ಟ್ವಿಸ್ಟ್ ಮೇಲೆ ಟ್ವಿಸ್ಟ್: ಮಾರಾಟಕ್ಕಲ್ಲ, ಸಂಗ್ರಹಕ್ಕೂ ದಿಕ್ಕಿಲ್ಲ! ಇರಾನ್​ಗೆ ಅಣುಬಾಂಬ್‌ಗಿಂತಲೂ ಭೀಕರವಾಯ್ತು ತೈಲ ಬಿಕ್ಕಟ್ಟು! Iran Oil Crisis

ಜಾಗತಿಕ ಇಂಧನ ಸಂಶೋಧನಾ ಸಂಸ್ಥೆ ಕೆಪ್ಲರ್ ನೀಡಿರುವ ಆಘಾತಕಾರಿ ವರದಿಯ ಪ್ರಕಾರ, ಇರಾನ್ ಬಳಿ ಈಗ ಕೇವಲ 12 ರಿಂದ 22 ದಿನಗಳಿಗೆ ಆಗುವಷ್ಟು ಮಾತ್ರ ಬಳಸದ ತೈಲ ಸಂಗ್ರಹಣಾ ಸಾಮರ್ಥ್ಯ ಉಳಿದಿದೆ. ಒಂದು ವೇಳೆ ಈ ಟ್ಯಾಂಕ್‌ಗಳು ಸಂಪೂರ್ಣವಾಗಿ ಭರ್ತಿಯಾದರೆ, ಇರಾನ್ ಅನಿವಾರ್ಯವಾಗಿ ತನ್ನ ಕಚ್ಚಾ ತೈಲ ಉತ್ಪಾದನೆಯನ್ನು ದಿನಕ್ಕೆ ಸುಮಾರು 1.5 ಮಿಲಿಯನ್ ಬ್ಯಾರೆಲ್‌ಗಳಷ್ಟು ಕಡಿತಗೊಳಿಸಬೇಕಾಗುತ್ತದೆ. ಇದು ಇರಾನ್‌ನ ಆರ್ಥಿಕ ಬೆನ್ನೆಲುಬನ್ನೇ ಮುರಿಯುವ ಸಾಧ್ಯತೆಯಿದೆ.

ಏಪ್ರಿಲ್ ಆರಂಭದಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇರಾನ್ ಬಂದರುಗಳ ಮೇಲೆ ನೌಕಾ ದಿಗ್ಬಂಧನವನ್ನು ಘೋಷಿಸಿದಾಗಿನಿಂದ ಇರಾನ್‌ನ ಸ್ಥಿತಿ ಹದಗೆಟ್ಟಿದೆ.

ಮಾರ್ಚ್ ತಿಂಗಳಲ್ಲಿ: ದಿನಕ್ಕೆ ಸರಾಸರಿ 1.85 ಮಿಲಿಯನ್ ಬ್ಯಾರೆಲ್ ರಫ್ತಾಗುತ್ತಿತ್ತು.

ಪ್ರಸ್ತುತ ಸ್ಥಿತಿ: ಈ ಪ್ರಮಾಣ ಕೇವಲ 5,67,000 ಬ್ಯಾರೆಲ್‌ಗಳಿಗೆ ಕುಸಿದಿದೆ.

ಅಂದರೆ, ಇರಾನ್‌ನ ತೈಲ ರಫ್ತು ಸರಿಸುಮಾರು ಶೇ. 70ರಷ್ಟು ಕುಸಿತ ಕಂಡಿದೆ. ಹೊರ್ಮುಜ್ ಜಲಸಂಧಿಯಲ್ಲಿ ಅಮೆರಿಕದ ಹಡಗುಗಳು ಹದ್ದಿನ ಕಣ್ಣಿಟ್ಟಿದ್ದು, ಯಾವುದೇ ಟ್ಯಾಂಕರ್‌ಗಳು ಈ ದಿಗ್ಬಂಧನವನ್ನು ಮೀರಿ ಹೋಗಲು ಸಾಧ್ಯವಾಗಿಲ್ಲ ಎಂದು ಕೆಪ್ಲರ್ ಸ್ಪಷ್ಟಪಡಿಸಿದೆ.

ಸದ್ಯಕ್ಕೆ ಇರಾನ್ ಹಣಕಾಸಿನ ಬಿಕ್ಕಟ್ಟು ತಕ್ಷಣಕ್ಕೆ ಕಾಣಿಸದೇ ಇರಬಹುದು. ಇರಾನ್‌ನ ತೈಲವು ನಿರ್ಬಂಧಗಳನ್ನು ತಪ್ಪಿಸಿ ಚೀನಾ ಅಥವಾ ಇತರ ದೇಶಗಳ ಬಂದರುಗಳನ್ನು ತಲುಪಲು ಕನಿಷ್ಠ ಎರಡು ತಿಂಗಳು ಬೇಕಾಗುತ್ತದೆ. ಅಲ್ಲಿಂದ ಪಾವತಿಗಳು ಬರಲು ಇನ್ನೂ ಎರಡು ತಿಂಗಳು ಹಿಡಿಯುತ್ತದೆ. ಹೀಗಾಗಿ, ಈ ಯುದ್ಧ ಮತ್ತು ದಿಗ್ಬಂಧನದ ಪೂರ್ಣ ಪ್ರಮಾಣದ ಆರ್ಥಿಕ ಹೊಡೆತ ಇರಾನ್‌ಗೆ ಇಂದಿನಿಂದ ಮೂರು ಅಥವಾ ನಾಲ್ಕು ತಿಂಗಳ ನಂತರ ಅರಿವಾಗಲಿದೆ.

ಮತ್ತೊಂದೆಡೆ, ಈ ಬಿಕ್ಕಟ್ಟು ಬಗೆಹರಿಸಲು ನಡೆಯಬೇಕಿದ್ದ ಎರಡನೇ ಹಂತದ ಶಾಂತಿ ಮಾತುಕತೆಗಳು ಕೂಡ ವಿಫಲವಾಗಿವೆ. ಪಾಕಿಸ್ತಾನಕ್ಕೆ ತೆರಳಬೇಕಿದ್ದ ತನ್ನ ನಿಯೋಗದ ಪ್ರವಾಸವನ್ನು ಅಧ್ಯಕ್ಷ ಟ್ರಂಪ್ ಕೊನೆಯ ಕ್ಷಣದಲ್ಲಿ ರದ್ದುಗೊಳಿಸಿದ್ದಾರೆ. ಇರಾನ್ ನಾಯಕತ್ವದ ಬಗ್ಗೆ ಟೀಕಿಸಿದ ಟ್ರಂಪ್, ಅಲ್ಲಿ ಯಾರ ಮಾತು ನಡೆಯುತ್ತಿದೆ, ಯಾರ ಕೈಯಲ್ಲಿ ಅಧಿಕಾರವಿದೆ ಎಂಬುದೇ ಯಾರಿಗೂ ಗೊತ್ತಿಲ್ಲ ಎಂದು ಲೇವಡಿ ಮಾಡಿದ್ದಾರೆ.

ಫೆಬ್ರವರಿ 28 ರಂದು ಇಸ್ರೇಲ್ ಮತ್ತು ಅಮೆರಿಕ ಜಂಟಿಯಾಗಿ ಇರಾನ್ ಮೇಲೆ ನಡೆಸಿದ ದಾಳಿಯ ನಂತರ ಈ ಸಂಘರ್ಷ ತೀವ್ರಗೊಂಡಿದೆ. ಇದಕ್ಕೆ ಪ್ರತಿಯಾಗಿ ಇರಾನ್ ಜಗತ್ತಿನ ಪ್ರಮುಖ ತೈಲ ಮಾರ್ಗವಾದ ಹೊರ್ಮುಜ್ ಜಲಸಂಧಿಯ ಮೇಲೆ ಬಿಗಿ ಹಿಡಿತ ಸಾಧಿಸಿದೆ. ವಿಶ್ವದ ಶೇ. 20ರಷ್ಟು ತೈಲ ಈ ಮಾರ್ಗದಲ್ಲೇ ಚಲಿಸಬೇಕಿರುವುದರಿಂದ ಜಾಗತಿಕ ಮಾರುಕಟ್ಟೆಯಲ್ಲಿ ತಲ್ಲಣ ಸೃಷ್ಟಿಯಾಗಿದೆ. ಸೌದಿ ಅರೇಬಿಯಾ, ಇರಾಕ್ ಮತ್ತು ಕುವೈತ್ ಕೂಡ ಪೂರೈಕೆಯಲ್ಲಿ ಕಡಿತ ಮಾಡಿದ್ದು, ಪರಿಸ್ಥಿತಿ ಮತ್ತಷ್ಟು ಸಂಕೀರ್ಣಗೊಂಡಿದೆ.

ಉತ್ಪಾದನಾ ಕಡಿತ: ಸ್ಟೋರೇಜ್ ಟ್ಯಾಂಕ್‌ಗಳು ಭರ್ತಿಯಾದ ತಕ್ಷಣ ತೈಲ ಬಾವಿಗಳನ್ನು ಮುಚ್ಚಬೇಕಾದ ಸ್ಥಿತಿ.

ಆರ್ಥಿಕ ದಿಗ್ಬಂಧನ: ಡಾಲರ್ ವಹಿವಾಟು ಇಲ್ಲದೆ ವಿದೇಶಿ ವಿನಿಮಯಕ್ಕೆ ಹೊಡೆತ.

ತಾಂತ್ರಿಕ ಸಮಸ್ಯೆ: ಒಮ್ಮೆ ತೈಲ ಉತ್ಪಾದನೆ ನಿಲ್ಲಿಸಿದರೆ, ಪುನಃ ಅದನ್ನು ಹಳೆಯ ವೇಗಕ್ಕೆ ತರುವುದು ತಾಂತ್ರಿಕವಾಗಿ ಕಷ್ಟ ಮತ್ತು ದುಬಾರಿಯಾಗಲಿದೆ.

ಸಂಗ್ರಹಣಾ ಸಾಮರ್ಥ್ಯ ಮುಗಿಯುತ್ತಿರುವುದು ಇರಾನ್ ಅನ್ನು ಅಕ್ಷರಶಃ ಗೋಡೆಗೆ ಅಂಟಿಕೊಂಡಿರುವ ಸ್ಥಿತಿಗೆ ತಂದಿದೆ. ಮುಂದಿನ 15 ದಿನಗಳು ಇಡೀ ಮಧ್ಯಪ್ರಾಚ್ಯದ ಇತಿಹಾಸದಲ್ಲಿ ಅತ್ಯಂತ ನಿರ್ಣಾಯಕವಾಗಲಿವೆ,(ಏಜೆನ್ಸೀಸ್​).