ಭಟ್ಕಳದಿಂದ ಮಿಚಿಗನ್‌ವರೆಗೆ ಕುಟುಂಬದ ಪಯಣ
ಶಂಸುದ್ದೀನ್ರ ಪುತ್ರ ಹಾಗೂ ಸಾರಾ ಅವರ ತಂದೆ ಡಾ. ಜುಕಕು ಎಸ್. ತಯ್ಯಬ್ ಅವರು ಬೆಂಗಳೂರು ಮೆಡಿಕಲ್ ಕಾಲೇಜಿನಿಂದ 1976ರಲ್ಲಿ ವೈದ್ಯಕೀಯ ಪದವಿ ಪಡೆದರು. ನಂತರ ಸೌದಿ ಅರೇಬಿಯಾದಲ್ಲಿ ಸೇವೆ ಸಲ್ಲಿಸಿ 1980ರ ದಶಕದಲ್ಲಿ ಅಮೆರಿಕದ ಮಿಚಿಗನ್‌ಗೆ ವಲಸೆ ಹೋದರು. ಮಿಚಿಗನ್‌ನಲ್ಲಿ ನೆಲೆಸಿ ಪ್ರಸಿದ್ಧ ಕಿಡ್ನಿ ತಜ್ಞರಾಗಿ (Nephrologist) ಸೇವೆ ಸಲ್ಲಿಸಿದ ಅವರು, ತಮ್ಮ ಮಕ್ಕಳಾದ ಸಾರಾಗೆ ಅಮೆರಿಕದಲ್ಲೇ ಶಿಕ್ಷಣ ಕೊಡಿಸಿದರೂ, ಭಟ್ಕಳದ ಕೌಟುಂಬಿಕ ಸಂಪರ್ಕವನ್ನು ನಿರಂತರವಾಗಿ ಕಾಯ್ದುಕೊಂಡು ಬಂದಿದ್ದರು.
ಸಾರಾ ಮತ್ತು ಅಬ್ದುಲ್ ಎಲ್-ಸಯೀದ್ ಪ್ರೇಮ ವಿವಾಹ
ಸಾರಾ ಅವರು ಮಿಚಿಗನ್ ವಿಶ್ವವಿದ್ಯಾಲಯದಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗ ಅಬ್ದುಲ್ ಎಲ್-ಸಯೀದ್ ಅವರನ್ನು ಭೇಟಿಯಾದರು. ವಿಶ್ವವಿದ್ಯಾಲಯದ ಮುಸ್ಲಿಂ ವಿದ್ಯಾರ್ಥಿಗಳ ಸಂಘದಲ್ಲಿದ್ದ ಇಬ್ಬರೂ 2006ರ ಮೇ ತಿಂಗಳಿನಲ್ಲಿ ವಿವಾಹವಾದರು. ಸಾರಾ ಅವರು ಪ್ರಸ್ತುತ ಮನೋವೈದ್ಯಕೀಯ ವಿಭಾಗದ ಹಿರಿಯ ವೈದ್ಯೆಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.
ತಮ್ಮ ಪತ್ನಿಯ ದಕ್ಷಿಣ ಭಾರತದ ಹಾಗೂ ಕರ್ನಾಟಕದ ಹಿನ್ನೆಲೆಯ ಬಗ್ಗೆ ಹಲವು ಬಾರಿ ಹೆಮ್ಮೆಯಿಂದ ಮಾತನಾಡಿಕೊಂಡಿರುವ ಸೆನೆಟರ್ ಅಬ್ದುಲ್ ಎಲ್-ಸಯೀದ್, ನಾನು ಕಳೆದ 20 ವರ್ಷಗಳಿಂದ ದಕ್ಷಿಣ ಭಾರತದ ಕುಟುಂಬದ ಜೊತೆ ವಿವಾಹ ಬಂಧನದಲ್ಲಿದ್ದೇನೆ. ಈಗ ನಾನು ಅರಬ್ ಮೂಲದವನಿಗಿಂತ ಭಾರತೀಯನಾಗಿದ್ದೇನೆ ಎಂದು ಹೇಳಿಕೊಂಡಿದ್ದರು. ಅಮೆರಿಕದ ರಾಜಕೀಯ ಮುಂಚೂಣಿಗೆ ಎಲ್-ಸಯೀದ್ ಬಂದಿರುವುದು ಭಟ್ಕಳದ ಜುಕಕು ಕುಟುಂಬದ ಹಳೆಯ ನೆನಪುಗಳನ್ನು ಮತ್ತೆ ಮೆಲುಕು ಹಾಕುವಂತೆ ಮಾಡಿದೆ ಎನ್ನುವುದರಲ್ಲಿ ಎರಡನೇ ಮಾತಿಲ್ಲ(ಏಜೆನ್ಸೀಸ್).
