ನಾನು ಹೇಳಿದಂತೆ ನೆತನ್ಯಾಹು ಕೇಳುತ್ತಾರೆ! ಇರಾನ್ ವಿಚಾರದಲ್ಲಿ ಟ್ರಂಪ್ ಹೇಳಿಕೆ; ಇಸ್ರೇಲ್ ಪ್ರಧಾನಿ ಪರ ಅಮೆರಿಕ ಅಧ್ಯಕ್ಷರ ಬ್ಯಾಟಿಂಗ್! Donald Trump

ಇರಾನ್ ಮೇಲಿನ ಸಂಭವನೀಯ ಮಿಲಿಟರಿ ದಾಳಿಯ ಬಗ್ಗೆ ನೀವು ಇತ್ತೀಚೆಗೆ ನೆತನ್ಯಾಹು ಅವರೊಂದಿಗೆ ಏನು ಚರ್ಚಿಸಿದ್ದೀರಿ ಎಂದು ವರದಿಗಾರರು ಕೇಳಿದ ಪ್ರಶ್ನೆಗೆ ಟ್ರಂಪ್ ಯಾವುದೇ ಹಿಂಜರಿಕೆಯಿಲ್ಲದೆ ನೇರವಾಗಿ ಉತ್ತರಿಸಿದ್ದಾರೆ.

ಇಸ್ರೇಲ್​ ಪ್ರಧಾನಿ ನಾನು ಹೇಳಿದ ಹಾಗೆ ಕೇಳುತ್ತಾರೆ. ಅವರು ತುಂಬಾ ಒಳ್ಳೆಯ ಮನುಷ್ಯ ಮತ್ತು ಅದ್ಭುತ ವ್ಯಕ್ತಿಯಾಗಿದ್ದಾರೆ. ಅವರು ಒಬ್ಬ ಯುದ್ಧಕಾಲದ ಪ್ರಧಾನ ಮಂತ್ರಿ ಎಂಬುದನ್ನು ಯಾರೂ ಮರೆಯಬಾರದು. ಹಾಗಾಗಿ ನಾನು ಅವರಿಗೆ ಏನು ಮಾಡಲು ಹೇಳುತ್ತೇನೋ, ಅವರು ಅದನ್ನೇ ಮಾಡುತ್ತಾರೆ ಎಂದು ಟ್ರಂಪ್ ಗುಡುಗಿದ್ದಾರೆ.

ಇಸ್ರೇಲ್‌ನಲ್ಲಿ ಭ್ರಷ್ಟಾಚಾರದ ಗಂಭೀರ ಆರೋಪಗಳನ್ನು ಎದುರಿಸುತ್ತಿರುವ ಮತ್ತು ಸ್ವದೇಶದಲ್ಲೇ ತೀವ್ರ ಟೀಕೆಗೆ ಒಳಗಾಗಿರುವ ಬೆಂಜಮಿನ್ ನೆತನ್ಯಾಹು ಅವರ ರಕ್ಷಣೆಗೆ ಅಮೆರಿಕ ಅಧ್ಯಕ್ಷರು ಧಾವಿಸಿದ್ದಾರೆ. ಹಲವು ಸಂದರ್ಭಗಳಲ್ಲಿ ನೆತನ್ಯಾಹು ಅವರಿಗೆ ಅಧ್ಯಕ್ಷೀಯ ಕ್ಷಮಾದಾನ ನೀಡಬೇಕು ಎಂದು ಬಹಿರಂಗವಾಗಿ ಮನವಿ ಮಾಡಿದ್ದ ಟ್ರಂಪ್, ಮತ್ತೊಮ್ಮೆ ಇಸ್ರೇಲ್ ಪ್ರಧಾನಿ ಪರ ವಕಾಲತ್ತು ವಹಿಸಿದ್ದಾರೆ.

ನನ್ನ ವೈಯಕ್ತಿಕ ಅಭಿಪ್ರಾಯದ ಪ್ರಕಾರ, ಇಸ್ರೇಲ್‌ನಲ್ಲಿ ನೆತನ್ಯಾಹು ಅವರನ್ನು ಸರಿಯಾಗಿ ನಡೆಸಿಕೊಳ್ಳುತ್ತಿಲ್ಲ. ಅವರು ದೇಶಕ್ಕಾಗಿ ಅಷ್ಟೆಲ್ಲಾ ಶ್ರಮಿಸಿದರೂ ಅವರ ವಿರುದ್ಧ ತಾರತಮ್ಯ ಮಾಡಲಾಗುತ್ತಿದೆ ಎಂದು ಟ್ರಂಪ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಈ ಬಗ್ಗೆ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡುತ್ತಾ ಟ್ರಂಪ್ ಇಸ್ರೇಲ್ ರಾಜಕಾರಣದ ಬಗ್ಗೆ ಭಾರಿ ಜೋಕ್ ಮಾಡಿದರು. ಅಮೆರಿಕದ ಅಧ್ಯಕ್ಷ ಸ್ಥಾನದ ಅವಧಿ ಮುಗಿದ ಮೇಲೆ ನಾನು ಇಸ್ರೇಲ್‌ಗೆ ಹೋಗಿ ಅಲ್ಲಿನ ಪ್ರಧಾನಿ ಹುದ್ದೆಗೆ ಸ್ಪರ್ಧಿಸಿದರೂ ಆಶ್ಚರ್ಯ ಪಡಬೇಕಾಗಿಲ್ಲ ಎಂದು ಹಾಸ್ಯ ಚಟಾಕಿ ಹಾರಿಸಿದ್ದಾರೆ.

ಅಷ್ಟಕ್ಕೇ ನಿಲ್ಲಿಸದ ಟ್ರಂಪ್, ಇವತ್ತು ಬೆಳಗ್ಗೆ ತಾನೇ ನಾನು ಇಸ್ರೇಲ್‌ನ ಒಂದು ಚುನಾವಣಾ ಸಮೀಕ್ಷೆಯನ್ನು ನೋಡಿದೆ. ಸದ್ಯಕ್ಕೆ ಇಸ್ರೇಲ್‌ನಲ್ಲಿ ನನ್ನ ಜನಪ್ರಿಯತೆ ಶೇ. ೯೯ ರಷ್ಟಿದೆ ಎಂದು ತಮ್ಮದೇ ಶೈಲಿಯಲ್ಲಿ ಬೀಗಿದರು. ಟ್ರಂಪ್ ಅವರ ಈ ಮಾತುಗಳು ಇರಾನ್ ಮತ್ತು ಅಮೆರಿಕ ನಡುವಿನ ರಾಜತಾಂತ್ರಿಕ ಉದ್ವಿಗ್ನತೆಯನ್ನು ಮತ್ತಷ್ಟು ತೀವ್ರಗೊಳಿಸುವ ಸಾಧ್ಯತೆ ಇದೆ,(ಏಜೆನ್ಸೀಸ್).