ಇನ್ಮುಂದೆ ಇಸ್ರೇಲ್​ನ ಐರನ್ ಡೋಮ್ ಆಟ ನೆಡೆಯಲ್ಲ? ಇರಾನ್​ಗೆ ರಷ್ಯಾ-ಚೀನಾ ಕೊಟ್ಟ ಆ ಡೆಡ್ಲಿ ಮಿಸೈಲ್​ನ ಶಕ್ತಿಯೇನು..! Cluster Munitions

ಕ್ಲಸ್ಟರ್ ಬಾಂಬ್‌ಗಳು ಆಧುನಿಕ ಯುದ್ಧದ ಅತ್ಯಂತ ವಿವಾದಾತ್ಮಕ ಆಯುಧಗಳು. ಸಾಮಾನ್ಯ ಕ್ಷಿಪಣಿಗಳು ಒಂದು ಗುರಿಯ ಮೇಲೆ ಅಪ್ಪಳಿಸಿ ಒಮ್ಮೆ ಮಾತ್ರ ಸ್ಫೋಟಗೊಂಡರೆ, ಕ್ಲಸ್ಟರ್ ಕ್ಷಿಪಣಿಗಳು ಆಕಾಶದಲ್ಲಿಯೇ ಸೀಳಿ ನೂರಾರು ಸಣ್ಣ ಬಾಂಬ್‌ಗಳನ್ನು ದೊಡ್ಡ ಪ್ರದೇಶದಾದ್ಯಂತ ಹರಡುತ್ತವೆ.

ಇಸ್ರೇಲ್ ರಕ್ಷಣಾ ಇಲಾಖೆಯ ಪ್ರಕಾರ, ಇರಾನ್ ಬಳಸುತ್ತಿರುವ ಒಂದು ಕ್ಷಿಪಣಿಯು ಸುಮಾರು 80 ಕಿರು ಬಾಂಬ್‌ಗಳನ್ನು ಗಾಳಿಯಲ್ಲಿಯೇ ಬಿಡುಗಡೆ ಮಾಡುವ ಸಾಮರ್ಥ್ಯ ಹೊಂದಿದೆ. ಇವು ಕಿಲೋಮೀಟರ್‌ಗಟ್ಟಲೆ ವ್ಯಾಪ್ತಿಯಲ್ಲಿ ಹರಡಿ ಸಾವು-ನೋವು ಉಂಟುಮಾಡುತ್ತವೆ.

ಇತ್ತೀಚಿನ ವರದಿಗಳ ಪ್ರಕಾರ, ಇರಾನ್ ಉಡಾಯಿಸಿದ ಕನಿಷ್ಠ ಒಂದು ಕ್ಲಸ್ಟರ್ ಕ್ಷಿಪಣಿಯು ಸೆಂಟ್ರಲ್ ಇಸ್ರೇಲ್‌ಗೆ ಅಪ್ಪಳಿಸಿದೆ. ಭೂಮಿಯಿಂದ ಸುಮಾರು 7 ಕಿಲೋಮೀಟರ್ ಎತ್ತರದಲ್ಲಿ ಈ ಕ್ಷಿಪಣಿಯ ವಾರ್‌ಹೆಡ್ ಸೀಳಿಕೊಂಡಿದ್ದು, ಸುಮಾರು 20 ಸಣ್ಣ ಬಾಂಬ್‌ಗಳು 8 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಚೆಲ್ಲಾಪಿಲ್ಲಿಯಾಗಿ ಬಿದ್ದಿವೆ.

ಟೆಲ್ ಅವೀವ್ ಸಮೀಪದ ಅಜೋರ್ ಪಟ್ಟಣದ ಮನೆಯೊಂದಕ್ಕೆ ಈ ಬಾಂಬ್ ಅಪ್ಪಳಿಸಿ ಭಾರಿ ಹಾನಿ ಉಂಟುಮಾಡಿದೆ.

ಫೆಬ್ರವರಿ 28 ರಿಂದ ನಡೆದ ಸರಣಿ ದಾಳಿಗಳಲ್ಲಿ ಕನಿಷ್ಠ 11 ಮಂದಿ ಸಾವನ್ನಪ್ಪಿದ್ದು, 1,000ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ ಎಂದು ಎನ್‌ಬಿಸಿ ನ್ಯೂಸ್ ವರದಿ ಮಾಡಿದೆ.

ವಿಶ್ವದಾದ್ಯಂತ ವಿಜ್ಞಾನಿಗಳ ಮೇಲೆ ನಿರಂತರ ದಾಳಿಗಳು ನಡೆಯುತ್ತಿದ್ದರೂ ಇರಾನ್ ಇಷ್ಟೊಂದು ಸುಧಾರಿತ ತಂತ್ರಜ್ಞಾನವನ್ನು ಹೇಗೆ ಅಭಿವೃದ್ಧಿಪಡಿಸಿತು ಎಂಬುದು ಈಗ ದೊಡ್ಡ ಪ್ರಶ್ನೆಯಾಗಿದೆ. ಇಸ್ರೇಲಿ ತಜ್ಞರ ಪ್ರಕಾರ, ಇರಾನ್‌ಗೆ ರಷ್ಯಾ ಅಥವಾ ಚೀನಾದಿಂದ ತಾಂತ್ರಿಕ ನೆರವು ಲಭಿಸಿರುವ ಸಾಧ್ಯತೆಯಿದೆ. ಈ ದೇಶಗಳ ಮಿಲಿಟರಿ ಸಹಕಾರವಿಲ್ಲದೆ ಇಂತಹ ನಿಖರ ಹಾಗೂ ವಿಧ್ವಂಸಕ ಆಯುಧ ತಯಾರಿಕೆ ಅಸಾಧ್ಯ ಎನ್ನುವುದು ವಿಶ್ಲೇಷಕರ ವಾದವಾಗಿದೆ.

ಕ್ಲಸ್ಟರ್ ಬಾಂಬ್‌ಗಳು ಯುದ್ಧ ಮುಗಿದ ನಂತರವೂ ಅಪಾಯಕಾರಿಯಾಗುತ್ತವೆ. ಇವುಗಳಲ್ಲಿ ಹರಡುವ ಹಲವು ಸಣ್ಣ ಬಾಂಬ್‌ಗಳು ತಕ್ಷಣ ಸ್ಫೋಟಗೊಳ್ಳದೆ ನೆಲದ ಮೇಲೆ ಬಿದ್ದಿರುತ್ತವೆ. ಇವುಗಳನ್ನು ಮುಟ್ಟಿದಾಗ ಅಥವಾ ತುಳಿದಾಗ ಸ್ಫೋಟಗೊಂಡು ನಾಗರಿಕರ ಜೀವ ತೆಗೆಯುತ್ತವೆ. ಇದನ್ನು ತಡೆಯಲು 2008ರಲ್ಲಿ 100ಕ್ಕೂ ಹೆಚ್ಚು ದೇಶಗಳು 'ಕ್ಲಸ್ಟರ್ ಮ್ಯೂನಿಷನ್ಸ್ ಸಮಾವೇಶಕ್ಕೆ ಸಹಿ ಹಾಕಿ ಈ ಆಯುಧವನ್ನು ನಿಷೇಧಿಸಿವೆ. ಆದರೆ, ಆಶ್ಚರ್ಯವೆಂದರೆ ಇರಾನ್, ಇಸ್ರೇಲ್ ಮತ್ತು ಅಮೆರಿಕ ಈ ಒಪ್ಪಂದಕ್ಕೆ ಸಹಿ ಹಾಕಿಲ್ಲ.

ಇರಾನ್ ಬಳಿ ಕ್ಲಸ್ಟರ್ ಬಾಂಬ್ ಹೊತ್ತೊಯ್ಯುವ ಮೂರು ಪ್ರಮುಖ ಕ್ಷಿಪಣಿಗಳಿವೆ ಎಂದು ಶಂಕಿಸಲಾಗಿದೆ.

ಜೋಲ್ಫಾಘರ್: ಅಲ್ಪ ವ್ಯಾಪ್ತಿಯ ಕ್ಷಿಪಣಿ.

ಖಾದರ್ ಸರಣಿ: 2,000 ಕಿ.ಮೀ ದೂರದವರೆಗೆ ದಾಳಿ ಮಾಡುವ ಸಾಮರ್ಥ್ಯ.

ಖೋರಮ್‌ಶಹರ್: ಇದು ಅತ್ಯಂತ ಶಕ್ತಿಶಾಲಿ ಕ್ಷಿಪಣಿಯಾಗಿದ್ದು, ಏಕಕಾಲಕ್ಕೆ 80 ಕಿರು ಬಾಂಬ್‌ಗಳನ್ನು ಸಾಗಿಸಬಲ್ಲದು.

ಇಸ್ರೇಲ್ ಮಿಲಿಟರಿ ವಕ್ತಾರ ಬ್ರಿಗೇಡಿಯರ್ ಜನರಲ್ ಎಫಿ ಡೆಫ್ರಿನ್ ಹೇಳುವಂತೆ, ಇರಾನ್ ಉದ್ದೇಶಪೂರ್ವಕವಾಗಿ ನಾಗರಿಕರನ್ನು ಗುರಿಯಾಗಿಸಿಕೊಂಡು ಈ ಆಯುಧಗಳನ್ನು ಬಳಸುತ್ತಿದೆ. ಇದು ಕೇವಲ ಯುದ್ಧವಲ್ಲ, ಬದಲಿಗೆ ಭಯೋತ್ಪಾದನೆಯ ಒಂದು ರೂಪವಾಗಿದೆ.

ಈ ಹೊಸ ಮಾದರಿಯ ದಾಳಿಯು ಇಸ್ರೇಲ್‌ನ ವೈಮಾನಿಕ ರಕ್ಷಣಾ ವ್ಯವಸ್ಥೆಗೆ ದೊಡ್ಡ ಸವಾಲಾಗಿದೆ. ಏಕೆಂದರೆ ಗಾಳಿಯಲ್ಲಿ ನೂರಾರು ಸಣ್ಣ ಬಾಂಬ್‌ಗಳು ಹರಡಿದಾಗ ಅವೆಲ್ಲವನ್ನೂ ತಡೆಯುವುದು ಅಸಾಧ್ಯದ ಮಾತು. ಈ ಬೆಳವಣಿಗೆಯು ಇಡೀ ವಿಶ್ವದ ಶಾಂತಿಗೆ ಧಕ್ಕೆಯುಂಟುಮಾಡುವ ಆತಂಕ ಮೂಡಿಸಿದೆ,(ಏಜೆನ್ಸೀಸ್).