ಒಮಾನ್ ಕರಾವಳಿಯಲ್ಲಿ ಇರಾನ್ ಅಟ್ಟಹಾಸ! ಭಾರತೀಯ ಸಿಬ್ಬಂದಿಗಳಿದ್ದ ಹಡಗಿನ ಮೇಲೆ ಗುಂಡಿನ ದಾಳಿ | Iran attacks Indian ship

ಏಪ್ರಿಲ್ 25 ರಂದು ಒಮಾನ್‌ನ ಶಿನಾಸ್ ಬಂದರಿನ ಹೊರವಲಯದಲ್ಲಿ ಈ ಘಟನೆ ಸಂಭವಿಸಿದೆ. ಟೋಗೋ ದೇಶದ ಧ್ವಜ ಹೊಂದಿದ್ದ ಎಂ.ಟಿ. ಸೈರಾನ್ ಹಡಗು ಇತರ ಹಡಗುಗಳೊಂದಿಗೆ ಸಾಗುತ್ತಿದ್ದಾಗ, ಇರಾನ್ ಕೋಸ್ಟ್ ಗಾರ್ಡ್ ಪಡೆಗಳು ಅದನ್ನು ತಡೆದವು. ಹಡಗನ್ನು ನಿಲ್ಲಿಸುವಂತೆ ಎಚ್ಚರಿಕೆ ನೀಡಲು ಇರಾನ್ ಪಡೆಗಳು ಹಡಗಿನ ದಿಕ್ಕಿನಲ್ಲಿ ಸತತವಾಗಿ ಗುಂಡು ಹಾರಿಸಿವೆ. ಇದರಿಂದ ಹಡಗಿನಲ್ಲಿದ್ದ ಭಾರತೀಯ ಸಿಬ್ಬಂದಿಗಳು ತೀವ್ರ ಭೀತಿಗೊಳಗಾಗಿದ್ದರು.

ಕೇಂದ್ರ ಬಂದರು ಮತ್ತು ಹಡಗು ಸಚಿವಾಲಯದ ನಿರ್ದೇಶಕ ಮನ್‌ದೀಪ್ ಸಿಂಗ್ ರಾಂಧವಾ ಈ ಕುರಿತು ಮಾಹಿತಿ ನೀಡಿ, ಇರಾನ್ ಪಡೆಗಳಿಂದ ಹಡಗಿನ ಮೇಲೆ ದಾಳಿ ನಡೆದಿರುವುದು ನಿಜ. ಆದರೆ, ಹಡಗಿನಲ್ಲಿದ್ದ ಎಲ್ಲಾ ಭಾರತೀಯ ಸಿಬ್ಬಂದಿಗಳು ಪ್ರಸ್ತುತ ಸುರಕ್ಷಿತವಾಗಿದ್ದಾರೆ. ಘಟನೆಯ ನಂತರ ಹಡಗು ತನ್ನ ಕಾರ್ಯಾಚರಣೆಯನ್ನು ಮುಂದುವರಿಸಿದೆ ಎಂದು ತಿಳಿಸಿದ್ದಾರೆ.

ಇರಾನ್ ಪಡೆಗಳು ಭಾರತೀಯ ಹಡಗುಗಳನ್ನು ಗುರಿಯಾಗಿಸಿಕೊಂಡಿರುವುದು ಇದು ಮೊದಲಲ್ಲ. ಈ ಹಿಂದೆ ಕೂಡ ಇರಾನ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ ಎರಡು ಪ್ರಮುಖ ಭಾರತೀಯ ಹಡಗುಗಳ ಮೇಲೆ ದಾಳಿ ನಡೆಸಿತ್ತು.

ಈ ಎರಡು ಹಡಗುಗಳು ಸ್ಟ್ರೈಟ್ ಆಫ್ ಹೊರ್ಮುಜ್ ದಾಟಲು ಪ್ರಯತ್ನಿಸುತ್ತಿದ್ದಾಗ ಇರಾನ್ ಪಡೆಗಳು ಗುಂಡು ಹಾರಿಸಿ ಅವುಗಳನ್ನು ಹಿಂತಿರುಗುವಂತೆ ಮಾಡಿದ್ದವು. ಫೆಬ್ರವರಿ 28 ರಂದು ಅಮೆರಿಕ ಮತ್ತು ಇಸ್ರೇಲ್ - ಇರಾನ್ ಮೇಲೆ ದಾಳಿ ನಡೆಸಿದ ನಂತರ, ಇರಾನ್ ಈ ಭಾಗದಲ್ಲಿ ಚಲಿಸುವ ಹಡಗುಗಳ ಮೇಲೆ ತನ್ನ ಆಕ್ರಮಣಕಾರಿ ಧೋರಣೆಯನ್ನು ಹೆಚ್ಚಿಸಿದೆ.

ಭಾರತೀಯ ಧ್ವಜವಿರುವ ಮತ್ತು ಭಾರತೀಯ ಸಿಬ್ಬಂದಿಗಳಿರುವ ಹಡಗುಗಳ ಮೇಲೆ ಪದೇಪದೆ ನಡೆಯುತ್ತಿರುವ ಈ ದಾಳಿಗಳನ್ನು ಭಾರತ ಸರ್ಕಾರ ಗಂಭೀರವಾಗಿ ಪರಿಗಣಿಸಿದೆ. ಇರಾನ್ ಸರ್ಕಾರದ ಮುಂದೆ ಭಾರತ ಈಗಾಗಲೇ ತನ್ನ ಕಠಿಣ ಪ್ರತಿಭಟನೆಯನ್ನು ದಾಖಲಿಸಿದೆ. ಅಂತಾರಾಷ್ಟ್ರೀಯ ಜಲಮಾರ್ಗದಲ್ಲಿ ಮುಕ್ತ ಸಂಚಾರಕ್ಕೆ ಅಡ್ಡಿಪಡಿಸುತ್ತಿರುವುದು ಜಾಗತಿಕ ನಿಯಮಗಳ ಉಲ್ಲಂಘನೆ ಎಂದು ಭಾರತ ಪ್ರತಿಪಾದಿಸಿದೆ.

ಪಶ್ಚಿಮ ಏಷ್ಯಾದಲ್ಲಿ ಅಮೆರಿಕ-ಇಸ್ರೇಲ್ ಮತ್ತು ಇರಾನ್ ನಡುವಿನ ಸಂಘರ್ಷ ಈಗ ಸಮುದ್ರ ಮಾರ್ಗಕ್ಕೂ ವ್ಯಾಪಿಸಿದೆ. ವಿಶ್ವದ ಅತಿ ದೊಡ್ಡ ತೈಲ ಮತ್ತು ರಾಸಾಯನಿಕ ಪೂರೈಕೆ ಮಾರ್ಗವಾಗಿರುವ ಈ ಪ್ರದೇಶದಲ್ಲಿ ಇರಾನ್ ನಡೆಸುತ್ತಿರುವ ಇಂತಹ ಕೃತ್ಯಗಳು ಜಾಗತಿಕ ಆರ್ಥಿಕತೆಯ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಬಹುದು. ಭಾರತೀಯ ನಾವಿಕರು ಮತ್ತು ಹಡಗುಗಳು ಈ ಸಂಘರ್ಷದ ನಡುವೆ ಸಿಲುಕಿರುವುದು ಭಾರತದ ರಕ್ಷಣಾ ನೀತಿಗೆ ಹೊಸ ಸವಾಲನ್ನು ಒಡ್ಡಿದೆ,(ಏಜೆನ್ಸೀಸ್​).