ಇರಾನ್ ಕ್ಷಿಪಣಿ ಘರ್ಜನೆಗೆ ಜಗತ್ತೇ ದಿಗ್ಭ್ರಮೆ; ನೌಕಾಪಡೆಯ ಬತ್ತಳಿಕೆಯಲ್ಲಿದೆ ಹೊಸ ಬ್ರಹ್ಮಾಸ್ತ್ರ..? Iran

ವಿಶ್ವದ ಅತಿ ದೊಡ್ಡ ತೈಲ ಸಾಗಾಣಿಕಾ ಮಾರ್ಗವಾದ ಹಾರ್ಮುಜ್ ಜಲಸಂಧಿಯಲ್ಲಿ ನಡೆದ ಸ್ಮಾರ್ಟ್ ಕಂಟ್ರೋಲ್ ಮಿಲಿಟರಿ ಸಮರಾಭ್ಯಾಸದ ವೇಳೆ ಈ ಪರೀಕ್ಷೆ ನಡೆದಿದೆ. ಇರಾನ್‌ನ ಅತ್ಯಾಧುನಿಕ ಯುದ್ಧನೌಕೆ 'ಶಾಹಿದ್ ಸೈಯದ್ ಶಿರಾಜಿನಿಂದ ಈ ಕ್ಷಿಪಣಿಯನ್ನು ಉಡಾವಣೆ ಮಾಡಲಾಯಿತು. ಇದು ನೌಕಾಪಡೆಯ ಇತಿಹಾಸದಲ್ಲೇ ಮೊದಲ ಬಾರಿಗೆ ದೀರ್ಘ ವ್ಯಾಪ್ತಿಯ ವಾಯು ರಕ್ಷಣಾ ವ್ಯವಸ್ಥೆಯನ್ನು ಸಮುದ್ರದ ಮೇಲೆ ಕಾರ್ಯಾಚರಣೆಗೆ ಇಳಿಸಿದ ಘಟನೆಯಾಗಿದೆ.

ಈ ಕ್ಷಿಪಣಿಯು ಕೇವಲ ರಕ್ಷಣಾತ್ಮಕವಲ್ಲ, ಬದಲಿಗೆ ಶತ್ರು ಪಡೆಗಳ ಯುದ್ಧ ವಿಮಾನಗಳನ್ನು ಪುಡಿಪುಡಿ ಮಾಡುವ ಸಾಮರ್ಥ್ಯ ಹೊಂದಿದೆ.

ವ್ಯಾಪ್ತಿ: ಸುಮಾರು 150 ಕಿಲೋಮೀಟರ್ ದೂರದಲ್ಲಿರುವ ಗುರಿಯನ್ನು ನಿಖರವಾಗಿ ಧ್ವಂಸ ಮಾಡಬಲ್ಲದು.

ಲಂಬ ಉಡಾವಣೆ: ಈ ಕ್ಷಿಪಣಿಯು ನೌಕೆಯಿಂದ ಲಂಬವಾಗಿ ಚಿಮ್ಮುವ ಸಾಮರ್ಥ್ಯ ಹೊಂದಿದ್ದು, ಯಾವುದೇ ದಿಕ್ಕಿನಿಂದ ಬರುವ ಅಪಾಯವನ್ನು 360 ಡಿಗ್ರಿಯಲ್ಲಿ ತಡೆಯಬಲ್ಲದು.

ಗುರಿಗಳು: ಇದು ಫೈಟರ್ ಜೆಟ್‌ಗಳು, ಅತ್ಯಾಧುನಿಕ ಡ್ರೋನ್‌ಗಳು ಮತ್ತು ಕ್ರೂಸ್ ಕ್ಷಿಪಣಿಗಳನ್ನು ಆಕಾಶದಲ್ಲೇ ಹೊಡೆದುರುಳಿಸುವ ಶಕ್ತಿ ಹೊಂದಿದೆ.

ಇತ್ತೀಚಿನ ವರದಿಗಳ ಪ್ರಕಾರ, ಅಮೆರಿಕವು ಇರಾನ್‌ನ ಪರಮಾಣು ಕೇಂದ್ರಗಳು ಮತ್ತು ಮಿಲಿಟರಿ ನೆಲೆಗಳ ಮೇಲೆ ಸೀಮಿತ ದಾಳಿ ನಡೆಸಲು ಸಜ್ಜಾಗುತ್ತಿದೆ ಎನ್ನಲಾಗಿದೆ. ಇದಕ್ಕೆ ಪ್ರತಿಯಾಗಿ ಇರಾನ್ ಈ ಕ್ಷಿಪಣಿ ಪರೀಕ್ಷೆಯ ಮೂಲಕ ತನ್ನ ನೌಕಾ ರಕ್ಷಣಾ ಛತ್ರಿ ಎಷ್ಟು ಬಲಿಷ್ಠವಾಗಿದೆ ಎಂಬುದನ್ನು ಜಗತ್ತಿಗೆ ತೋರಿಸಿಕೊಟ್ಟಿದೆ.

ನಮ್ಮ ಸಾರ್ವಭೌಮತ್ವಕ್ಕೆ ಧಕ್ಕೆ ತಂದರೆ ನಾವು ಸುಮ್ಮನಿರುವುದಿಲ್ಲ. ನಮ್ಮ ಸಮುದ್ರ ಗಡಿಯಲ್ಲಿ ಯಾವುದೇ ಹಾರುವ ಶತ್ರು ವಸ್ತುವನ್ನು ಹೊಡೆದುರುಳಿಸಲು ನಾವು ಸನ್ನದ್ಧರಾಗಿದ್ದೇವೆ ಎಂದು IRGC ಕಮಾಂಡರ್‌ಗಳು ಗುಡುಗಿದ್ದಾರೆ.

ಮಧ್ಯಪ್ರಾಚ್ಯದಲ್ಲಿ ಇರಾನ್, ರಷ್ಯಾ ಮತ್ತು ಚೀನಾ ಸೇನಾ ಪಡೆಗಳ ಜಂಟಿ ಚಟುವಟಿಕೆಗಳು ಹೆಚ್ಚಾಗುತ್ತಿದ್ದು, ಅಮೆರಿಕದ ಪ್ರತಿಯೊಂದು ನಡೆಗೂ ಇರಾನ್ ತಕ್ಕ ಉತ್ತರ ನೀಡಲು ಸಜ್ಜಾಗಿದೆ,(ಏಜೆನ್ಸೀಸ್).