ನನಗೆ ಎಪ್ಸ್ಟೀನ್ ಜೊತೆ ಸಂಬಂಧವಿಲ್ಲ: ನಾನು ಬಲಿಪಶುವಲ್ಲ, ಸುಳ್ಳು ಸುದ್ದಿ ಹರಡಬೇಡಿ; ವದಂತಿಗಳಿಗೆ ಮೆಲಾನಿಯಾ ಟ್ರಂಪ್ ಕಿಡಿ! Melania Trump on Jeffrey Epstein

ವಾಷಿಂಗ್ಟನ್: ಅಮೆರಿಕದ ಮಾಜಿ ಪ್ರಥಮ ಮಹಿಳೆ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಪತ್ನಿ ಮೆಲಾನಿಯಾ ಟ್ರಂಪ್ (Melania Trump on Jeffrey Epstein) ಮತ್ತು ಕಾಮಪ್ರಚೋದಕ ಹಗರಣಗಳ ಕಿಂಗ್ ಎನಿಸಿಕೊಂಡಿದ್ದ ಜೆಫ್ರಿ ಎಪ್ಸ್ಟೀನ್ ಜೊತೆಗೆ ಸಂಬಂಧವಿತ್ತು ಎಂಬ ವದಂತಿಗಳು ಹರಿದಾಡುತ್ತಿದ್ದವು. ಈ ವದಂತಿಗಳ ಬಗ್ಗೆ ಗುರುವಾರ ಶ್ವೇತಭವನದಿಂದಲೇ ಮಾತನಾಡಿದ ಮೆಲಾನಿಯಾ ಟ್ರಂಪ್ ಎಪ್ಸ್ಟೀನ್ ಮತ್ತು ತಮ್ಮ ಮೇಲೆ ಕೇಳಿ ಬರುತ್ತಿರುವ ಎಲ್ಲಾ ವದಂತಿಗಳನ್ನು ಸಾರಾ ಸಗಟಾಗಿ ತಳ್ಳಿಹಾಕಿದ್ದಾರೆ.

ಕಳೆದ ಕೆಲವು ವರ್ಷಗಳಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಮೆಲಾನಿಯಾ ಟ್ರಂಪ್ ಮತ್ತು ದಿವಂಗತ ಜೆಫ್ರಿ ಎಪ್ಸ್ಟೀನ್ ನಡುವೆ ಸಂಬಂಧವಿತ್ತು ಎಂಬ ಕೆಲವು ಫೋಟೋಗಳು ಮತ್ತು ವರದಿಗಳು ಹರಿದಾಡುತ್ತಿದ್ದವು. ಈ ಬಗ್ಗೆ ಗುಡುಗಿದ ಮೆಲಾನಿಯಾ, ನಾನು ಎಪ್ಸ್ಟೀನ್ ಜೊತೆ ಎಂದಿಗೂ ಸ್ನೇಹ ಬೆಳೆಸಿಲ್ಲ. ಆತನ ಹಗರಣಗಳಲ್ಲಿ ನಾನು ಬಲಿಪಶುವೂ ಅಲ್ಲ. ಆನ್-ಲೈನ್‌ನಲ್ಲಿ ಹರಡುತ್ತಿರುವ ಈ ಸುಳ್ಳು ಸುದ್ದಿಗಳು ಈಗಲೇ ನಿಲ್ಲಬೇಕು ಎಂದು ಎಚ್ಚರಿಸಿದ್ದಾರೆ.

ಮೆಲಾನಿಯಾ ಅವರು ತನಗೇನು ಸಂಬಂಧವಿಲ್ಲ ಎಂದು ಹೇಳಿಕೆ ನೀಡಿದ ಕೆಲವೇ ಗಂಟೆಗಳಲ್ಲಿ, ಸಾಮಾಜಿಕ ಜಾಲತಾಣ ಎಕ್ಸ್​ (ಟ್ವಿಟರ್) ನಲ್ಲಿ ನೆಟ್ಟಿಗರು ಹಳೆಯ ಫೈಲ್‌ಗಳನ್ನು ಹೊರತೆಗೆಯಲು ಶುರು ಮಾಡಿದ್ದಾರೆ. ಇಂಟರ್ನೆಟ್ ಯಾವುದನ್ನೂ ಮರೆಯುವುದಿಲ್ಲ ಎಂಬ ಮಾತಿನಂತೆ, ಎಪ್ಸ್ಟೀನ್ ಮತ್ತು ಡೊನಾಲ್ಡ್ ಟ್ರಂಪ್ ಒಟ್ಟಿಗೆ ಇರುವ 2000ರ ದಶಕದ ಆರಂಭದ ಫೋಟೋಗಳು ಮತ್ತೆ ವೈರಲ್ ಆಗುತ್ತಿವೆ.

ಈ ಚರ್ಚೆಯ ನಡುವೆ 2002ರ ಒಂದು ಇಮೇಲ್ ಈಗ ಭಾರೀ ಚರ್ಚೆಗೆ ಕಾರಣವಾಗಿದೆ. ಲವ್ ಯೂ ಮೆಲಾನಿಯಾ ಎಂದು ಸಹಿ ಮಾಡಲಾದ ಮತ್ತು ಗಿಸ್ಲೇನ್ ಮ್ಯಾಕ್ಸ್‌ವೆಲ್‌ಗೆ ಉದ್ದೇಶಿಸಿ ಬರೆಯಲಾದ ಈ ಇಮೇಲ್‌ನಲ್ಲಿ ಎಪ್ಸ್ಟೀನ್ ಬಗ್ಗೆ ಪ್ರಕಟವಾದ ಲೇಖನದ ಪ್ರಸ್ತಾಪವಿದೆ. ಆದರೂ, ಈ ಇಮೇಲ್ ಕೇವಲ ಸಭ್ಯ ಸಂವಹನವೋ ಅಥವಾ ಇವರ ನಡುವೆ ಆಳವಾದ ಸಂಬಂಧವಿತ್ತೋ ಎಂಬುದು ಇಂದಿಗೂ ನಿಗೂಢವಾಗಿದೆ. ಯಾವುದೇ ಕಾನೂನು ತನಿಖೆಯಲ್ಲಿ ಮೆಲಾನಿಯಾ ಅವರ ಹೆಸರು ಅಧಿಕೃತವಾಗಿ ದಾಖಲಾಗಿಲ್ಲ ಎಂಬುದು ಗಮನಾರ್ಹ.

ಮೆಲಾನಿಯಾ ಟ್ರಂಪ್ ಅವರ ಪ್ರಕಾರ, ಇದೆಲ್ಲವೂ ಡಿಜಿಟಲ್ ಲೋಕದಲ್ಲಿ ಸೃಷ್ಟಿಸಲಾದ ನಕಲಿ ಚಿತ್ರಗಳು ಮತ್ತು ಹೇಳಿಕೆಗಳು. ಪರಿಶೀಲಿಸದ ಯಾವುದೇ ಮಾಹಿತಿಯನ್ನು ಸಾರ್ವಜನಿಕರು ನಂಬಬಾರದು ಎಂದು ಅವರು ವಿನಂತಿಸಿದ್ದಾರೆ. ರಾಜಕೀಯ ವಿರೋಧಿಗಳು ತಮ್ಮ ಹೆಸರನ್ನು ಕೆಡಿಸಲು ಈ ಹಳೆಯ ವಿವಾದವನ್ನು ಕೆದಕುತ್ತಿದ್ದಾರೆ ಎಂಬುದು ಅವರ ವಾದವಾಗಿದೆ, (ಏಜನ್ಸೀಸ್​).