ಟ್ರಂಪ್ ನಿದ್ದೆ ಗೆಡಿಸಿರುವ ಇರಾನ್ ಸೊಳ್ಳೆ ಪಡೆ: ರೇಡಾರ್‌ಗೂ ಸಿಗದ ಈ ಅಸ್ತ್ರದಿಂದ ಜಾಗತಿಕ ಆರ್ಥಿಕತೆ ಅಲ್ಲೋಲ ಕಲ್ಲೋಲ! Mosquito Boats

Mosquito Boats : ಇರಾನ್​ ಮತ್ತು ಅಮೆರಿಕ ನಡುವಿನ ಸಂಧಾನ ಮಾತುಕತೆ ಯಾಕೋ ಫಲಪ್ರದವಾಗುತ್ತಿಲ್ಲ. ಹೀಗಾಗಿ ಮಧ್ಯ ಪ್ರಾಚ್ಯದಲ್ಲಿ ಯುದ್ಧದ ಭೀತಿ ಹಾಗೇ ಮುಂದುವರಿದಿದೆ. ಇದರ ನಡುವೆ ಇರಾನಿನ ನೌಕಾಪಡೆ ಸಂಪೂರ್ಣವಾಗಿ ನಾಶವಾಗಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿರುವುದು ನಿಮಗೆಲ್ಲರಿಗೂ ಗೊತ್ತೇ ಇದೆ. ಆದರೆ, ವಾಸ್ತವ ಮಾತ್ರ ಇದಕ್ಕೆ ವಿರುದ್ಧವಾಗಿದೆ. ಏಕೆಂದರೆ, ಹೊರ್ಮುಜ್ ಜಲಸಂಧಿಯಲ್ಲಿ ಇರಾನ್‌ನ 'ಮಸ್ಕಿಟೋ ಫ್ಲೀಟ್' (ಸೊಳ್ಳೆ ಪಡೆ) ಅಕ್ಷರಶಃ ಅಬ್ಬರಿಸಿ ಬೊಬ್ಬರಿಯುತ್ತಿದೆ. ಅತ್ಯಂತ ಕಡಿಮೆ ವೆಚ್ಚದಲ್ಲಿ ನಿರ್ಮಾಣ ಮಾಡಲಾದ ಈ ಬೋಟ್​ಗಳು ಅತೀವ ವೇಗದಲ್ಲಿ ಚಲಿಸುತ್ತವೆ. ಈ ಸಣ್ಣ ಬೋಟ್‌ಗಳ ಸ್ವರ್ಮ್ ಸ್ಟ್ರಾಟಜಿ ಅಂದರೆ, ಗುಂಪು ದಾಳಿ ತಂತ್ರವನ್ನು ಎದುರಿಸುವುದು ಬಲಿಷ್ಠ ರಾಷ್ಟ್ರಗಳಿಗೂ ಸವಾಲಾಗಿದೆ. ಜಾಗತಿಕ ತೈಲ ಪೂರೈಕೆಯ ಮಹಾದ್ವಾರವನ್ನೇ ಅಸ್ತವ್ಯಸ್ತಗೊಳಿಸುತ್ತಿರುವ ಈ ಸಣ್ಣ ಬೋಟ್​ಗಳು, ಆಧುನಿಕ ಯುದ್ಧತಂತ್ರದ ದಿಕ್ಕನ್ನೇ ಬದಲಿಸುವ ಮೂಲಕ ಇಡೀ ವಿಶ್ವದ ಆರ್ಥಿಕತೆಗೆ ದೊಡ್ಡ ಭೀತಿಯಾಗಿ ಪರಿಣಮಿಸಿವೆ.

ಹೌದು, ತಜ್ಞರು ಹೇಳುವಂತೆ ಹೊರ್ಮುಜ್​ ಜಲಸಂಧಿಗೆ ಸದ್ಯಕ್ಕೆ ಅಡ್ಡಿಯಾಗಿರುವುದು ಯಾವುದೋ ದೊಡ್ಡ ನೌಕಾ ಹಡುಗಗಳಲ್ಲ, ಬದಲಾಗಿ ಇರಾನ್‌ನ ಅಸಾಂಪ್ರದಾಯಿಕ "ಸೊಳ್ಳೆ ಪಡೆ". ಡ್ರೋನ್‌ಗಳು ಮತ್ತು ಕರಾವಳಿ ಕ್ಷಿಪಣಿಗಳನ್ನು ಒಳಗೊಂಡಿರುವ ಸಾವಿರಾರು ಸಣ್ಣ ಹಾಗೂ ಅತಿ ವೇಗದಲ್ಲಿ ದಾಳಿ ಮಾಡುವ ದೋಣಿಗಳನ್ನು ಒಳಗೊಂಡಿರುವ ಸಮೂಹ ತಂತ್ರವೇ ಈ ಸೊಳ್ಳೆ ಪಡೆ. ಇವು ಜಾಗತಿಕ ಮಾರುಕಟ್ಟೆಗಳನ್ನೇ ಅಲುಗಾಡಿಸುವ ಸಾಮರ್ಥ್ಯವನ್ನು ಹೊಂದಿವೆ.

ಇರಾನಿನ "ಮಸ್ಕಿಟೊ ಫ್ಲೀಟ್" (ಸೊಳ್ಳೆ ಪಡೆ) ಎಂಬುದು ಸಾವಿರಾರು ಸಣ್ಣ ಮತ್ತು ಅತಿ ವೇಗದ ದೋಣಿಗಳ ಸಮೂಹವಾಗಿದೆ. ಈ ದೋಣಿಗಳು ಗಂಟೆಗೆ ಸುಮಾರು 40 ರಿಂದ 60 ನಾಟ್ಸ್ ವೇಗದಲ್ಲಿ ಚಲಿಸಬಲ್ಲವು ಮತ್ತು ಇವುಗಳ ಜೊತೆಗೆ ಡ್ರೋನ್‌ಗಳು ಹಾಗೂ ಕ್ಷಿಪಣಿಗಳ ಬೆಂಬಲವೂ ಇರುತ್ತದೆ. ಇವುಗಳಲ್ಲಿ ಮೆಷಿನ್ ಗನ್‌ಗಳು, ರಾಕೆಟ್‌ಗಳು ಮತ್ತು ಶತ್ರು ಹಡಗು ನಿರೋಧಕ ಕ್ಷಿಪಣಿಗಳಂತಹ ಶಸ್ತ್ರಾಸ್ತ್ರಗಳನ್ನು ಅಳವಡಿಸಲಾಗಿರುತ್ತದೆ. ಅಮೆರಿಕದ ಮಾಜಿ ರಕ್ಷಣಾ ಅಧಿಕಾರಿ ಅಲೆಕ್ಸ್ ಪ್ಲಿಟ್ಸಾಸ್ ಹೇಳುವಂತೆ, ಈ ದೋಣಿಗಳು ಸೊಳ್ಳೆಗಳಂತೆ ಗಾತ್ರದಲ್ಲಿ ಚಿಕ್ಕದಾಗಿದ್ದರೂ, ಅತ್ಯಂತ ಕಿರಿಕಿರಿ ಉಂಟುಮಾಡುವ ಮತ್ತು ಶತ್ರುಗಳ ಮೇಲೆ ಅನಿರೀಕ್ಷಿತವಾಗಿ ದಾಳಿ ಮಾಡುವ ಸಾಮರ್ಥ್ಯವನ್ನು ಹೊಂದಿವೆ. ಆಳವಿಲ್ಲದ ಸಮುದ್ರ ಪ್ರದೇಶಗಳಲ್ಲಿ ಈ ವೇಗದ ಪಡೆಗಳು ದೊಡ್ಡ ಹಡಗುಗಳಿಗೆ ಸವಾಲೊಡ್ಡಬಲ್ಲವು.

ಸಾಂಪ್ರದಾಯಿಕ ಯುದ್ಧನೌಕೆಗಳಿಗಿಂತ ಭಿನ್ನವಾಗಿ, ಈ ಸಣ್ಣ ದೋಣಿಗಳನ್ನು ರಾಡಾರ್‌ನಲ್ಲಿ ಪತ್ತೆಹಚ್ಚುವುದು ತುಂಬಾನೇ ಕಷ್ಟ. ಇರಾನ್‌ನ ಕರಾವಳಿಯಲ್ಲಿ ಇವುಗಳನ್ನು ಮರೆಮಾಡುವುದು ಅಷ್ಟೇ ಸುಲಭ. ಇನ್ನು ಯಾವುದೇ ಫಲಿತಾಂಶಗಳಿಲ್ಲದೇ ಇವು ನಾಶವಾದರೂ ಕೂಡ ಚಿಂತಿಸುವ ಅಗತ್ಯವೇ ಇಲ್ಲ. ಏಕೆಂದರೆ, ಈ ದೋಣಿಗಳು ತುಂಬಾ ಅಗ್ಗವಾಗಿವೆ. ವೇಗವಾಗಿ ಚಲಿಸುವ ಸಣ್ಣ ಅಟ್ಯಾಕ್ ಬೋಟ್‌ಗಳು ಅವುಗಳ ಗಾತ್ರ, ಚಲನಶೀಲತೆ ಮತ್ತು ಹೆಚ್ಚಿನ ಸಂಖ್ಯೆಯ ಕಾರಣದಿಂದಾಗಿ ಶತ್ರುಗಳಿಗೆ ದೊಡ್ಡ ಸವಾಲಾಗಿ ಪರಿಣಮಿಸಿವೆ. ವಿಶ್ವದ ಅತ್ಯಂತ ಪ್ರಮುಖ ಹಡಗು ಮಾರ್ಗಗಳಲ್ಲಿ ಒಂದಾದ ಹೊರ್ಮುಜ್ ಜಲಸಂಧಿಯಲ್ಲಿ ಸಂಚಾರಕ್ಕೆ ಅಡ್ಡಿಪಡಿಸುವ ಮೂಲಕ ಇವು ಜಾಗತಿಕ ಆರ್ಥಿಕತೆಯ ಮೇಲೆ ಒತ್ತಡ ಹೇರುತ್ತಿವೆ. ಈ ಸಣ್ಣ ವ್ಯವಸ್ಥೆಗಳನ್ನು ಸಂಪೂರ್ಣವಾಗಿ ಮಟ್ಟ ಹಾಕುವುದು ಕಷ್ಟಕರವಾಗಿದ್ದು, ಇವು ಜಲಸಂಧಿಯನ್ನು ಪೂರ್ತಿಯಾಗಿ ಮುಚ್ಚದಿದ್ದರೂ ಸಹ ಸರಕು ಸಾಗಣೆಗೆ ನಿರಂತರ ಭೀತಿಯನ್ನು ಒಡ್ಡುತ್ತಿವೆ.

ಅಂದಹಾಗೆ, ಇರಾನ್​ ನೌಕಾಪಡೆಯ ದೊಡ್ಡ ದೊಡ್ಡ ಹಡಗುಗಳನ್ನು ನಾಶಮಾಡುವತ್ತ ಗಮನ ಹರಿಸಿದ ಅಮೆರಿಕದ ಪಡೆಗಳು, ಸಣ್ಣ ಬೋಟ್​ಗಳನ್ನು ಟಾರ್ಗೆಟ್​ ಮಾಡಲಿಲ್ಲ ಏಕೆ ಎಂಬ ಪ್ರಶ್ನೆ ಮೂಡುತ್ತದೆ. ಅದಕ್ಕೆ ಟ್ರಂಪ್​ ಅವರೇ ಉತ್ತರ ನೀಡಿದ್ದಾರೆ. ಈ ಸಣ್ಣ ಬೋಟ್​ಗಳು ಹೆಚ್ಚು ಬೆದರಿಕೆ ಎಂದು ಪರಿಗಣಿಸದ ಕಾರಣ ಅವುಗಳ ಮೇಲೆ ದಾಳಿ ಮಾಡಲಿಲ್ಲ ಎಂದು ಒಪ್ಪಿಕೊಂಡಿದ್ದಾರೆ. ಆದರೆ, ಈಗ ಆ ಸಣ್ಣ ಬೋಟ್​ಗಳೇ ದೊಡ್ಡ ಸಮಸ್ಯೆಯನ್ನು ಉಂಟುಮಾಡುತ್ತಿವೆ ಎಂದು ತಜ್ಞರು ಎಚ್ಚರಿಸಿದ್ದಾರೆ. ವಿಶ್ವದ ಅತಿದೊಡ್ಡ ಕಾರ್ಯತಂತ್ರದ ಜಲಮಾರ್ಗವನ್ನು ಅಪಾಯಕ್ಕೆ ಸಿಲುಕಿಸುವಲ್ಲಿ ಈ ಸಣ್ಣ ಬೋಟ್​ಗಳ ಸಮೂಹವೂ ಸಮರ್ಥವಾಗಿವೆ ಎಂದು ಅಲೆಕ್ಸ್ ಪ್ಲಿಟ್ಸಾಸ್ ಅವರು ನ್ಯೂಯಾರ್ಕ್ ಟೈಮ್ಸ್ ವರದಿಯಲ್ಲಿ ಉಲ್ಲೇಖಿಸಿದ್ದಾರೆ.

ಶನಿವಾರ (ಏಪ್ರಿಲ್ 18) ಇರಾನಿನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಜಲಸಂಧಿಯನ್ನು ಮತ್ತೆ ಮುಚ್ಚಿರುವುದಾಗಿ ಮತ್ತು ಕಟ್ಟುನಿಟ್ಟಾಗಿ ನಿರ್ವಹಣೆ ಮಾಡುತ್ತಿರುವುದಾಗಿ ಘೋಷಣೆ ಮಾಡಿದೆ. ಇರಾನಿನ ಬಂದರುಗಳ ಮೇಲೆ ಅಮೆರಿಕದ ನೌಕಾ ದಿಗ್ಬಂಧನವನ್ನು "ವಿಶ್ವಾಸ ಉಲ್ಲಂಘನೆ" ಮತ್ತು ಕದನ ವಿರಾಮ ಒಪ್ಪಂದದ ಉಲ್ಲಂಘನೆ ಎಂದು ಟೆಹ್ರಾನ್ ಉಲ್ಲೇಖಿಸಿದೆ. ಏಪ್ರಿಲ್ 17 ರಂದು, ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಗ್ಚಿ ಮತ್ತು ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇಬ್ಬರೂ ಜಲಸಂಧಿಯು "ಸಂಪೂರ್ಣವಾಗಿ ಮುಕ್ತವಾಗಿದೆ" ಎಂದು ಹೇಳಿದರು. ಕದನ ವಿರಾಮದ ನಂತರ ಜಲಸಂಧಿಯನ್ನು ತೆರೆಯಲು ಇರಾನ್ ಒಪ್ಪಿಕೊಂಡಿತ್ತು ಆದರೆ, ಇಸ್ರೇಲ್, ಲೆಬನಾನ್ ಮೇಲೆ ದಾಳಿ ಮಾಡಿದ ನಂತರ ಇರಾನ್​ ಮತ್ತೆ ಜಲಸಂಧಿಯನ್ನು ಮುಚ್ಚಿತ್ತು.

ಸದ್ಯ ಅಮೆರಿಕ ಮತ್ತು ಇರಾನ್ ನಡುವಿನ ಸಂಬಂಧವು ಅತ್ಯಂತ ಉದ್ವಿಗ್ನ ಸ್ಥಿತಿಯಲ್ಲಿದೆ. ಪ್ರಸ್ತುತ, ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ ಶಾಂತಿ ಮಾತುಕತೆಗಳು ನಡೆಯುತ್ತಿವೆಯಾದರೂ, ಹಾರ್ಮುಜ್ ಜಲಸಂಧಿಯನ್ನು ಮುಕ್ತಗೊಳಿಸುವ ವಿಚಾರದಲ್ಲಿ ಭಿನ್ನಾಭಿಪ್ರಾಯ ಮುಂದುವರಿದಿದೆ. ಅಮೆರಿಕವು ಇರಾನ್ ಮೇಲೆ ನೌಕಾ ದಿಗ್ಬಂಧನ ಹೇರಿದ್ದರೆ, ಇದಕ್ಕೆ ಪ್ರತಿಯಾಗಿ ಇರಾನ್ ಜಾಗತಿಕ ತೈಲ ಮಾರ್ಗವನ್ನು ಬಂದ್ ಮಾಡಿದೆ. ಕದನ ವಿರಾಮದ ಅವಧಿಯನ್ನು ವಿಸ್ತರಿಸುವ ಬಗ್ಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಿಶ್ರ ಪ್ರತಿಕ್ರಿಯೆ ನೀಡುತ್ತಿದ್ದು, ಯುದ್ಧದ ಅನಿಶ್ಚಿತತೆ ಹಾಗೇ ಮುಂದುವರಿದಿದೆ, (ಏಜೆನ್ಸೀಸ್​).