ಒಬ್ಬರನ್ನು ಕೊಂದರೆ ಮತ್ತೊಬ್ಬರು ಟಾರ್ಗೆಟ್! ಇರಾನ್‌ನ ಇಡೀ ಆಡಳಿತ ಮಂಡಳಿಗೆ ಇಸ್ರೇಲ್ ನೀಡಿದ ಆ ಡೆಡ್ಲಿ ವಾರ್ನಿಂಗ್ ಏನು..? Israel Warning

ಈ ಬಗ್ಗೆ ಭಾನುವಾರ ಇಸ್ರೇಲ್ ಮಿಲಿಟರಿ ತನ್ನ ಅಧಿಕೃತ 'X' ಖಾತೆಯಲ್ಲಿ ಪೋಸ್ಟ್ ಒಂದನ್ನು ಹಂಚಿಕೊಂಡಿದೆ. ಅದರಲ್ಲಿ, ಖಮೇನಿ ನಂತರ ಅಧಿಕಾರಕ್ಕೆ ಬರುವ ಯಾರನ್ನೇ ಆದರೂ ನಾವು ಬೇಟೆಯಾಡುತ್ತೇವೆ. ಅಷ್ಟೇ ಅಲ್ಲ, ಮುಂದಿನ ನಾಯಕನನ್ನು ಆಯ್ಕೆ ಮಾಡುವ ಪ್ರಕ್ರಿಯೆಯಲ್ಲಿ ಭಾಗಿಯಾಗುವ ಪ್ರತಿಯೊಬ್ಬರೂ ನಮ್ಮ ಗುರಿಯಾಗಲಿದ್ದಾರೆ. ಇದು ಅಂತಿಮ ಎಚ್ಚರಿಕೆ ಎಂದು ಗುಡುಗಿದೆ.

ಇರಾನ್‌ನ ಉನ್ನತ ಧಾರ್ಮಿಕ ಮಂಡಳಿಯಾದ ಅಸೆಂಬ್ಲಿ ಆಫ್ ಎಕ್ಸ್‌ಪರ್ಟ್ಸ್ ಸದಸ್ಯರನ್ನು ಉದ್ದೇಶಿಸಿ ಇಸ್ರೇಲ್ ಈ ಬೆದರಿಕೆ ಹಾಕಿದೆ. ಮುಂದಿನ ನಾಯಕನನ್ನು ಆಯ್ಕೆ ಮಾಡಲು ನಡೆಸುವ ಸಭೆಯ ಮೇಲೆ ಇಸ್ರೇಲ್ ದಾಳಿ ನಡೆಸುವ ಸಾಧ್ಯತೆಯಿದೆ ಎಂಬ ಆತಂಕ ಈಗ ಇಡೀ ವಿಶ್ವವನ್ನು ಆವರಿಸಿದೆ.

ಇನ್ನೊಂದೆಡೆ, ಖಮೇನಿ ಹತ್ಯೆಯ ಆಘಾತದಿಂದ ಚೇತರಿಸಿಕೊಳ್ಳುತ್ತಿರುವ ಇರಾನ್, ತುರ್ತಾಗಿ ಮುಂದಿನ ನಾಯಕನನ್ನು ಘೋಷಿಸಲು ಸಜ್ಜಾಗಿದೆ. ಇರಾನ್‌ನ ಮೆಹ್ರ್ ಸುದ್ದಿ ಸಂಸ್ಥೆಯ ಪ್ರಕಾರ, 88 ಸದಸ್ಯರ ಅಸೆಂಬ್ಲಿ ಆಫ್ ಎಕ್ಸ್‌ಪರ್ಟ್ಸ್ ಈಗಾಗಲೇ ಮುಂದಿನ ನಾಯಕನ ಬಗ್ಗೆ ಒಂದು ನಿರ್ಣಾಯಕ ನಿರ್ಧಾರಕ್ಕೆ ಬಂದಿದೆ. ಅಯತೊಲ್ಲಾ ಮೊಹಮ್ಮದ್-ಮೆಹದಿ ಮಿರ್ಬಾಘೇರಿ ಮಾತನಾಡಿ, ನಾಯಕನನ್ನು ನಿರ್ಧರಿಸಲು ದೊಡ್ಡ ಪ್ರಯತ್ನಗಳು ನಡೆದಿವೆ ಮತ್ತು ಒಬ್ಬ ವ್ಯಕ್ತಿಯ ಹೆಸರಿನ ಮೇಲೆ ಬಹುಮತದ ಒಮ್ಮತ ಮೂಡಿದೆ ಎಂದು ತಿಳಿಸಿದ್ದಾರೆ.

ಆದರೆ, ಈ ಪ್ರಕ್ರಿಯೆಯಲ್ಲಿ ಕೆಲವು ತಾಂತ್ರಿಕ ಅಡೆತಡೆಗಳು ಇದ್ದು, ಅವುಗಳನ್ನು ಶೀಘ್ರವೇ ಬಗೆಹರಿಸಲಾಗುವುದು ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಇಸ್ರೇಲಿ ಮಾಧ್ಯಮಗಳು ಅಲಿ ಖಮೇನಿ ಅವರ ಪುತ್ರ ಮೊಜ್ತಬಾ ಖಮೇನಿ ಅವರನ್ನು ಮುಂದಿನ ನಾಯಕನನ್ನಾಗಿ ಆಯ್ಕೆ ಮಾಡಲಾಗಿದೆ ಎಂದು ವರದಿ ಮಾಡಿದ್ದವು. ಆದರೆ, ಮುಂಬೈನಲ್ಲಿರುವ ಇರಾನ್ ಕಾನ್ಸುಲೇಟ್ ಈ ವರದಿಗಳನ್ನು ಸಾರಾಸಗಟಾಗಿ ತಳ್ಳಿಹಾಕಿದೆ. ಮಾಧ್ಯಮಗಳಲ್ಲಿ ಹರಿದಾಡುತ್ತಿರುವ ಸಂಭವನೀಯ ಅಭ್ಯರ್ಥಿಗಳ ಪಟ್ಟಿಗೆ ಯಾವುದೇ ಅಧಿಕೃತ ಮೂಲವಿಲ್ಲ. ಇದು ಕೇವಲ ವದಂತಿ ಎಂದು ಇರಾನ್ ಸ್ಪಷ್ಟಪಡಿಸಿದೆ.

ಕಳೆದ ಒಂದು ವಾರದಿಂದ ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್‌ನ ಮಿಲಿಟರಿ ಮತ್ತು ಆರ್ಥಿಕ ಕೇಂದ್ರಗಳ ಮೇಲೆ ಭೀಕರ ದಾಳಿ ನಡೆಸುತ್ತಿವೆ. ಈ ದಾಳಿಗಳಲ್ಲಿ ಅಲಿ ಖಮೇನಿ ಸೇರಿದಂತೆ ಇರಾನ್‌ನ ಹಲವು ಪ್ರಮುಖ ಸೇನಾಧಿಕಾರಿಗಳು ಸಾವನ್ನಪ್ಪಿದ್ದಾರೆ. ಇದು ಕೇವಲ ದೇಶಗಳ ನಡುವಿನ ಯುದ್ಧವಾಗಿ ಉಳಿದಿಲ್ಲ, ಬದಲಿಗೆ ಇರಾನ್‌ನ ಇಸ್ಲಾಮಿಕ್ ಗಣರಾಜ್ಯದ ಅಸ್ತಿತ್ವಕ್ಕೇ ಸವಾಲಾಗಿ ಪರಿಣಮಿಸಿದೆ.

ಇಸ್ರೇಲ್ ಈಗ ಇರಾನ್‌ನ ನಾಯಕತ್ವವನ್ನೇ ಬುಡಸಮೇತ ಕಿತ್ತೆಸೆಯಲು ನಿರ್ಧರಿಸಿದೆ. ನಾಯಕನನ್ನು ಆಯ್ಕೆ ಮಾಡುವ ಸಭೆಯ ಮೇಲೆ ದಾಳಿ ನಡೆಸುವ ಎಚ್ಚರಿಕೆ ಎಂದರೆ, ಇರಾನ್‌ನಲ್ಲಿ ರಾಜತಾಂತ್ರಿಕ ಶೂನ್ಯತೆ ಸೃಷ್ಟಿಸುವುದು ಇಸ್ರೇಲ್‌ನ ಉದ್ದೇಶವಾಗಿದೆ ಎಂದು ರಕ್ಷಣಾ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.

ಒಟ್ಟಾರೆಯಾಗಿ, ಇರಾನ್‌ನ ಮುಂದಿನ ನಾಯಕ ಯಾರು ಎಂಬ ಕುತೂಹಲದ ಜೊತೆಗೆ, ಆ ನಾಯಕನ ಆಯಸ್ಸು ಎಷ್ಟು ದಿನ ಎಂಬ ಭಯಾನಕ ಪ್ರಶ್ನೆಯೂ ಈಗ ಎದುರಾಗಿದೆ. ಪಶ್ಚಿಮ ಏಷ್ಯಾದ ಈ ಮಹಾಯುದ್ಧವು ವಿಶ್ವದ ಭೂಪಟವನ್ನೇ ಬದಲಿಸುವ ಮುನ್ಸೂಚನೆ ನೀಡುತ್ತಿದೆ,(ಏಜೆನ್ಸೀಸ್).