ಪರಮಾಣು ಬಾಂಬ್ ಇದೆ, ಆದ್ರೆ ಗಟಾರ ಮುಚ್ಚಳ ಉಳಿಸಿಕೊಳ್ಳೋಕೆ ಯೋಗ್ಯತೆ ಇಲ್ಲ!: ಜನರ ವಿಚಿತ್ರ ಕಳ್ಳತನಕ್ಕೆ ದಂಗಾದ ಪಾಕ್ ಸರ್ಕಾರ | Manhole Covers

ಇಸ್ಲಾಮಾಬಾದ್: ಜಗತ್ತಿನಲ್ಲಿ ಚಿನ್ನ, ಬೆಳ್ಳಿ, ವಜ್ರ, ವೈಢೂರ್ಯ ಕಳ್ಳತನವಾಗೋದನ್ನ ಕೇಳಿದ್ದೇವೆ. ಆದರೆ ದೇಶವೊಂದು ಎಷ್ಟರಮಟ್ಟಿಗೆ ದಿವಾಳಿಯಾಗಬಹುದು ಎಂದರೆ, ಅಲ್ಲಿನ ಜನ ಹೊಟ್ಟೆಪಾಡಿಗಾಗಿ ರಸ್ತೆಯಲ್ಲಿನ ಗಟಾರದ ಮುಚ್ಚಳಗಳನ್ನು (Manhole Covers) ಎಗರಿಸುತ್ತಿದ್ದಾರೆ.

ಹೌದು, ಇದು ನಂಬಲೇಬೇಕಾದ ಕಟು ಸತ್ಯ. ನಮ್ಮ ನೆರೆಯ ರಾಷ್ಟ್ರ ಪಾಕಿಸ್ತಾನ ಈಗ 'ಗಟಾರ ಮುಚ್ಚಳ'ಗಳ ರಕ್ಷಣೆಗೆ ಹೊಸ ಕಾನೂನು ತರುವ ಮೂಲಕ ಜಗತ್ತಿನಾದ್ಯಂತ ನಗೆಪಾಟಲಿಗೀಡಾಗಿದೆ.

ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದ ಮುಖ್ಯಮಂತ್ರಿ ಮರ್ಯಮ್ ನವಾಜ್ ಷರೀಫ್ ಇತ್ತೀಚೆಗೆ ಮೈಕ್ ಹಿಡಿದು ಒಂದು ಗಂಭೀರ ಎಚ್ಚರಿಕೆ ನೀಡಿದ್ದಾರೆ. ಅದೇನಪ್ಪಾ ಅಂದ್ರೆ, ಇನ್ನು ಮುಂದೆ ಯಾರಾದರೂ ಗಟಾರದ ಮುಚ್ಚಳವನ್ನು ಕದ್ದರೆ, ಮಾರಾಟ ಮಾಡಿದರೆ ಅಥವಾ ಖರೀದಿಸಿದರೆ ಅವರಿಗೆ 1 ರಿಂದ 10 ವರ್ಷದವರೆಗೆ ಜೈಲು ಶಿಕ್ಷೆ ನೀಡಲಾಗುತ್ತದೆ.

ಅಷ್ಟೇ ಅಲ್ಲ, ಒಂದು ವೇಳೆ ಮುಚ್ಚಳ ಇಲ್ಲದ ಗಟಾರಕ್ಕೆ ಬಿದ್ದು ಯಾರಾದರೂ ಸತ್ತರೆ, ಕಳ್ಳನಿಗೆ 50 ಲಕ್ಷ ರೂಪಾಯಿ ದಂಡ ಮತ್ತು ಕಠಿಣ ಶಿಕ್ಷೆ ವಿಧಿಸಲಾಗುತ್ತದೆ ಎಂದು ಹೇಳಿದ್ದಾರೆ. ನಾವು ಹಗಲಿನಲ್ಲಿ ಗಟಾರಕ್ಕೆ ಮುಚ್ಚಳ ಹಾಕುತ್ತೇವೆ, ರಾತ್ರೋರಾತ್ರಿ ಅವು ಮಾಯವಾಗುತ್ತವೆ ಎಂದು ಮರ್ಯಮ್ ಅಸಹಾಯಕತೆ ವ್ಯಕ್ತಪಡಿಸಿರೋದು ನೋಡಿದ್ರೆ, ಪಾಕಿಸ್ತಾನದಲ್ಲಿ ಕಳ್ಳರ ಹಾವಳಿ ಎಷ್ಟಿದೆ ಎಂಬುದು ಅರ್ಥವಾಗುತ್ತದೆ.

ಪಾಕಿಸ್ತಾನದ ಆರ್ಥಿಕತೆ ಎಷ್ಟು ಹದಗೆಟ್ಟಿದೆ ಅಂದ್ರೆ, ಜನರು ಒಂದು ಹೊತ್ತಿನ ಗಂಜಿಗಾಗಿ ಸ್ಕ್ರ್ಯಾಪ್ (ಹಳೆ ಕಬ್ಬಿಣ) ಅಂಗಡಿಗಳಿಗೆ ಈ ಮ್ಯಾನ್‌ಹೋಲ್ ಮುಚ್ಚಳಗಳನ್ನು ಮಾರಿ ಹಣ ಮಾಡುತ್ತಿದ್ದಾರೆ. ವರ್ಷಕ್ಕೆ ಬರೋಬ್ಬರಿ 10,000 ಮುಚ್ಚಳಗಳು ಕಾಣೆಯಾಗುತ್ತಿವೆ ಎಂದರೆ ಅಲ್ಲಿನ ರಸ್ತೆಗಳು ಈಗ ಸಾವು-ಬದುಕಿನ ನಡುವಿನ 'ಮೈನ್‌ಫೀಲ್ಡ್' ತರಹ ಆಗಿವೆ.

ನೆಟ್ಟಿಗರಂತೂ ಈ ವಿಷಯವನ್ನ ಹಿಡಿದು ಹಿಗ್ಗಾಮುಗ್ಗಾ ಟ್ರೋಲ್ ಮಾಡುತ್ತಿದ್ದಾರೆ. ಗಟಾರದ ಮುಚ್ಚಳಗಳೇ ರಾಷ್ಟ್ರೀಯ ಸಂಪತ್ತಾದ ಮೇಲೆ, ಆ ದೇಶದ ಆರ್ಥಿಕತೆ ಉತ್ತುಂಗದಲ್ಲಿದೆ ಎಂದೇ ಅರ್ಥ! ಎಂದು ಒಬ್ಬರು ಕಾಮೆಂಟ್ ಮಾಡಿದರೆ, ಇನ್ನೊಬ್ಬರು ಇದು ಒಳ್ಳೆ ಐಡಿಯಾ, ಹೇಗಿದ್ದರೂ ತಿನ್ನೋಕೆ ಅನ್ನವಿಲ್ಲ, ಮುಚ್ಚಳ ಕದ್ದು ಜೈಲಿಗೆ ಹೋದರೆ ಅಲ್ಲಿ ಕನಿಷ್ಠ ಪಕ್ಷ ಉಚಿತವಾಗಿ ಊಟವಾದರೂ ಸಿಗುತ್ತದೆ! ಎಂದು ವ್ಯಂಗ್ಯವಾಡಿದ್ದಾರೆ.

ಕೇಳಲು ಇದು ತಮಾಷೆಯಾಗಿ ಕಂಡರೂ, ಇದರ ಪರಿಣಾಮ ಮಾತ್ರ ಭೀಕರವಾಗಿದೆ. ಕಳೆದ ಜನವರಿಯಲ್ಲಿ ಲಾಹೋರ್‌ನಲ್ಲಿ ತೆರೆದ ಮ್ಯಾನ್‌ಹೋಲ್‌ಗೆ ಬಿದ್ದು ತಾಯಿ ಮತ್ತು ಹಸುಗೂಸು ದಾರುಣವಾಗಿ ಸಾವನ್ನಪ್ಪಿದ್ದಾರೆ. ಕರಾಚಿಯಲ್ಲೂ ಇಂತಹ ಘಟನೆಗಳು ನಿರಂತರವಾಗಿ ನಡೆಯುತ್ತಿವೆ. ಕಳ್ಳರು ಮುಚ್ಚಳ ಕದ್ದೊಯ್ದ ಜಾಗದಲ್ಲಿ ಈಗ ಸಾವು ಹೊಂಚು ಹಾಕುತ್ತಿದೆ.

ಒಟ್ಟಿನಲ್ಲಿ, ಪರಮಾಣು ಬಾಂಬ್ ಹೊಂದಿದ್ದೇವೆ ಎಂದು ಬಡಾಯಿ ಕೊಚ್ಚಿಕೊಳ್ಳುವ ಪಾಕಿಸ್ತಾನಕ್ಕೆ, ಇಂದು ತನ್ನ ದೇಶದ ಗಟಾರಗಳನ್ನು ಮುಚ್ಚಿಡಲು ಸಾಧ್ಯವಾಗುತ್ತಿಲ್ಲ ಅನ್ನೋದು ವಿಪರ್ಯಾಸ. ಮುಂದೊಂದು ದಿನ ಪಾಕಿಸ್ತಾನದ ರಸ್ತೆಗಳೇ ಕಳ್ಳತನವಾದರೂ ಅಚ್ಚರಿಪಡಬೇಕಿಲ್ಲ ಎನ್ನುವುದು ನೆಟ್ಟಿಗರ ಭವಿಷ್ಯವಾಣಿಯಾಗಿದೆ,(ಏಜನ್ಸೀಸ್​).