ಸೊಲುಖುಂಬು ಜಿಲ್ಲಾ ಪೊಲೀಸ್ ಉಸ್ತುವಾರಿ ನಬಿನ್ ರಾಜಾ ಬುಧಾಥೋಕಿ ಅವರು AFP ಸುದ್ದಿ ಸಂಸ್ಥೆಗೆ ಈ ಮಾಹಿತಿಯನ್ನು ಖಚಿತಪಡಿಸಿದ್ದು, ದುರಂತವನ್ನು ನೆದರ್ಲ್ಯಾಂಡ್ಸ್ ಪೊಲೀಸ್ ಇಲಾಖೆಯು ಅಧಿಕೃತ ಎಕ್ಸ್ (X) ಖಾತೆಯಲ್ಲಿ ಧೃಡಪಡಿಸಿದೆ.
ಪ್ರವಾಸೋದ್ಯಮದ ದೃಷ್ಟಿಯಿಂದ ನೇಪಾಳದ ಬೆಟ್ಟಗುಡ್ಡಗಳ ಸಾಲಿನಲ್ಲಿ ಹೆಲಿಕಾಪ್ಟರ್‌ಗಳು ಅತ್ಯಂತ ಪ್ರಮುಖ ಜೀವನಾಡಿಯಾಗಿ ಕೆಲಸ ಮಾಡುತ್ತವೆ. ದೈನಂದಿನ ಸರಕು ಸಾಗಣೆ, ಪರ್ವತಾರೋಹಿಗಳು ಮತ್ತು ವಿದೇಶಿ ಪ್ರವಾಸಿಗರ ಪ್ರಯಾಣ ಹಾಗೂ ತುರ್ತು ವೈದ್ಯಕೀಯ ರಕ್ಷಣಾ ಕಾರ್ಯಗಳಿಗೆ ಈ ಹೆಲಿಕಾಪ್ಟರ್‌ಗಳನ್ನೇ ಬಹುತೇಕ ನೆಚ್ಚಿಕೊಳ್ಳಲಾಗುತ್ತದೆ. ಪ್ರಪಂಚದ 14 ಅತ್ಯಂತ ಎತ್ತರದ ಪರ್ವತ ಶಿಖರಗಳಲ್ಲಿ 8 ಶಿಖರಗಳು ನೇಪಾಳದಲ್ಲೇ ಇರುವುದರಿಂದ ವರ್ಷವಿಡೀ ಸಾವಿರಾರು ದೇಶ-ವಿದೇಶಗಳ ಪ್ರವಾಸಿಗರು ಇಲ್ಲಿಗೆ ಆಗಮಿಸುತ್ತಾರೆ. ಆದರೆ, ಇಂತಹ ಎತ್ತರದ ಪ್ರದೇಶಗಳಲ್ಲಿ ವಿಮಾನ ಹಾಗೂ ಹೆಲಿಕಾಪ್ಟರ್ಗಳನ್ನು ಹಾರಿಸುವುದು ಅತ್ಯಂತ ಸವಾಲಿನ ಮತ್ತು ಅಪಾಯಕಾರಿ ಕೆಲಸವಾಗಿದೆ.
ವಿಜ್ಞಾನ ಮತ್ತು ಹವಾಮಾನದ ಪ್ರಕಾರ, ಅತ್ಯಂತ ಎತ್ತರದ ಪರ್ವತ ಪ್ರದೇಶಗಳಲ್ಲಿ ಗಾಳಿಯ ಸಾಂದ್ರತೆ ಬಹಳ ಕಡಿಮೆಯಿರುತ್ತದೆ. ತೆಳುವಾದ ಗಾಳಿಯಿಂದಾಗಿ ಹೆಲಿಕಾಪ್ಟರ್‌ನ ರೋಟಾರ್ ಬ್ಲೇಡ್‌ಗಳಿಗೆ ಅಗತ್ಯ ಪ್ರಮಾಣದ 'ಲಿಫ್ಟ್' ಅಥವಾ ಎತ್ತರಕ್ಕೆ ಜಿಗಿಯುವ ಶಕ್ತಿ ದೊರೆಯುವುದಿಲ್ಲ. ಅಷ್ಟೇ ಅಲ್ಲದೆ, ಎಂಜಿನ್‌ಗೆ ದಹನ ಕ್ರಿಯೆಗೆ ಬೇಕಾದ ಆಮ್ಲಜನಕದ ಪ್ರಮಾಣ ಕಡಿಮೆಯಾಗಿ ಎಂಜಿನ್ ಸಾಮರ್ಥ್ಯ ಹಠಾತ್ ಕುಸಿಯುತ್ತದೆ. ಇಂತಹ ವಾತಾವರಣದಲ್ಲಿ ಸ್ವಲ್ಪ ಹವಾಮಾನ ವೈಪರೀತ್ಯ ಅಥವಾ ತಾಂತ್ರಿಕ ದೋಷ ಎದುರಾದರೂ ಕಂಟ್ರೋಲ್ ತಪ್ಪಿ ಭೀಕರ ಅಪಘಾತಗಳು ಸಂಭವಿಸುತ್ತವೆ.
