ಜಗತ್ತಿಗೆ ಶಾಂತಿ ಸಂದೇಶ ಪಠಿಸಿ 'ಸೈತಾನ II' ಉಡಾಯಿಸಿದ ಪುಟಿನ್: ಈ ಪರಮಾಣು ಕ್ಷಿಪಣಿಯ ಅಸಲಿ ತಾಕತ್ತೇನು ಗೊತ್ತಾ? Russia Test Sarmat Missile

ಮಾಸ್ಕೋ: ಉಕ್ರೇನ್ ಜೊತೆಗಿನ ರಕ್ತಸಿಕ್ತ ಯುದ್ಧ ಸದ್ಯದಲ್ಲೇ ಕೊನೆಗೊಳ್ಳಲಿದೆ ಎಂದು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಜಗತ್ತಿಗೆ ಶಾಂತಿ ಸಂದೇಶ ನೀಡಿದ ಕೆಲವೇ ದಿನಗಳಲ್ಲಿ, ರಷ್ಯಾ ಇಡೀ ವಿಶ್ವವೇ ಬೆಚ್ಚಿಬೀಳುವಂತಹ ಕೆಲಸವೊಂದನ್ನು ಮಾಡಿದೆ.

ಹೌದು, ತನ್ನ ಪರಮಾಣು ಪಡೆಗಳನ್ನು ಆಧುನೀಕರಿಸುವ ಭರದಲ್ಲಿ ರಷ್ಯಾ ಮಂಗಳವಾರ (ಮೇ.12) ಅತ್ಯಂತ ಶಕ್ತಿಶಾಲಿ ಹೊಸ ಖಂಡಾಂತರ ಬ್ಯಾಲಿಸ್ಟಿಕ್ ಕ್ಷಿಪಣಿಯ (ICBM) ಪರೀಕ್ಷೆಯನ್ನು ಯಶಸ್ವಿಯಾಗಿ ನಡೆಸಿದೆ.

ರಷ್ಯಾ ಪರೀಕ್ಷಿಸಿರುವ ಈ ಪರಮಾಣು ಶಸ್ತ್ರಸಜ್ಜಿತ ಕ್ಷಿಪಣಿಯ ಹೆಸರು ‘ಸರ್ಮತ್’(Russia Test Sarmat Missile). ಆದರೆ ಪಾಶ್ಚಿಮಾತ್ಯ ದೇಶಗಳು ಮತ್ತು ಅಮೆರಿಕ ಇದನ್ನು ಸೈತಾನ II (Satan II) ಎಂದು ಕರೆದಿದೆ. ಸೋವಿಯತ್ ಕಾಲದ ಹಳೆಯ ವೊಯೆವೊಡಾ ಕ್ಷಿಪಣಿಗಳನ್ನು ಬದಲಿಸಲು ಇದನ್ನು ತಯಾರಿಸಲಾಗಿದೆ.

ಅನಿಯಮಿತ ವ್ಯಾಪ್ತಿ: ಇದು ಭೂಮಿಯ ಕೆಳಕಕ್ಷೆಯಲ್ಲಿ ಹಾರಾಟ ನಡೆಸಬಲ್ಲದು. ಅಂದರೆ 35,000 ಕಿಲೋಮೀಟರ್‌ಗಿಂತಲೂ ಹೆಚ್ಚು ದೂರದ ಗುರಿಯನ್ನು ಇದು ತಲುಪಬಲ್ಲದು.

ಕಳೆದ ಶನಿವಾರವಷ್ಟೇ ಎರಡನೇ ಮಹಾಯುದ್ಧದ ವಿಜಯೋತ್ಸವದ ಅಂಗವಾಗಿ ರೆಡ್ ಸ್ಕ್ವೇರ್‌ನಲ್ಲಿ ನಡೆದ ಮಿಲಿಟರಿ ಮೆರವಣಿಗೆಯಲ್ಲಿ ಮಾತನಾಡಿದ್ದ ಪುಟಿನ್, ಉಕ್ರೇನ್‌ನಲ್ಲಿನ ಹೋರಾಟ ಕೊನೆಗೊಳ್ಳುವ ಹಂತಕ್ಕೆ ಬಂದಿದೆ ಎಂದು ಹೇಳಿದ್ದರು.

ಆದರೆ, ಉಕ್ರೇನ್‌ಗೆ ಬೆಂಬಲ ನೀಡುತ್ತಿರುವ ಅಮೆರಿಕ ಮತ್ತು ಯುರೋಪ್ ದೇಶಗಳು ರಷ್ಯಾದ ವಿರುದ್ಧ ಅತಿಯಾಗಿ ಹಸ್ತಕ್ಷೇಪ ಮಾಡದಂತೆ ತಡೆಯಲು ಪುಟಿನ್ ಈ ಪರಮಾಣು ಅಸ್ತ್ರವನ್ನು ಪ್ರದರ್ಶಿಸುತ್ತಿದ್ದಾರೆ ಎಂಬುದು ರಕ್ಷಣಾ ತಜ್ಞರ ವಾದವಾಗಿದೆ.

2000ರಲ್ಲಿ ಅಧಿಕಾರಕ್ಕೆ ಬಂದಾಗಿನಿಂದ ಪುಟಿನ್ ರಷ್ಯಾದ ಸೈನ್ಯವನ್ನು ಸಂಪೂರ್ಣ ಡಿಜಿಟಲ್ ಮತ್ತು ಮಾಡರ್ನ್ ಮಾಡಲು ಹಠ ತೊಟ್ಟಿದ್ದಾರೆ. ನೂರಾರು ಹೊಸ ಕ್ಷಿಪಣಿಗಳು, ಅತ್ಯಾಧುನಿಕ ಪರಮಾಣು ಜಲಾಂತರ್ಗಾಮಿಗಳು ಮತ್ತು ಅಣುಬಾಂಬ್ ಹಾಕುವ ಯುದ್ಧವಿಮಾನಗಳನ್ನು ರಷ್ಯಾ ಸದ್ದಿಲ್ಲದೆ ಸಿದ್ಧಪಡಿಸಿಕೊಳ್ಳುತ್ತಿದೆ.

ಇನ್ನೊಂದು ಆತಂಕಕಾರಿ ವಿಷಯವೆಂದರೆ, ರಷ್ಯಾ ಮತ್ತು ಅಮೆರಿಕ ನಡುವೆ ಇದ್ದ ಕೊನೆಯ ಪರಮಾಣು ಶಸ್ತ್ರಾಸ್ತ್ರ ಒಪ್ಪಂದವು ಇದೇ ಫೆಬ್ರವರಿಯಲ್ಲಿ ಮುಕ್ತಾಯಗೊಂಡಿದೆ. ಅಂದರೆ ಅರ್ಧ ಶತಮಾನದ ನಂತರ ಇದೇ ಮೊದಲ ಬಾರಿಗೆ, ವಿಶ್ವದ ಅತಿ ದೊಡ್ಡ ಪರಮಾಣು ಶಕ್ತಿ ಹೊಂದಿರುವ ಈ ಎರಡು ದೇಶಗಳ ಮೇಲೆ ಯಾವುದೇ ಕಾನೂನು ಮಿತಿಗಳಿಲ್ಲ. ಇದು ಜಗತ್ತಿನಲ್ಲಿ ಮತ್ತೆ ಅಣು ಅಸ್ತ್ರಗಳ ರೇಸ್ ಆರಂಭವಾಗುವ ಭಯವನ್ನು ಹುಟ್ಟಿಸಿದೆ ಎಂದರೆ ಸುಳ್ಳಲ್ಲ, (ಏಜನ್ಸೀಸ್​).