ಸಾವಿನ ದವಡೆಯಲ್ಲಿ ಇಮ್ರಾನ್​: ಜೈಲಿನಿಂದಲೇ ಕಿಚ್ಚು ಹಚ್ಚುತ್ತಿದ್ದ ಮಾಜಿ ಪ್ರಧಾನಿ ಸೈಲೆಂಟ್​ ಆಗಿದ್ದೇಕೆ? Imran Khan

ಇಸ್ಲಾಮಾಬಾದ್: ಸದಾ ಪ್ರತಿಭಟನೆ, ರ‍್ಯಾಲಿಗಳ ಮೂಲಕ ಬೀದಿಗೆ ಇಳಿಯುತ್ತಿದ್ದ ಪಾಕಿಸ್ತಾನ್ ತೆಹ್ರೀಕ್-ಇ-ಇನ್ಸಾಫ್ (PTI) ಪಕ್ಷ ಈಗ ದಿಢೀರ್ ತಣ್ಣಗಾಗಿದೆ. ಇದಕ್ಕೆ ಪಕ್ಷದ ಸಂಸ್ಥಾಪಕ, ಪಾಕ್​ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ (Imran Khan) ಅಡಿಯಾಲ ಜೈಲಿನಿಂದ ರವಾನಿಸಿರುವ ಒಂದು ಸೂಚನೆಯೇ ಕಾರಣ ಎನ್ನಲಾಗುತ್ತಿದೆ.

ಮುಂದಿನ ಆದೇಶ ಬರುವವರೆಗೆ ಇಸ್ಲಾಮಾಬಾದ್‌ನಲ್ಲಿ ಯಾವುದೇ ಪ್ರತಿಭಟನೆಗಳನ್ನು ನಡೆಸಬೇಡಿ ಎಂದು ಇಮ್ರಾನ್ ಖಾನ್ ತಮ್ಮ ಪಕ್ಷದ ನಾಯಕರಿಗೆ ಆರ್ಡರ್ ಮಾಡಿದ್ದಾರೆ. ಪಾಕಿಸ್ತಾನದ ರಾಜಧಾನಿಯಲ್ಲಿ ಸದಾ ರಾಜಕೀಯ ಕಿಚ್ಚು ಹಚ್ಚುತ್ತಿದ್ದ ಪಿಟಿಐ, ಈಗ ಈ ನಿರ್ಧಾರಕ್ಕೆ ಬಂದಿರುವುದು ಎಲ್ಲರ ಹುಬ್ಬೇರಿಸುವಂತೆ ಮಾಡಿದೆ.

ಇಮ್ರಾನ್ ಖಾನ್ ಅವರ ಕಾನೂನು ಸಲಹೆಗಾರರಾದ ಸಲ್ಮಾನ್ ಸಫ್ದಾರ್ ಈ ವಿಚಾರವನ್ನು ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಇಸ್ಲಾಮಾಬಾದ್ ಅಥವಾ ಅದರ ಸುತ್ತಮುತ್ತಲಿನ ಯಾವುದೇ ಪ್ರದೇಶಗಳಲ್ಲಿ ಸದ್ಯಕ್ಕೆ ಪ್ರದರ್ಶನಗಳನ್ನು ಆಯೋಜಿಸಬಾರದು ಎಂದು ಖಾನ್ ಸ್ಪಷ್ಟವಾಗಿ ಹೇಳಿದ್ದಾರೆ. ಫೆಡರಲ್ ರಾಜಧಾನಿಯಲ್ಲಿ ಹೊಸ ಪ್ರತಿಭಟನೆಗಳಿಗೆ ಸಂಬಂಧಿಸಿದಂತೆ ಯಾವುದೇ ಪ್ಲ್ಯಾನ್ ಸಿದ್ಧಪಡಿಸದಂತೆ ನಾಯಕರಿಗೆ ಸೂಚಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.

ಇದುವರೆಗೆ ಪಿಟಿಐ ಪಕ್ಷದ ಶಕ್ತಿಯೇ ಬೀದಿಗಿಳಿದು ಹೋರಾಟ ಮಾಡುವುದಾಗಿತ್ತು. ಆದರೆ ಈಗ ಜೈಲಿನಲ್ಲಿರುವ ತಮ್ಮ ನಾಯಕನಿಂದ ಹಸಿರು ನಿಶಾನೆ ಸಿಗುವವರೆಗೆ ಪಕ್ಷವು ಸಂಯಮದ ಹಾದಿ ಹಿಡಿದಿದೆ. ಇದು ಕೇವಲ ವಿರಾಮವೋ ಅಥವಾ ದೊಡ್ಡ ಬದಲಾವಣೆಯ ಮುನ್ಸೂಚನೆಯೋ ಎಂಬ ಚರ್ಚೆ ಈಗ ಶುರುವಾಗಿದೆ.

ಇತ್ತ ಪ್ರತಿಭಟನೆ ನಿಲ್ಲಿಸುವಂತೆ ಸೂಚನೆ ಬಂದ ಬೆನ್ನಲ್ಲೇ, ಇಮ್ರಾನ್ ಖಾನ್ ಅವರ ಆರೋಗ್ಯದ ಬಗ್ಗೆ ಆಘಾತಕಾರಿ ಸುದ್ದಿಗಳು ಕೇಳಿಬರುತ್ತಿವೆ. ಅಡಿಯಾಲ ಜೈಲಿನಲ್ಲಿರುವ ಮಾಜಿ ಪ್ರಧಾನಿ ಗಂಭೀರ ಸ್ಥಿತಿಯಲ್ಲಿದ್ದಾರೆ ಮತ್ತು ಅವರಿಗೆ ಸರಿಯಾದ ವೈದ್ಯಕೀಯ ಸೌಲಭ್ಯ ಸಿಗುತ್ತಿಲ್ಲ ಎಂದು ಪಿಟಿಐ ನಾಯಕರು ಆರೋಪಿಸಿದ್ದಾರೆ.

ತಮ್ಮ ನಾಯಕನಿಗೆ ತಕ್ಷಣವೇ ಪಾರದರ್ಶಕವಾದ ಚಿಕಿತ್ಸೆ ಸಿಗಬೇಕು ಮತ್ತು ನುರಿತ ವೈದ್ಯರ ತಂಡ ಅವರಿಗೆ ತಪಾಸಣೆ ನಡೆಸಬೇಕು ಎಂದು ಪಕ್ಷವು ಒತ್ತಾಯಿಸಿದೆ. ಇಮ್ರಾನ್ ಖಾನ್ ಅವರ ಆರೋಗ್ಯದ ಸ್ಥಿತಿ ಜಟಿಲವಾಗಿರುವುದರಿಂದಲೇ ಅವರು ಪ್ರತಿಭಟನೆಯಿಂದ ಹಿಂದೆ ಸರಿಯುವಂತೆ ಸೂಚಿಸಿರಬಹುದು ಎಂಬ ಅನುಮಾನವೂ ವ್ಯಕ್ತವಾಗಿದೆ.

ಈ ನಿರ್ಧಾರವು ಪಿಟಿಐನ ಹೋರಾಟದ ಹಾದಿಯಲ್ಲಿ ತಾತ್ಕಾಲಿಕ ಮರುಸಂಗ್ರಹಣೆಯನ್ನು (Re-grouping) ಸೂಚಿಸುತ್ತದೆ. ಒಂದು ಕಡೆ ಕಾನೂನು ಹೋರಾಟ, ಇನ್ನೊಂದು ಕಡೆ ನಾಯಕನ ಆರೋಗ್ಯದ ಚಿಂತೆ, ಈ ಎರಡರ ನಡುವೆ ಪಕ್ಷವು ಎಚ್ಚರಿಕೆಯ ನಡೆಯನ್ನು ಆರಿಸಿಕೊಂಡಿದೆ. ಇಮ್ರಾನ್ ಖಾನ್ ಜೈಲಿನಲ್ಲಿದ್ದರೂ ಅವರ ಪ್ರಭಾವ ಮಾತ್ರ ಕಮ್ಮಿಯಾಗಿಲ್ಲ ಎಂಬುದಕ್ಕೆ ಪಕ್ಷವು ಅವರ ಒಂದು ನಿರ್ದೇಶನಕ್ಕಾಗಿ ಕಾಯುತ್ತಿರುವುದೇ ಸಾಕ್ಷಿ.

ಪಾಕಿಸ್ತಾನದ ರಾಜಕೀಯ ಪರಿಸ್ಥಿತಿ ಈಗ ಹಾವೇಣಿ ಆಟದಂತಿದೆ. ಜೈಲಿನಿಂದ ಇಮ್ರಾನ್ ಖಾನ್ ಹೊರಡಿಸುವ ಮುಂದಿನ ಸಂದೇಶವೇ ಪಾಕಿಸ್ತಾನದ ಬೀದಿಗಳು ಮತ್ತೆ ಬಿಸಿಯಾಗಬೇಕೇ ಅಥವಾ ಶಾಂತವಾಗಿರಬೇಕೇ ಎಂಬುದನ್ನು ನಿರ್ಧರಿಸಲಿದೆ ಎನ್ನುವುದು ರಾಜಕೀಯ ವಿಶ್ಲೇಷಕರ ಅಭಿಪ್ರಾಯವಾಗಿದೆ, (ಏಜನ್ಸೀಸ್​).