ಗಲ್ಫ್‌ನಲ್ಲಿ ಮಹಾಯುದ್ಧದ ಕಹಳೆ: 2,200 ಮಿಸೈಲ್ ದಾಳಿ ಬಳಿಕ ಇರಾನ್ ವಿರುದ್ಧ ಕೆರಳಿದ ಯುಎಇ! UAE vs Iran

ಕಳೆದ 21 ದಿನಗಳಲ್ಲಿ ಇರಾನ್ ಬರೋಬ್ಬರಿ 2,200ಕ್ಕೂ ಹೆಚ್ಚು ಕ್ಷಿಪಣಿ ಮತ್ತು ಡ್ರೋನ್‌ಗಳನ್ನು ಯುಎಇ ಗುರಿಯಾಗಿಸಿ ಉಡಾಯಿಸಿದೆ. ಯುಎಇಯ ಅತ್ಯಾಧುನಿಕ ವಾಯು ರಕ್ಷಣಾ ವ್ಯವಸ್ಥೆಯು ಇದರಲ್ಲಿ ಶೇ. 95 ರಷ್ಟು ದಾಳಿಗಳನ್ನು ಯಶಸ್ವಿಯಾಗಿ ತಡೆದಿದ್ದರೂ, ಸತತ ಬೆದರಿಕೆಯಿಂದಾಗಿ ದೇಶದ ಆರ್ಥಿಕತೆ ಮತ್ತು ಸುರಕ್ಷತೆಗೆ ಧಕ್ಕೆಯುಂಟಾಗಿದೆ. ಕೇವಲ ಕದನ ವಿರಾಮ ಸಾಕಾಗದು, ಈ ಸಮಸ್ಯೆಗೆ ಶಾಶ್ವತ ಅಂತ್ಯ ಬೇಕು ಎಂದು ಅಮೆರಿಕದಲ್ಲಿರುವ ಯುಎಇ ರಾಯಭಾರಿ ನೀಡಿರುವ ಹೇಳಿಕೆ ಯುದ್ಧದ ಮುನ್ಸೂಚನೆಯನ್ನು ದೃಢಪಡಿಸಿದೆ.

ಅತ್ತ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಹಾರ್ಮುಜ್ ಜಲಸಂಧಿಯನ್ನು ಮರಳಿ ತೆರೆಯಲು ಬೃಹತ್ ಭೂಸೇನಾ ದಾಳಿಗೆ ಸಂಚು ರೂಪಿಸುತ್ತಿದ್ದಾರೆ ಎಂಬ ವದಂತಿಗಳು ಬಲವಾಗಿವೆ. ಏಪ್ರಿಲ್ 6 ರವರೆಗೆ ಇರಾನ್‌ನ ಇಂಧನ ಕೇಂದ್ರಗಳ ಮೇಲೆ ದಾಳಿ ಮಾಡದಿರಲು ಟ್ರಂಪ್ ನಿರ್ಧರಿಸಿದ್ದರೂ, ಒಳಗೊಳಗೆ ಅಮೆರಿಕದ ಸೈನ್ಯವು ಯುಎಇ ನೆಲವನ್ನು ಬಳಸಿಕೊಂಡು ಇರಾನ್ ಮೇಲೆ ಆಕ್ರಮಣ ಮಾಡಲು ಸಿದ್ಧತೆ ನಡೆಸುತ್ತಿದೆ ಎಂದು ವರದಿಯಾಗಿದೆ. ರಷ್ಯಾದ ಗುಪ್ತಚರ ಇಲಾಖೆಯ ಮಾಹಿತಿಯ ಪ್ರಕಾರ, ಅಮೆರಿಕದ ಈ ಭೂಸೇನಾ ದಾಳಿಯು ಯುಎಇಯಿಂದಲೇ ಪ್ರಾರಂಭವಾಗಲಿದೆ ಎಂಬ ಆತಂಕ ಇರಾನ್ ಅನ್ನು ಕಾಡುತ್ತಿದೆ.

ಯುಎಇ ಮತ್ತು ಇರಾನ್ ನಡುವೆ 1971 ರಿಂದಲೂ ಅಬು ಮೂಸಾ ಮತ್ತು ಟನ್ಬ್ ದ್ವೀಪಗಳ ಕುರಿತು ಗಡಿ ವಿವಾದವಿದೆ. ಈ ಆಯಕಟ್ಟಿನ ದ್ವೀಪಗಳನ್ನು ಇರಾನ್ ವಶಪಡಿಸಿಕೊಂಡಿರುವುದು ಯುಎಇಗೆ ದೊಡ್ಡ ನೋವಾಗಿ ಉಳಿದಿದೆ. ಈಗ ಯುದ್ಧದ ನೆಪದಲ್ಲಿ ಈ ದ್ವೀಪಗಳನ್ನು ಮರಳಿ ಪಡೆಯಲು ಯುಎಇ ಪ್ರಯತ್ನಿಸಬಹುದು ಎಂಬ ಭಯ ಇರಾನ್‌ಗೆ ಎದುರಾಗಿದೆ. 2020 ರ ಅಬ್ರಹಾಂ ಒಪ್ಪಂದ ನಂತರ ಇಸ್ರೇಲ್ ಜೊತೆ ಯುಎಇ ಹೊಂದಿರುವ ಆಪ್ತ ಸಂಬಂಧವು ಈ ಯುದ್ಧದ ತೀವ್ರತೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಯುಎಇ ಯುದ್ಧಕ್ಕೆ ಇಳಿದರೆ ಅದರ ನೇರ ಪರಿಣಾಮ ಭಾರತದ ಮೇಲೆ ಬೀರುವುದು ಖಚಿತವಾಗಿದೆ.

ನಿವಾಸಿಗಳ ಆತಂಕ: ಯುಎಇ ಜನಸಂಖ್ಯೆಯ ಶೇ. 40 ರಷ್ಟು, ಅಂದರೆ ಸುಮಾರು 45 ಲಕ್ಷ ಭಾರತೀಯರು ಅಲ್ಲಿ ವಾಸಿಸುತ್ತಿದ್ದಾರೆ. ಅವರ ಸುರಕ್ಷತೆ ಭಾರತಕ್ಕೆ ಅತಿ ದೊಡ್ಡ ಸವಾಲಾಗಿದೆ.

ತೈಲ ಬೆಲೆ: ಗಲ್ಫ್ ಪ್ರದೇಶದಲ್ಲಿ ಯುದ್ಧವಾದರೆ ತೈಲ ಪೂರೈಕೆ ಸ್ಥಗಿತಗೊಂಡು ಭಾರತದಲ್ಲಿ ಪೆಟ್ರೋಲ್, ಡೀಸೆಲ್ ಬೆಲೆ ಗಗನಕ್ಕೇರಲಿದೆ.

ರಾಜತಾಂತ್ರಿಕ ಇಕ್ಕಟ್ಟು: ಇತ್ತೀಚೆಗಷ್ಟೇ ಪ್ರಧಾನಿ ನರೇಂದ್ರ ಮೋದಿ ಅವರು ಯುಎಇ ಅಧ್ಯಕ್ಷ ಶೇಖ್ ಮೊಹಮ್ಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್ ಅವರೊಂದಿಗೆ ಮಾತನಾಡಿ, ಭಾರತೀಯರ ರಕ್ಷಣೆಗೆ ಧನ್ಯವಾದ ಅರ್ಪಿಸಿದ್ದರು. ಭಾರತಕ್ಕೆ ಯುಎಇ ಮತ್ತು ಇರಾನ್ ಎರಡೂ ಆಯಕಟ್ಟಿನ ರಾಷ್ಟ್ರಗಳಾಗಿದ್ದು, ಭಾರತವು ಸಂಕಷ್ಟದ ಪರಿಸ್ಥಿತಿಯಲ್ಲಿದೆ,(ಏಜೆನ್ಸೀಸ್).