸಲು ಮುಂದಾಗಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​, ಎರಡನೇ ವಿಶ್ವ ಯುದ್ಧನ ನಂತರ ಬಲುದೀರ್ಘ ನಡೆಯುತ್ತಿರುವ ಯುದ್ಧವೆಂದರೆ ಅದು ರಷ್ಯಾ-ಉಕ್ರೇನ್​ ಕದನವಾಗಿದೆ. ಈ ಎರಡು ದೇಶಗಳು ಸಂಘರ್ಷವನ್ನು ಬಿಟ್ಟು ಕದನ ವಿರಾಮ, ಶಾಂತಿ ಮಾತುಕತೆ ಬಗ್ಗೆ ಚಿಂತಿಸಬೇಕೆಂದು ಹೇಳಿದ್ದಾರೆ, (ಏಜನ್ಸೀಸ್​).