ಮಧ್ಯಪ್ರಾಚ್ಯ ಯುದ್ಧಕ್ಕೆ ಬಿಗ್ ಬ್ರೇಕ್!...ಡೊನಾಲ್ಡ್ ಟ್ರಂಪ್ ಡಿಜಿಟಲ್ ಸಹಿ; ಇರಾನ್ ಜೊತೆ ಶಾಂತಿ ಒಪ್ಪಂದ ಫೈನಲ್ | US Iran Peace

ವರ್ಸೈಲ್ಸ್‌ನಿಂದ ನಿರ್ಗಮಿಸುವಾಗ ಮಾಧ್ಯಮಗಳೊಂದಿಗೆ ಮಾತನಾಡಿದ ಟ್ರಂಪ್, ಒಪ್ಪಂದಕ್ಕೆ ಸಹಿ ಬಿದ್ದಿದೆ. ನಾನು ವರ್ಸೈಲ್ಸ್‌ನಲ್ಲಿ ಕುಳಿತು ಡಿಜಿಟಲ್ ಸಹಿ ಮಾಡಿದ್ದೇನೆ ಎಂದು ತಿಳಿಸಿದರು.

ಮತ್ತೊಂದೆಡೆ ಇರಾನ್ ಕೂಡ ಒಪ್ಪಂದವನ್ನು ಖಚಿತಪಡಿಸಿದೆ. ಆದರೆ, ಇದು ಅಮೆರಿಕದ ವೈಫಲ್ಯವನ್ನು ಎತ್ತಿ ತೋರಿಸುತ್ತದೆ ಎಂದು ಇರಾನ್ ವಾದಿಸಿದೆ. ಅಷ್ಟೇ ಅಲ್ಲದೆ, ನಿಜವಾದ ಪರೀಕ್ಷೆ ಈಗಷ್ಟೇ ಆರಂಭವಾಗುತ್ತಿದ್ದು, ಒಪ್ಪಂದದ ಅನುಷ್ಠಾನ ಅತ್ಯಂತ ಪ್ರಮುಖವಾಗಿದೆ ಎಂದು ಇರಾನ್ ಎಚ್ಚರಿಸಿದೆ. ಈ ತಾತ್ಕಾಲಿಕ ಒಪ್ಪಂದದ ಅನ್ವಯ, ಅಂತಿಮ ನಿಯಮಗಳನ್ನು ರೂಪಿಸಲು ಉಭಯ ದೇಶಗಳಿಗೆ 60 ದಿನಗಳ ಕಾಲಾವಕಾಶ ಸಿಗಲಿದೆ. ಉಭಯ ದೇಶಗಳ ಅಧ್ಯಕ್ಷರ ಸಹಿಯೊಂದಿಗೆ ಇಸ್ಲಾಮಾಬಾದ್ ತಿಳುವಳಿಕಾ ಒಪ್ಪಂದದ ಪಠ್ಯ ಅಂತಿಮಗೊಂಡಿದೆ. ಈಗ ಒಪ್ಪಂದದ ಜಾರಿ ಮತ್ತು ಅನುಷ್ಠಾನವನ್ನು ಪರೀಕ್ಷಿಸುವ ಸಮಯ ಬಂದಿದೆ ಎಂದು ಇರಾನ್ ವಿದೇಶಾಂಗ ಸಚಿವಾಲಯದ ವಕ್ತಾರ ಎಸ್ಮೇಲ್ ಬಕಾಯಿ ತಿಳಿಸಿದ್ದಾರೆ.

ಆರ್ಥಿಕ ದಿಗ್ಬಂಧನ ಸಡಿಲಿಕೆ: ಒಪ್ಪಂದದ ಭಾಗವಾಗಿ, ಇರಾನ್ ಆರ್ಥಿಕತೆಯ ಮೇಲೆ ತೀವ್ರ ಹೊಡೆತ ನೀಡಿದ್ದ ತೈಲ ನಿರ್ಬಂಧಗಳನ್ನು ಹಿಂಪಡೆಯಲು ಅಮೆರಿಕ ಸಮ್ಮತಿಸಿದೆ.

$300 ಬಿಲಿಯನ್ ಪರಿಹಾರ ನಿಧಿ: ಅಂತಿಮ ಒಪ್ಪಂದ ಏರ್ಪಟ್ಟ ನಂತರ, ಪ್ರಾದೇಶಿಕ ರಾಷ್ಟ್ರಗಳ ಬೆಂಬಲದೊಂದಿಗೆ 300 ಬಿಲಿಯನ್ ಅಮೆರಿಕನ್ ಡಾಲರ್ ಮೊತ್ತದ ಪುನರ್ನಿರ್ಮಾಣ ನಿಧಿಯನ್ನು ಬಿಡುಗಡೆ ಮಾಡಲು ಅಮೆರಿಕ ಅನುಕೂಲ ಮಾಡಿಕೊಡಲಿದೆ.

ಪರಮಾಣು ಕಾರ್ಯಕ್ರಮದ ಸವಾಲು: ಇರಾನ್‌ನ ಪರಮಾಣು (ನ್ಯೂಕ್ಲಿಯರ್) ಕಾರ್ಯಕ್ರಮದ ವಿಷಯ ಇನ್ನೂ ದೊಡ್ಡ ಸಮಸ್ಯೆಯಾಗಿಯೇ ಉಳಿದಿದೆ. ಒಪ್ಪಂದದ ಪ್ರಕಾರ, ಇರಾನ್ ತನ್ನ ಹತ್ತಿರ ಇರೋ ಬಾಂಬ್ ತಯಾರಿಸಲು ಬಳಸುವ ಯುರೇನಿಯಂ ದಾಸ್ತಾನನ್ನು ಅಂತಾರಾಷ್ಟ್ರೀಯ ಅಣುಶಕ್ತಿ ಸಂಸ್ಥೆಯ (IAEA) ಕಣ್ಣಾವಲಿನಲ್ಲಿ ಕಡಿಮೆ ಮಾಡಬೇಕಾಗುತ್ತದೆ.

ಇದಕ್ಕೂ ಮುನ್ನ, ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ನೇತೃತ್ವದ ನಿಯೋಗವು ಶುಕ್ರವಾರ ಸ್ವಿಟ್ಜರ್ಲೆಂಡ್‌ನಲ್ಲಿ ಇರಾನ್‌ನ ಮುಖ್ಯ ಸಂಧಾನಕಾರ ಮೊಹಮ್ಮದ್-ಬಾಗೇರ್ ಗಲಿಬಾಫ್ ಅವರನ್ನು ಭೇಟಿಯಾಗಬೇಕಿತ್ತು. ಪರಮಾಣು ಮಾತುಕತೆಗೆ ಈ ಸಭೆ ಅತ್ಯಂತ ಪ್ರಮುಖ ಎಂದು ಅಮೆರಿಕದ ಉನ್ನತ ಅಧಿಕಾರಿಯೊಬ್ಬರು ಹೇಳಿದ್ದರು. ಆದರೆ, ಅಧ್ಯಕ್ಷರೇ ನೇರವಾಗಿ ಡಿಜಿಟಲ್ ಸಹಿ ಹಾಕಿರುವುದರಿಂದ ಶುಕ್ರವಾರದ ಸಭೆಯನ್ನು ಸದ್ಯಕ್ಕೆ ತಡೆಹಿಡಿಯಲಾಗಿದೆ ಎಂದು ಬಕಾಯಿ ತಿಳಿಸಿದ್ದಾರೆ. ಆಕ್ಸಿಯೋಸ್ ವರದಿಯ ಪ್ರಕಾರ, ಅಮೆರಿಕವು ಇರಾನ್‌ನ ಪರಮಾಣು ಕಾರ್ಯಕ್ರಮದ ಬಗ್ಗೆ ಇನ್ನೂ ಸಂದೇಹ ಹೊಂದಿದ್ದರೂ, ಈ ಜೆಂಟಲ್‌ಮ್ಯಾನ್ ಒಪ್ಪಂದ ಜಾರಿಗೆ ತರುವಲ್ಲಿ ಇರಾನ್ ಎಷ್ಟು ಗಂಭೀರವಾಗಿದೆ ಎಂಬುದು ಮುಂದಿನ ಕೆಲವು ದಿನಗಳಲ್ಲಿ ಅಥವಾ ವಾರಗಳಲ್ಲಿ ತಿಳಿಯಲಿದೆ ಎಂದು ವಾಷಿಂಗ್ಟನ್ ತಿಳಿಸಿದೆ(ಏಜೆನ್ಸೀಸ್​​).