ಮದುವೆಯಾದ ಕೇವಲ 24 ಗಂಟೆಯಲ್ಲೇ ಪತ್ನಿಗೆ ಡಿವೋರ್ಸ್​ ಕೊಟ್ಟ ಗಂಡ: ಕಾರಣ ಕೇಳಿದ್ರೆ ಹುಬ್ಬೇರಿಸೋದು ಖಚಿತ! Divorce

Divorce : ತಮ್ಮ ಹರೆಯದ ಒಲವನ್ನೇ ದಾಂಪತ್ಯಕ್ಕೆ ಅಡಿಪಾಯವಾಗಿಸಿಕೊಂಡು, ಕುಟುಂಬ ಮತ್ತು ಸ್ನೇಹಿತರ ಸಮ್ಮುಖದಲ್ಲಿ ಅದ್ದೂರಿಯಾಗಿ ಮದುವೆಯಾದ ಜೋಡಿಯ 'ಹ್ಯಾಪಿ ಎಂಡಿಂಗ್' ಕಥೆ ಕೇವಲ 24 ಗಂಟೆಗಳಲ್ಲಿ ದುರಂತವಾಗಿ ಅಂತ್ಯಗೊಂಡಿದೆ! ಹಸೆಮಣೆ ಏರಿದ ಮರುದಿನವೇ ಪತಿ, ತನ್ನ ನವವಧುವನ್ನು ಕೈಬಿಟ್ಟು ಹೋದ ಈ ಅಘಾತಕಾರಿ ಘಟನೆ, ಪ್ರೀತಿಯ ಬಲೆಯಲ್ಲಿರುವವರಿಗೆ ಒಂದು ಎಚ್ಚರಿಕೆಯ ಗಂಟೆಯಂತಿದ್ದು, ನೆರೆದವರ ಕಣ್ಣಲ್ಲಿ ನೀರು ತರಿಸುವ ಕಣ್ಣೀರಿನ ಕಥೆಯಾಗಿ ಮಾರ್ಪಟ್ಟಿದೆ.

ರೆಡ್ಡಿಟ್‌ನಲ್ಲಿ (Reddit) "ಮದುವೆಯ ದಿನವೇ ಸಂಗಾತಿಯನ್ನು ತೊರೆದವರ ಕಥೆಯೇನು?" ಎಂಬ ಪ್ರಶ್ನೆಗೆ ಉತ್ತರಿಸಿದ ಮಹಿಳೆಯೊಬ್ಬರು ತನ್ನ ಸೋದರಸಂಬಂಧಿಯ ಜೀವನದಲ್ಲಿ ನಡೆದ ಆಘಾತಕಾರಿ ಘಟನೆಯನ್ನು ಹಂಚಿಕೊಂಡಿದ್ದಾರೆ. ಪ್ರತಿಷ್ಠಿತ ಸಾಮಾಜಿಕ ಹಿನ್ನೆಲೆಯುಳ್ಳ ಕುಟುಂಬದ ಜೋಡಿ, ಕಾಲೇಜಿನ ದಿನಗಳಿಂದಲೇ ಪರಸ್ಪರ ಪ್ರೀತಿಸುತ್ತಿದ್ದರು. ಸುಮಾರು 250ಕ್ಕೂ ಹೆಚ್ಚು ಅತಿಥಿಗಳ ಸಮ್ಮುಖದಲ್ಲಿ ಅತ್ಯಂತ ಅದ್ದೂರಿಯಾಗಿ ಮತ್ತು ಧಾರ್ಮಿಕ ವಿಧಿವಿಧಾನಗಳೊಂದಿಗೆ ಇಬ್ಬರ ಮದುವೆ ನಡೆದಿತ್ತು; ವಿಶೇಷವಾಗಿ ಇವರು ಧಾರ್ಮಿಕ ನಂಬಿಕೆಯುಳ್ಳವರಾಗಿದ್ದರಿಂದ ಮದುವೆಯವರೆಗೂ ಸಂಯಮದಿಂದ ಕಾಯ್ದಿದ್ದ ವಿಷಯವೇ ಆ ಸಮಾರಂಭದಲ್ಲಿ ದೊಡ್ಡ ಚರ್ಚೆಯಾಗಿತ್ತು. ಆದರೆ ಮರುದಿನವೇ ವಿಷಯಗಳು ಬೇರೆ ತಿರುವು ಪಡೆದುಕೊಂಡವು.

ಹನಿಮೂನ್ ಪ್ರವಾಸಕ್ಕಾಗಿ ವಿಮಾನವೇರಿ ಸೀಟಿನಲ್ಲಿ ಕುಳಿತ ಬೆನ್ನಲ್ಲೇ ಆ ನವ ವರ ತನ್ನ ಹೆಂಡತಿಯ ಕಡೆಗೆ ತಿರುಗಿ, "ಈ ಮದುವೆ ಮಾಡಿಕೊಂಡಿದ್ದೇ ಒಂದು ತಪ್ಪು" ಎಂದು ಹೇಳುವ ಮೂಲಕ ಅವಳಿಗೆ ಶಾಕ್ ನೀಡಿದ್ದ. ಅಷ್ಟೇ ಅಲ್ಲದೆ, ಆ ಕ್ಷಣದಿಂದಲೇ ಆಕೆಯೊಂದಿಗೆ ಮಾತನಾಡುವುದನ್ನು ಸಂಪೂರ್ಣವಾಗಿ ನಿಲ್ಲಿಸಿ ಮೌನಕ್ಕೆ ಶರಣಾಗಿದ್ದ. ಅವರು ಫ್ರೆಂಚ್ ಪಾಲಿನೇಷ್ಯಾದ ಅತಿದೊಡ್ಡ ದ್ವೀಪ ತಹಿತಿ ತಲುಪಿದ ತಕ್ಷಣ, ಆಕೆ ಅಲ್ಲಿಂದಲೇ ಮುಂದಿನ ವಿಮಾನ ಹಿಡಿದು ಮನೆಗೆ ಮರಳಿದರೆ, ಆತ ಮಾತ್ರ ಅಲ್ಲಿಯೇ ಉಳಿದುಕೊಂಡು ಹನಿಮೂನ್ ಸ್ವೀಟ್‌ನಲ್ಲಿ ಬೇರೆ ಬೇರೆ ಮಹಿಳೆಯರೊಂದಿಗೆ ಕಾಲ ಕಳೆದಿದ್ದ.

ಈ ಘಟನೆ ನಡೆದು ಒಂದು ತಿಂಗಳ ನಂತರ ಆತ ಪಶ್ಚಾತ್ತಾಪದ ನಾಟಕವಾಡುತ್ತಾ ಆಕೆಯ ಬಳಿ ಮರಳಿ ಬಂದರೂ, ಅಷ್ಟರಲ್ಲೇ ಆಕೆ ತೀವ್ರ ಅವಮಾನ ಅನುಭವಿಸಿದ್ದಳು. ಆತ ಅಲ್ಲಿ ಮೋಜು-ಮಸ್ತಿ ಮಾಡುತ್ತಿದ್ದರೆ, ಇತ್ತ ಆಕೆ ಮದುವೆಯ ಉಡುಗೊರೆಗಳನ್ನು ಹಿಂದಿರುಗಿಸುತ್ತಾ ಮತ್ತು ಎಲ್ಲರಿಗೂ ಉತ್ತರ ನೀಡುತ್ತಾ ನರಕಯಾತನೆ ಅನುಭವಿಸಿದ್ದಳು. ಮರಳಿ ಬಂದಾಗ ತಾನು ಮದುವೆಗೆ ಸಿದ್ಧನಿರಲಿಲ್ಲ ಮತ್ತು ಒತ್ತಡಕ್ಕೆ ಮಣಿದು ಮದುವೆಯಾಗಿದ್ದೆ ಎಂದು ಆತ ಹಾರಿಕೆಯ ಉತ್ತರಗಳನ್ನು ನೀಡಿದ್ದ.

ಕೊನೆಗೆ ಆ ದಂಪತಿ ಕಾನೂನುಬದ್ಧವಾಗಿ ವಿವಾಹ ವಿಚ್ಛೇದನ ಪಡೆದಿದ್ದು, ಹಳೆಯ ಸ್ನೇಹಿತರ ಕೂಟಗಳಲ್ಲಿ ಈಗಲೂ ಅವರಿಬ್ಬರಿಗೂ ಮುಖಾಮುಖಿಯಾಗುವುದು ತೀವ್ರ ಮುಜುಗರದ ಸಂಗತಿಯಾಗಿದೆ. ಆದರೆ, ಈ ಕಹಿ ಘಟನೆಯ ನಂತರ ಆಕೆಯ ಜೀವನದಲ್ಲಿ ಒಳ್ಳೆಯ ಬದಲಾವಣೆಯಾಗಿದ್ದು, ಈಗ ಮತ್ತೊಬ್ಬ ವ್ಯಕ್ತಿಯನ್ನು ವರಿಸಿರುವ ಆಕೆ ಮೂವರು ಮಕ್ಕಳೊಂದಿಗೆ ಸುಖಿ ಸಂಸಾರ ನಡೆಸುತ್ತಿದ್ದಾಳೆ. ಹೊರನೋಟಕ್ಕೆ ಪರಿಪೂರ್ಣವಾಗಿ ಕಾಣುವ ಸಂಬಂಧಗಳು ವಾಸ್ತವದಲ್ಲಿ ಹೇಗಿರುತ್ತವೆ ಎಂಬುದು ಯಾರಿಗೂ ತಿಳಿಯುವುದಿಲ್ಲ, ಆತ ಆಕೆಯ ಜೀವನದಿಂದ ದೂರ ಸರಿದಿದ್ದೇ ಆಕೆಗೆ ಸಿಕ್ಕ ಸರಿಯಾದ ವ್ಯಕ್ತಿಗೆ ದಾರಿಯಾಯಿತು ಎಂಬುದು ಇಲ್ಲಿ ಗಮನಾರ್ಹ.

ಈ ಪೋಸ್ಟ್‌ಗೆ ಪ್ರತಿಕ್ರಿಯಿಸಿರುವ ನೆಟ್ಟಿಗರು ವಿವಿಧ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದು, "ಆತ ಮತ್ತೆ ಮದುವೆಯಾದನೇ?" ಎಂದು ಕುತೂಹಲ ವ್ಯಕ್ತಪಡಿಸಿದ್ದಾರೆ. ಹದಿಹರೆಯದಲ್ಲಿ ಅಂತಹ ಜೋಡಿಗಳನ್ನು ಪರಿಪೂರ್ಣತೆಯ ಸಂಕೇತವೆಂದು ನಂಬಿಸಲಾಗಿತ್ತು, ಆದರೆ ವಾಸ್ತವದಲ್ಲಿ ಅದು ಅತೀವ ಧಾರ್ಮಿಕತೆಯಿಂದ ಕೂಡಿದ ಕಟ್ಟುಕಥೆಯಷ್ಟೇ ಎಂದು ಒಬ್ಬರು ಟೀಕಿಸಿದ್ದಾರೆ. ಮತ್ತೊಬ್ಬ ಬಳಕೆದಾರರು ವಿಶ್ಲೇಷಿಸುತ್ತಾ, "ಅವರ ಸಂಬಂಧ ಎಂದಿಗೂ ಪರಿಪೂರ್ಣವಾಗಿ ಕಾಣಿಸಿರಲಿಲ್ಲ; ಅವರು ಬೇರೆ ಯಾರೊಂದಿಗೂ ಡೇಟಿಂಗ್ ಮಾಡಿರಲಿಲ್ಲ ಅಥವಾ ಹೊರಜಗತ್ತಿನ ಅನುಭವವನ್ನೇ ಪಡೆದಿರಲಿಲ್ಲ, ಹೀಗಾಗಿಯೇ ಆತನಿಗೆ ಹೊರಗಿನ ಪ್ರಪಂಚದ ಬಗ್ಗೆ ಕುತೂಹಲ ಮೂಡಿ ಈ ರೀತಿ ನಡೆದುಕೊಂಡಿದ್ದಾನೆ" ಎಂದು ಅಭಿಪ್ರಾಯಪಟ್ಟಿದ್ದಾರೆ, (ಏಜೆನ್ಸೀಸ್​).