ಅಮೆರಿಕ-ಇರಾನ್ ಐತಿಹಾಸಿಕ ಶಾಂತಿ ಒಪ್ಪಂದ: ಭಾರತದ ಸಾಮಾನ್ಯ ಜನರಿಗೆ ಸಿಗಲಿದೆ 5 ಬಂಪರ್ ಲಾಭಗಳು! US and Iran Peace Deal

US and Iran Peace Deal : ಅಮೆರಿಕ ಮತ್ತು ಇರಾನ್ ನಡುವೆ ನಡೆದಿರುವ ಐತಿಹಾಸಿಕ ಶಾಂತಿ ಒಪ್ಪಂದವು ಪಶ್ಚಿಮ ಏಷ್ಯಾ ಮಾತ್ರವಲ್ಲದೆ ಜಾಗತಿಕ ಮಟ್ಟದಲ್ಲಿ ಹೊಸ ಆರ್ಥಿಕ ಕ್ರಾಂತಿಗೆ ನಾಂದಿ ಹಾಡಿದೆ. ಉಭಯ ದೇಶಗಳ ನಡುವಿನ ಒಪ್ಪಂದದಿಂದಾಗಿ ಅಂತಾರಾಷ್ಟ್ರೀಯ ವ್ಯಾಪಾರದ ಪ್ರಮುಖ ಕೇಂದ್ರವಾದ ಹಾರ್ಮುಜ್ ಜಲಸಂಧಿ ಪುನರಾರಂಭಗೊಂಡಿದ್ದು, ಅಮೆರಿಕದ ನೌಕಾ ದಿಗ್ಬಂಧನ ತೆರವಾಗಿ ಜಾಗತಿಕ ಮಾರುಕಟ್ಟೆ ಇದೀಗ ಸುಸೂತ್ರವಾಗಿದೆ.

ಎಲ್ಲ ಅಡೆತಡೆಗಳು ನಿವಾರಣೆಯಾದ ಪರಿಣಾಮ ಈ ಹಿಂದೆ 100 ಡಾಲರ್ ಗಡಿ ದಾಟಿದ್ದ ಬ್ರೆಂಟ್ ಕಚ್ಚಾ ತೈಲದ ಬೆಲೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಶೇ. 1.13 ರಷ್ಟು ಕುಸಿದು ಪ್ರತಿ ಬ್ಯಾರೆಲ್‌ಗೆ 78.65 ಡಾಲರ್‌ಗೆ ತಲುಪಿದ್ದರೆ, ಅಮೆರಿಕದ WTI ಕಚ್ಚಾ ತೈಲದ ಬೆಲೆಯೂ ಶೇ. 2.20 ರಷ್ಟು ಇಳಿಕೆಯಾಗಿ ಪ್ರತಿ ಬ್ಯಾರೆಲ್‌ಗೆ 75 ಡಾಲರ್‌ನಲ್ಲಿ ವಹಿವಾಟು ನಡೆಸುತ್ತಿದೆ. ತನ್ನ ತೈಲದ ಅಗತ್ಯತೆಗಳಿಗಾಗಿ ಶೇ. 85 ರಷ್ಟು ಆಮದನ್ನೇ ಅವಲಂಬಿಸಿರುವ ಭಾರತಕ್ಕೆ ಕಚ್ಚಾ ತೈಲ ಬೆಲೆಯ ಈ ದಿಢೀರ್ ಕುಸಿತವು ಅನಿರೀಕ್ಷಿತ ವರದಾನವಾಗಿ ಪರಿಣಮಿಸಿದ್ದು, ಈ ಅಂತಾರಾಷ್ಟ್ರೀಯ ಒಪ್ಪಂದದಿಂದಾಗಿ ಭಾರತದ ಆರ್ಥಿಕತೆ ಮತ್ತು ಸಾಮಾನ್ಯ ಜನರಿಗೆ ಸಿಗಲಿರುವ 5 ಪ್ರಮುಖ ಪ್ರಯೋಜನಗಳ ವಿವರ ಇಲ್ಲಿದೆ.

'ಸ್ಟ್ರೈಟ್ ಆಫ್ ಹಾರ್ಮುಜ್' ಬಂದ್ ಆಗಿದ್ದ ಹಿನ್ನೆಲೆಯಲ್ಲಿ ಇತ್ತೀಚೆಗೆ ಭಾರತದಲ್ಲಿ ಕೇವಲ 10 ದಿನಗಳಲ್ಲಿ ಇಂಧನ ಬೆಲೆಗಳು ಪ್ರತಿ ಲೀಟರ್‌ಗೆ ಸುಮಾರು 7 ರೂಪಾಯಿಯಷ್ಟು ಏರಿಕೆಯಾಗಿದ್ದವು. ಅಂತಾರಾಷ್ಟ್ರೀಯ ತಜ್ಞರ ಲೆಕ್ಕಾಚಾರದ ಪ್ರಕಾರ, ಜಾಗತಿಕ ಮಾರುಕಟ್ಟೆಯಲ್ಲಿ ಪ್ರತಿ ಬ್ಯಾರೆಲ್ ಕಚ್ಚಾ ತೈಲದ ಬೆಲೆ 1 ಡಾಲರ್ ಹೆಚ್ಚಾದರೆ, ದೇಶೀಯ ಮಾರುಕಟ್ಟೆಯಲ್ಲಿ ಇಂಧನ ದರ ಲೀಟರ್‌ಗೆ 50-60 ಪೈಸೆಯಷ್ಟು ಹೆಚ್ಚಾಗುತ್ತದೆ. ಆದರೆ, ಈಗ ಕಚ್ಚಾ ತೈಲದ ಬೆಲೆ 80 ಡಾಲರ್‌ಗಿಂತಲೂ ಕೆಳಕ್ಕೆ ಕುಸಿದಿರುವುದರಿಂದ ತೈಲ ಕಂಪನಿಗಳ ಉತ್ಪಾದನೆ ಮತ್ತು ಸಾಗಣೆ ವೆಚ್ಚ ಗಣನೀಯವಾಗಿ ಕಡಿಮೆಯಾಗಲಿದೆ. ಇದರ ನೇರ ಲಾಭ ದೇಶೀಯ ಗ್ರಾಹಕರಿಗೆ ಸಿಗಲಿದ್ದು, ಮುಂಬರುವ ದಿನಗಳಲ್ಲಿ ಭಾರತದಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳು ಭಾರೀ ಪ್ರಮಾಣದಲ್ಲಿ ಇಳಿಕೆಯಾಗುವ ಸಾಧ್ಯತೆಯಿದೆ.

ದೇಶದ ಸಾರಿಗೆ ವಲಯಕ್ಕೆ ಡೀಸೆಲ್ ದರಗಳು ಅತ್ಯಂತ ನಿರ್ಣಾಯಕವಾಗಿದ್ದು, ಇಂಧನ ಬೆಲೆಗಳು ಇಳಿಕೆಯಾದಾಗ ಸರಕು ಸಾಗಣೆ ವೆಚ್ಚ ಸಹಜವಾಗಿ ನಿಯಂತ್ರಣಕ್ಕೆ ಬರುತ್ತದೆ. ಇದು ಸಾರ್ವಜನಿಕರ ದೈನಂದಿನ ಅಗತ್ಯ ವಸ್ತುಗಳು, ಹಣ್ಣುಗಳು, ತರಕಾರಿಗಳು ಮತ್ತು ಕೈಗಾರಿಕಾ ಉತ್ಪನ್ನಗಳ ಬೆಲೆಗಳ ಮೇಲಿನ ಒತ್ತಡವನ್ನು ಕಡಿಮೆ ಮಾಡುತ್ತದೆ. ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಕುಸಿತ ಕಾಣುತ್ತಿರುವುದು ದೇಶದ ಚಿಲ್ಲರೆ ಹಣದುಬ್ಬರವನ್ನು ನಿಯಂತ್ರಣದಲ್ಲಿಡಲು ಪ್ರಮುಖ ಪಾತ್ರ ವಹಿಸಲಿದೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ ಕೂಡ ಸ್ಪಷ್ಟಪಡಿಸಿದೆ.

ಭಾರತವು ಪ್ರಸ್ತುತ ಪ್ರತಿದಿನ ಸುಮಾರು 5 ಮಿಲಿಯನ್ ಬ್ಯಾರೆಲ್ ಕಚ್ಚಾ ತೈಲವನ್ನು ಆಮದು ಮಾಡಿಕೊಳ್ಳುತ್ತಿದ್ದು, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಬೆಲೆ ಪ್ರತಿ ಬ್ಯಾರೆಲ್‌ಗೆ 10 ಡಾಲರ್‌ನಷ್ಟು ಕುಸಿದರೆ ದೇಶದ ವಾರ್ಷಿಕ ಆಮದು ವೆಚ್ಚದಲ್ಲಿ ಬರೋಬ್ಬರಿ 13 ರಿಂದ 15 ಬಿಲಿಯನ್ ಡಾಲರ್ (ಸುಮಾರು 1.1 ರಿಂದ 1.3 ಲಕ್ಷ ಕೋಟಿ ರೂಪಾಯಿ) ಉಳಿತಾಯವಾಗುತ್ತದೆ. ತೈಲ ಬಿಲ್‌ನಲ್ಲಿ ಆಗುವ ಈ ಬೃಹತ್ ಆರ್ಥಿಕ ಉಳಿತಾಯವು ದೇಶದ ವಿತ್ತೀಯ ಹೊರೆಯನ್ನು ಗಣನೀಯವಾಗಿ ಕಡಿಮೆ ಮಾಡುವುದಲ್ಲದೆ, ಭಾರತದ ವಿದೇಶಿ ವಿನಿಮಯ ಮೀಸಲು ನಿಧಿಯನ್ನು ಸುರಕ್ಷಿತವಾಗಿಡಲು ಪ್ರಮುಖ ಪಾತ್ರ ವಹಿಸುತ್ತದೆ.

ಕಳೆದ ಕೆಲವು ತಿಂಗಳುಗಳಿಂದ ಅಂತಾರಾಷ್ಟ್ರೀಯ ಉದ್ವಿಗ್ನತೆಯಿಂದಾಗಿ ತೀವ್ರ ಒತ್ತಡಕ್ಕೆ ಒಳಗಾಗಿ, ಡಾಲರ್ ಎದುರು 95 ರೂಪಾಯಿ ಗಡಿ ದಾಟಿದ್ದ ಭಾರತೀಯ ರೂಪಾಯಿಗೆ ಪ್ರಸ್ತುತ ತೈಲ ಬೆಲೆ ಕುಸಿತವು ಭಾರಿ ನಿರಾಳತೆ ತಂದಿದೆ. ತೈಲ ಆಮದಿಗೆ ಕಡಿಮೆ ಡಾಲರ್ ವೆಚ್ಚ ಮಾಡಬೇಕಾಗಿರುವುದರಿಂದ ರೂಪಾಯಿ ಮೌಲ್ಯವು ಶೀಘ್ರದಲ್ಲೇ ಚೇತರಿಸಿಕೊಳ್ಳಲಿದೆ. ಮತ್ತೊಂದೆಡೆ, ಕಚ್ಚಾ ತೈಲದ ಬೆಲೆಯಲ್ಲಿ ಪ್ರತಿ 10 ಡಾಲರ್ ಇಳಿಕೆಯಾದಾಗಲೂ ದೇಶದ ಚಾಲ್ತಿ ಖಾತೆ ಕೊರತೆಯು (CAD) ಜಿಡಿಪಿಯ ಸುಮಾರು ಶೇ. 0.3 ರಿಂದ 0.4 ರಷ್ಟು ಕಡಿಮೆಯಾಗಲಿದೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ ಅಂದಾಜಿಸಿದೆ.

ಕಚ್ಚಾ ತೈಲ ಬೆಲೆ ಕುಸಿತದಿಂದಾಗಿ ತೈಲವನ್ನೇ ಕಚ್ಚಾ ವಸ್ತುವಾಗಿ ಬಳಸುವ ಪೇಂಟ್ಸ್, ಟೈರ್ಸ್, ವಿಮಾನಯಾನ, ಸಿಮೆಂಟ್, ಲಾಜಿಸ್ಟಿಕ್ಸ್ ಮತ್ತು ರಾಸಾಯನಿಕ ಕಂಪನಿಗಳ ಉತ್ಪಾದನಾ ವೆಚ್ಚ ಗಣನೀಯವಾಗಿ ಕಡಿಮೆಯಾಗಲಿದೆ. ವೆಚ್ಚಗಳು ಕಡಿಮೆಯಾಗಿ ಕಂಪನಿಗಳ ಲಾಭಾಂಶ ಹೆಚ್ಚಳವಾಗುವುದರಿಂದ, ಈ ವಲಯದ ಷೇರುಗಳಿಗೆ ಮಾರುಕಟ್ಟೆಯಲ್ಲಿ ಭಾರಿ ಬೇಡಿಕೆ ಸೃಷ್ಟಿಯಾಗಲಿದೆ. ಇದರ ನೇರ ಪರಿಣಾಮವಾಗಿ, ಹೂಡಿಕೆದಾರರ ಉತ್ಸಾಹ ಹೆಚ್ಚಿ ಭಾರತೀಯ ಷೇರು ಮಾರುಕಟ್ಟೆಗಳಾದ ಸೆನ್ಸೆಕ್ಸ್ ಮತ್ತು ನಿಫ್ಟಿ ಭಾರಿ ಜಿಗಿತದೊಂದಿಗೆ ದಾಖಲೆಯ ಮುನ್ನಡೆ ಸಾಧಿಸಲು ಇದು ಪ್ರಮುಖ ಕೊಡುಗೆ ನೀಡಲಿದೆ.

ಭಾರತದ ಒಟ್ಟಾರೆ ಕಚ್ಚಾ ತೈಲ ಆಮದಿನ ಸುಮಾರು ಶೇ. 60 ರಷ್ಟು ಭಾಗವು ಪ್ರತ್ಯಕ್ಷವಾಗಿ ಅಥವಾ ಪರೋಕ್ಷವಾಗಿ ಹಾರ್ಮುಜ್ ಜಲಸಂಧಿಯನ್ನೇ ಅವಲಂಬಿಸಿದೆ. ಒಂದು ವೇಳೆ ಈ ಜಲಮಾರ್ಗವು ಬಂದ್ ಆದಲ್ಲಿ ತೈಲ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಿ, ಹಣದುಬ್ಬರ ಏರಿಕೆ ಹಾಗೂ ಚಾಲ್ತಿ ಖಾತೆ ಕೊರತೆ ಹೆಚ್ಚಾಗುವ ಅಪಾಯವಿರುತ್ತದೆ. ಹಾಗಾಗಿಯೇ ಅಮೆರಿಕ ಮತ್ತು ಇರಾನ್ ನಡುವಿನ ಈ ಶಾಂತಿ ಒಪ್ಪಂದವು ಕೇವಲ ಒಂದು ರಾಜತಾಂತ್ರಿಕ ವಿಜಯವಷ್ಟೇ ಅಲ್ಲದೆ ಭಾರತಕ್ಕೆ ಅಗ್ಗದ ದರದಲ್ಲಿ ಇಂಧನ, ಕಡಿಮೆ ಹಣದುಬ್ಬರ, ಸಾರಿಗೆ ವೆಚ್ಚದಲ್ಲಿ ಇಳಿಕೆ ಹಾಗೂ ಹೆಚ್ಚಿನ ಆರ್ಥಿಕ ಸ್ಥಿರತೆಯನ್ನು ಒದಗಿಸುವ ಆಶಾದಾಯಕ ಮುನ್ಸೂಚನೆಯಾಗಿದೆ. ಈ ಕಾರಣದಿಂದಾಗಿಯೇ, ಈ ಒಪ್ಪಂದವು ಭಾರತೀಯರ ಪ್ರತಿಯೊಂದು ಪ್ರಮುಖ ವಲಯದ ಮೇಲೂ ಪಾಸಿಟಿವ್​ ಪ್ರಭಾವ ಬೀರಲಿದೆ ಎಂದು ಆರ್ಥಿಕ ತಜ್ಞರು ಬಲವಾಗಿ ನಂಬಿದ್ದಾರೆ, (ಏಜೆನ್ಸೀಸ್​).