ಸಂಸ್ಥೆಯ ವಕ್ತಾರರು ಮಾತನಾಡಿ, "ನಾವು ಅತ್ಯಂತ ಕಷ್ಟದ ನಿರ್ಧಾರವನ್ನು ತೆಗೆದುಕೊಂಡಿದ್ದು, ಅತ್ಯಲ್ಪ ಸಂಖ್ಯೆಯ ಉದ್ಯೋಗಿಗಳನ್ನು ಹುದ್ದೆಯಿಂದ ತೆಗೆದುಹಾಕುತ್ತಿದ್ದೇವೆ" ಎಂದು ಯಾವುದೇ ವಿಸ್ತೃತ ವಿವರ ನೀಡದೆ ಸ್ಪಷ್ಟಪಡಿಸಿದ್ದಾರೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.
ಪ್ರಮುಖವಾಗಿ ಸಾಫ್ಟ್‌ವೇರ್ ಡೆವಲಪ್‌ಮೆಂಟ್ (ತಂತ್ರಾಂಶ ಅಭಿವೃದ್ಧಿ) ವಿಭಾಗದಲ್ಲಿ ಕೆಲಸ ಮಾಡುತ್ತಿದ್ದ ನೌಕರರನ್ನು ಕೆಲಸದಿಂದ ವಜಾಗೊಳಿಸಲಾಗಿದೆ. ಸಂಸ್ಥೆಯು ಹೆಚ್ಛು ದಕ್ಷತೆಯಿಂದ ಕಾರ್ಯಾಚರಣೆ ನಡೆಸಲು ಮತ್ತು ಕಂಪನಿಯ ಮುಂಬರುವ ಉತ್ಪನ್ನಗಳ ರೋಡ್‌ಮ್ಯಾಪ್‌ಗೆ ತಕ್ಕಂತೆ ತನ್ನ ಸಿಬ್ಬಂದಿ ಬಲವನ್ನು ಮರುಸಂಘಟಿಸಲು ಈ ನಿರ್ಧಾರ ಸಹಕಾರಿಯಾಗಲಿದೆ ಎಂದು ಅಮೆಜಾನ್ ಸ್ಪಷ್ಟಪಡಿಸಿದೆ. ಇದೇ ಸಂದರ್ಭದಲ್ಲಿ ಅಮೆಜಾನ್ ಅಲೆಕ್ಸಾ (Alexa) ಚಾಲಿತ ಹೊಸ ಅಲಾರಾಂ ಕ್ಲಾಕ್ ಮತ್ತು ಡಿಜಿಟಲ್ ಫೋಟೋ ಫ್ರೇಮ್‌ಗಳನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುವುದಾಗಿ ಘೋಷಿಸಿದೆ.
ಕಂಪನಿಯ ವಾಡಿಕೆಯಂತೆ, ನೌಕರರಿಗೆ ಉದ್ಯೋಗ ಕಡಿತದ ಕುರಿತ ಶಾಕಿಂಗ್ ಮಾಹಿತಿಯನ್ನು ಮೆಸೇಜನ್ ಮತ್ತು ಇಮೇಲ್‌ಗಳ ಮೂಲಕ ಕಳುಹಿಸಲಾಗಿದೆ. ಬುಧವಾರ ಬೆಳಗಿನ ಜಾವದಲ್ಲೇ ಮೆಸೇಜ್ ಕಳುಹಿಸಲಾಗಿದ್ದು, ಬೆಳಗ್ಗೆ ನಿದ್ರೆಯಿಂದ ಎದ್ದು ತಮ್ಮ ಫೋನ್ ಅಥವಾ ಕಂಪ್ಯೂಟರ್ ನೋಡಿದ ಉದ್ಯೋಗಿಗಳಿಗೆ ಭಾರಿ ಆಘಾತ ಉಂಟಾಗಿದೆ. ಸಾಧನಗಳು ಮತ್ತು ಸೇವೆಗಳ ವಿಭಾಗದ ಮಾನವ ಸಂಪನ್ಮೂಲ (HR) ಉಪಾಧ್ಯಕ್ಷೆ ಚೆರಿ ರಾಬಿನ್ಸನ್ ಅವರು ಕಳುಹಿಸಿದ ಇಮೇಲ್‌ನಲ್ಲಿ, "ಕಂಪನಿಯು ತನ್ನ ರಚನೆಯ ಬಗ್ಗೆ ಸಂಪೂರ್ಣ ಮತ್ತು ಸಮಗ್ರ ಪರಿಶೀಲನೆಯನ್ನು ನಡೆಸಿದ್ದು, ಅದರ ಪರಿಣಾಮವಾಗಿ ಈ ಹುದ್ದೆಗಳ ಕಡಿತದ ಅಗತ್ಯ ಕಂಡುಬಂದಿದೆ" ಎಂದು ಸಿಬ್ಬಂದಿಗೆ ವಿವರಿಸಲಾಗಿದೆ.
