Lip Plate Tradition: ಹೆಣ್ಣಿನ ಸೌಂದರ್ಯ ಅಂದಾಕ್ಷಣ ನಮಗೆಲ್ಲ ಮೊದಲಿಗೆ ನೆನಪಾಗೋದೇ ಆಕರ್ಷಕ ಮುಖ. ಆ ಅಂದವನ್ನು ದುಪ್ಪಟ್ಟಾಗಿಸುವುದು ಓಲೆ, ಹಣೆಬೊಟ್ಟು, ಮೂಗುತಿ ಸೇರಿದಂತೆ ಇನ್ನಿತರ ವಸ್ತುಗಳು. ಇನ್ನೂ ಕೆಲವರಿಗೆ, ಸುಂದರ ಕಣ್ಣುಗಳು, ಮತ್ತೊಂದಿಷ್ಟು ಜನರಿಗೆ ವಿಭಿನ್ನ ಉಡುಗೆ-ತೊಡುಗೆಗಳು. ಆದರೆ, ಜಗತ್ತಿನ ಪ್ರತಿಯೊಂದು ಭಾಗದಲ್ಲೂ ಸೌಂದರ್ಯಕ್ಕೆ ತನ್ನದೇ ಆದ ವ್ಯಾಖ್ಯಾನವಿದೆ ಎಂಬುದಕ್ಕೆ ಆಫ್ರಿಕಾದ ಇಥಿಯೋಪಿಯಾದಲ್ಲಿ ನಡೆಯುತ್ತಿರುವ ಈ ವಿಚಿತ್ರ ಸಂಪ್ರದಾಯವೇ ಒಂದು ಜ್ವಲಂತ ಸಾಕ್ಷಿ.
ಈ ಸಂಪ್ರದಾಯದ ಹಿಂದೆ
ಇಲ್ಲಿನ ಬುಡಕಟ್ಟು ಜನರಿಗೆ ಸೌಂದರ್ಯದ ಕಲ್ಪನೆ ಮಾತ್ರ ಕೊಂಚ ವಿಚಿತ್ರ ಹಾಗೂ ಅಚ್ಚರಿ ಮೂಡಿಸುವಂತಿದೆ. ಕಾರಣ, ಸಮುದಾಯಗಳ ಮಹಿಳೆಯರು ತಮ್ಮ ಕೆಳತುಟಿಯಲ್ಲಿ ದೊಡ್ಡ ರಂಧ್ರ ಮಾಡಿಸಿಕೊಂಡು, ಅದರಲ್ಲಿ ದುಂಡಗಿನ ತಟ್ಟೆಯಂತಹ ಆಭರಣ ಧರಿಸುತ್ತಾರೆ. ಹೊರಜಗತ್ತಿಗೆ ಅಚ್ಚರಿ ಎನಿಸುವ ಈ ಸಂಪ್ರದಾಯದ ಹಿಂದೆ ಅಡಗಿರುವ ಸಾಂಸ್ಕೃತಿಕ ನಂಬಿಕೆಗಳನ್ನು ಕೇಳಿದರೆ ಒಂದು ನಿಮಿಷ ಮೈಜುಮ್ ಎನಿಸುತ್ತೆ ಹಾಗೂ ಹೀಗೂ ಉಂಟಾ? ಎಂಬ ಪ್ರಶ್ನೆ ಬೆಂಬಿಡದೆ ಕಾಡುತ್ತದೆ.
ಮನುಕುಲದ ಜನನದಿಂದಲೂ ಸೌಂದರ್ಯದ ಪರಿಕಲ್ಪನೆಯು ಬಲವಾದ ಕಲ್ಪನೆಯಾಗಿಯೇ ಉಳಿದಿದೆ. ಜಾಗತಿಕವಾಗಿ ಜನರು ತಮ್ಮದೇ ಆದ ಸೌಂದರ್ಯದ ಬಯಕೆಗಳನ್ನು ಹೊಂದಿದ್ದಾರೆ. ಆದರೆ, ಆಫ್ರಿಕಾದ ಈ ಬುಡಕಟ್ಟು ಜನಾಂಗ ಮಾತ್ರ ಬಹಳ ವಿಚಿತ್ರ ಹಾಗೂ ಹಳೆಯ ಪದ್ದತಿಯನ್ನು ಇಂದಿಗೂ ತಪ್ಪದೇ ಪಾಲಿಸಿಕೊಂಡು ಬರುತ್ತಿದ್ದಾರೆ. ಇವರಲ್ಲಿ ಸೌಂದರ್ಯದ ಬಗ್ಗೆ ತೀರ ವಿಭಿನ್ನವಾದ ಪರಿಕಲ್ಪನೆ ಇದೆ. ಮಹಿಳೆಯರು ತಮ್ಮ ತುಟಿಗಳನ್ನು ಕತ್ತರಿಸಿಕೊಳ್ಳುತ್ತಾರೆ ಮತ್ತು ನಂತರ ಆ ತೂತು ಬಿದ್ದ ಸುತ್ತ ತಟ್ಟೆಗಳನ್ನು ಕಿವಿಗೆ ಓಲೆಯಂತೆ ಹಾಕಿಕೊಳ್ಳುತ್ತಾರೆ.
ಅತ್ಯಂತ ಹಳೆಯ ಸಂಪ್ರದಾಯ
ಒಬ್ಬರ ತುಟಿಗಳನ್ನು ಕತ್ತರಿಸುವುದು ಮತ್ತು ಅವುಗಳ ಮೇಲೆ ತಾವೇ ತಯಾರಿಸುವ ತಟ್ಟೆಗಳನ್ನು ಧರಿಸುವುದು ಇವರ ಅತ್ಯಂತ ಹಳೆಯ ಸಂಪ್ರದಾಯ. ಅಸಲಿಗೆ ಇದು ಅವರ ರೂಪವನ್ನು ಹೆಚ್ಚಿಸುತ್ತದೆ ಎಂಬುದು ಅವರಲ್ಲಿರುವ ಗಾಢವಾದ ನಂಬಿಕೆ. ಇದೊಂದು ನಂಬಿಕೆಯಾಗಿ ಮಾತ್ರ ಉಳಿಯದೆ, ಜನರಲ್ಲಿ ಆಳವಾದ ವಿಶ್ವಾಸ ಮತ್ತು ಪದ್ಧತಿಯನ್ನು ಬೇರೂರಿಸಿದೆ. ಅವರು ತಮ್ಮ ಪರಂಪರೆಯ ಬೇರುಗಳನ್ನು ಗಟ್ಟಿಯಾಗಿ ಹಿಡಿದಿಟ್ಟುಕೊಂಡಿದ್ದಾರೆ ಎಂಬುದಕ್ಕೆ ಇದೇ ಸಾಕ್ಷಿಯಾಗಿದೆ.
ಆಫ್ರಿಕಾದ ಸೂರಿ ಮತ್ತು ಮುರ್ಸಿ ಬುಡಕಟ್ಟುಗಳಲ್ಲಿ ಈ ಲಿಪ್ ಪ್ಲೇಟ್ ಸಂಪ್ರದಾಯವನ್ನು ಮುನ್ನಡೆಸಿಕೊಂಡು ಬರಲಾಗಿದೆ. ಸೂರಿ, ಮುರ್ಸಿ ಮತ್ತು ಸುರ್ಮಾ ಬುಡಕಟ್ಟು ಎಂದು ಕರೆಯಲ್ಪಡುವ ಎರಡು ಜನಾಂಗೀಯ ಗುಂಪುಗಳಾಗಿವೆ. ದಕ್ಷಿಣ ಇಥಿಯೋಪಿಯಾದ ಓಮೋ ಕಣಿವೆಯಲ್ಲಿರುವ ಸ್ಥಳೀಯ ಇಥಿಯೋಪಿಯನ್ ಬುಡಕಟ್ಟುಗಳಿವು. ಮುರ್ಸಿ ಬುಡಕಟ್ಟು ಸೂರಿ ಬುಡಕಟ್ಟಿಗೆ ನಿಕಟ ಸಂಬಂಧ ಹೊಂದಿದೆ ಮತ್ತು ಎರಡೂ ಬುಡಕಟ್ಟುಗಳು ಒಂದೇ ರೀತಿಯ ಸಂಸ್ಕೃತಿಯನ್ನು ಹಂಚಿಕೊಳ್ಳುತ್ತವೆ. ಸಾಂಪ್ರದಾಯಿಕವಾಗಿ, ಎರಡೂ ಟ್ರೈಬಲ್ ಮಹಿಳೆಯರು ತಮ್ಮ ತುಟಿಗಳ ಮೇಲೆ ಅಗಲವಾದ ಲಿಪ್ ಪ್ಲೇಟ್ಗಳನ್ನು ಹಾಕಿಕೊಳ್ಳುತ್ತಾರೆ.
