ತೈಲ ಸಮರ ತಾರಕಕ್ಕೆ: ಇರಾನ್ ಪರವಾಗಿ ಅಮೆರಿಕದ ವಿರುದ್ಧ ತೊಡೆತಟ್ಟಿದ ಚೀನಾ! ಟ್ರಂಪ್ ಎಚ್ಚರಿಕೆಗೆ ಡೋಂಟ್ ಕೇರ್ ಅಂದಿದ್ದೇಕೆ ಡ್ರ್ಯಾಗನ್! China Vs US

ಚೀನಾದ ರಕ್ಷಣಾ ಸಚಿವ ಅಡ್ಮಿರಲ್ ಡಾಂಗ್ ಜುನ್ ಈ ಕುರಿತು ಅಧಿಕೃತ ಹೇಳಿಕೆ ನೀಡಿದ್ದು, ಚೀನಾ ಜಾಗತಿಕ ಶಾಂತಿಯನ್ನು ಬಯಸುತ್ತದೆ. ಆದರೆ ಇರಾನ್ ಜೊತೆಗಿನ ನಮ್ಮ ಆರ್ಥಿಕ ಒಪ್ಪಂದಗಳನ್ನು ಗೌರವಿಸುತ್ತೇವೆ. ನಮ್ಮ ಹಡಗುಗಳು ಹೋರ್ಮುಜ್ ಜಲಸಂಧಿಯಲ್ಲಿ ಸಾಮಾನ್ಯ ರೀತಿಯಲ್ಲೇ ಸಂಚರಿಸಲಿವೆ ಎಂದು ಸ್ಪಷ್ಟಪಡಿಸಿದ್ದಾರೆ. ಇರಾನ್‌ನ ಸಾರ್ವಭೌಮತ್ವದ ಮೇಲೆ ಬೇರೆ ದೇಶಗಳು ಹಸ್ತಕ್ಷೇಪ ಮಾಡುವುದನ್ನು ಚೀನಾ ತೀವ್ರವಾಗಿ ವಿರೋಧಿಸಿದೆ.

ಇರಾನ್‌ಗೆ ಚೀನಾ ಶಸ್ತ್ರಾಸ್ತ್ರಗಳನ್ನು ನೀಡುತ್ತಿದೆ ಎಂಬ ಟ್ರಂಪ್ ಅವರ ಆರೋಪವನ್ನು ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರ ಗುವೊ ಜಿಯಾಕುನ್ ತಳ್ಳಿಹಾಕಿದ್ದಾರೆ. ಚೀನಾ ಇರಾನ್‌ಗೆ ಕ್ಷಿಪಣಿಗಳನ್ನು ನೀಡುತ್ತಿದೆ ಎಂಬ ವರದಿಗಳು ಸಂಪೂರ್ಣ ಆಧಾರರಹಿತ. ನಾವು ಅಂತಾರಾಷ್ಟ್ರೀಯ ರಫ್ತು ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುತ್ತಿದ್ದೇವೆ ಎಂದು ಹೇಳಿದ್ದಾರೆ. ಅದರೆ, ಇಸ್ಲಾಮಾಬಾದ್ ಮಾತುಕತೆ ವಿಫಲವಾಗಲು ಅಮೆರಿಕದ ಹಠಮಾರಿ ಧೋರಣೆಯೇ ಕಾರಣ ಎಂದು ಚೀನಾ ದೂರಿದೆ.

ವಿಶ್ವದ ಒಟ್ಟು ತೈಲ ಪೂರೈಕೆಯ ಸುಮಾರು ಶೇ. 20ರಷ್ಟು ಹೋರ್ಮುಜ್ ಜಲಸಂಧಿಯ ಮೂಲಕವೇ ಸಾಗುತ್ತದೆ. ಚೀನಾಕ್ಕೆ ಬೇಕಾದ ಇಂಧನದ ಬಹುಭಾಗ ಈ ಮಾರ್ಗದಿಂದಲೇ ಬರುತ್ತದೆ.

ಟ್ರಂಪ್ ಬೆದರಿಕೆ: ಇರಾನ್ ಬಂದರುಗಳಿಗೆ ಹಡಗುಗಳು ಹೋಗದಂತೆ ತಡೆಯುವುದು ಮತ್ತು ಇರಾನ್‌ಗೆ ಟೋಲ್ ಕಟ್ಟುವ ಹಡಗುಗಳನ್ನು ವಶಪಡಿಸಿಕೊಳ್ಳುವುದು.

ಚೀನಾದ ಪ್ರತಿರೋಧ: ತನ್ನ ವ್ಯಾಪಾರೀ ಹಡಗುಗಳಿಗೆ ರಕ್ಷಣೆ ನೀಡಲು ಚೀನಾ ತನ್ನ ನೌಕಾಪಡೆಯನ್ನು ಹೋರ್ಮುಜ್ ಜಲಸಂಧಿಗೆ ಕಳುಹಿಸುವ ಸಾಧ್ಯತೆಯಿದೆ.

ಒಂದು ವೇಳೆ ಅಮೆರಿಕ ಮತ್ತು ಚೀನಾದ ನೌಕಾಪಡೆಗಳು ಈ ಜಲಸಂಧಿಯಲ್ಲಿ ಮುಖಾಮುಖಿಯಾದರೆ, ಅದು ಕೇವಲ ಪ್ರಾದೇಶಿಕ ಯುದ್ಧವಾಗಿ ಉಳಿಯದೆ ಜಾಗತಿಕ ಮಹಾಯುದ್ಧಕ್ಕೆ ನಾಂದಿಯಾಗಬಹುದು ಎಂಬ ಭೀತಿ ಎದುರಾಗಿದೆ.

ಚೀನಾದ ಈ ಕಠಿಣ ನಿಲುವು ಹೊರಬರುತ್ತಿದ್ದಂತೆ ಜಾಗತಿಕ ಷೇರು ಮಾರುಕಟ್ಟೆಗಳು ಕುಸಿದಿವೆ. ತೈಲ ಬೆಲೆಗಳು ನಿಯಂತ್ರಣಕ್ಕೆ ಸಿಗದಷ್ಟು ಏರಿಕೆಯಾಗುವ ಲಕ್ಷಣಗಳು ಕಾಣುತ್ತಿವೆ. ಇಸ್ಲಾಮಾಬಾದ್‌ನಲ್ಲಿ ನಡೆದ ಶಾಂತಿ ಮಾತುಕತೆಗಳು ಹಳಿ ತಪ್ಪಿರುವುದು ಮತ್ತು ಈಗ ಚೀನಾ ರಂಗಪ್ರವೇಶ ಮಾಡಿರುವುದು ಇಡೀ ಏಷ್ಯಾ ಮತ್ತು ಯುರೋಪ್ ರಾಷ್ಟ್ರಗಳಲ್ಲಿ ಆತಂಕ ಮೂಡಿಸಿದೆ.

ತಜ್ಞರ ಪ್ರಕಾರ, ಚೀನಾ ಇರಾನ್ ಅನ್ನು ಬೆಂಬಲಿಸುವ ಮೂಲಕ ಪಶ್ಚಿಮ ಏಷ್ಯಾದಲ್ಲಿ ತನ್ನ ಪ್ರಭಾವವನ್ನು ಹೆಚ್ಚಿಸಿಕೊಳ್ಳಲು ಪ್ರಯತ್ನಿಸುತ್ತಿದೆ. ಅಮೆರಿಕದ ಆರ್ಥಿಕ ನಿರ್ಬಂಧಗಳನ್ನು ಎದುರಿಸಲು ಇರಾನ್‌ಗೆ ಚೀನಾದ ಬೆಂಬಲ ದೊಡ್ಡ ಬಲ ನೀಡಿದೆ. ಇದು ಟ್ರಂಪ್ ಅವರ ಅಮೆರಿಕ ಫಸ್ಟ್ ನೀತಿಗೆ ದೊಡ್ಡ ಸವಾಲಾಗಿದೆ,(ಏಜೆನ್ಸೀಸ್).