ಪಲ್ಲಂಗದಲ್ಲಿ ಪರಪುರುಷನ ಜತೆ ಪತ್ನಿ: ರೋಬಾಟ್ ವ್ಯಾಕ್ಯೂಮ್ ಕ್ಲೀನರ್ ಮೂಲಕ ಹೆಂಡ್ತಿಯ ಕರಾಳ ಮುಖ ಬಯಲಿಗೆ! Robot Vacuum Cleaner

ತೈಪೆ : ಮಾನವನ ಬುದ್ಧಿಮತ್ತೆಗೆ ತಂತ್ರಜ್ಞಾನ ಹೇಗೆ ಕೈಗನ್ನಡಿಯಾಗುತ್ತದೆ ಎಂಬುದಕ್ಕೆ ಇತ್ತೀಚಿನ ಈ ಘಟನೆಯೇ ಸಾಕ್ಷಿ. ರೋಬಾಟ್ ವ್ಯಾಕ್ಯೂಮ್ ಕ್ಲೀನರ್ ( Robot Vacuum Cleaner ) ಅನ್ನು ಮನೆಯಲ್ಲಿರುವ ಧೂಳು ತೆಗೆಯಲು ಮಾತ್ರ ಬಳಸುತ್ತಾರೆ ಎಂದುಕೊಂಡರೆ ಅದು ತಪ್ಪು! ತೈವಾನ್​ನ ತೈಪೆ ನಗರದಲ್ಲಿ ನಡೆದ ಒಂದು ರೋಚಕ ಪ್ರಕರಣದಲ್ಲಿ, ಇದೇ ರೋಬಾಟ್ ವ್ಯಾಕ್ಯೂಮ್ ಕ್ಲೀನರ್ ಹೆಂಡತಿಯ ಅಕ್ರಮ ಸಂಬಂಧದ ರಹಸ್ಯವನ್ನು ಗಂಡನ ಮುಂದೆ ತೆರೆದಿಟ್ಟಿದೆ. ಆದರೆ, ಈ ತಾಂತ್ರಿಕ ಬೇಹುಗಾರಿಕೆ ಗಂಡನಿಗೆ ಸಂಕಷ್ಟವನ್ನು ತಂದೊಡ್ಡಿದೆ.

ತೈಪೆಯಲ್ಲಿ ವ್ಯಕ್ತಿಯೊಬ್ಬ ತನ್ನ ಹೆಂಡತಿ ಮತ್ತು ತಂದೆ-ತಾಯಿಯೊಂದಿಗೆ ವಾಸಿಸುತ್ತಿದ್ದನು. ಇದರೊಂದಿಗೆ ಅವರು ಆಗಾಗ ರಜಾದಿನಗಳನ್ನು ಕಳೆಯಲು ತಮ್ಮ ಹಾಲಿಡೇ ಹೋಮ್‌ಗೆ ತೆರಳುತ್ತಿದ್ದರು. ಆದರೆ, ಸುಖವಾಗಿದ್ದ ಇವರ ಸಂಸಾರದಲ್ಲಿ ಬಿರುಗಾಳಿ ಎದ್ದಿದ್ದು 2023ರ ಸೆಪ್ಟೆಂಬರ್‌ನಲ್ಲಿ. ಹಾಲಿಡೇ ಹೋಮ್‌ನಲ್ಲಿ ಪತಿಗೆ ಅಪರಿಚಿತ ಪುರುಷನೊಬ್ಬನ ಬಳಕೆಯಾದ ಹಲ್ಲುಜ್ಜುವ ಬ್ರಷ್ ಸಿಕ್ಕಾಗ ಆತನಿಗೆ ಹೆಂಡತಿಯ ಮೇಲೆ ಅನುಮಾನ ಮೂಡಿತು.

ಅನುಮಾನ ಬಲಗೊಂಡ ಮೇಲೆ ಪತಿ ತಾನೇ ಸ್ವತಃ ತನಿಖೆಗೆ ಇಳಿದನು. ಹಾಲಿಡೇ ಹೋಮ್‌ನ ಪಾರ್ಕಿಂಗ್ ಪ್ರದೇಶದ ಸಿಸಿಟಿವಿ ಕ್ಯಾಮೆರಾ ಪರಿಶೀಲಿಸಿದಾಗ, ಅಲ್ಲಿಗೆ ಒಬ್ಬ ಅಪರಿಚಿತ ವ್ಯಕ್ತಿ ಬಂದು ಹೋಗುತ್ತಿರುವುದು ಬಯಲಾಯಿತು. ಅಷ್ಟೇ ಅಲ್ಲದೆ, ಅದೇ ವ್ಯಕ್ತಿ ತನ್ನ ಹೆಂಡತಿಯನ್ನು ಹಿಂದೊಮ್ಮೆ ಮನೆಗೆ ಬಿಟ್ಟು ಹೋಗಿದ್ದ ಸಂಗತಿ ಆತನ ನೆನಪಿಗೆ ಬಂದು, ಆತಂಕ ಇಮ್ಮಡಿಯಾಯಿತು. ಹೆಂಡತಿಯ ಅಕ್ರಮ ಕೂಟದ ಸತ್ಯಾಸತ್ಯತೆಯನ್ನು ಹೇಗಾದರೂ ಮಾಡಿ ಹೊರಹಾಕಲೇಬೇಕೆಂದು ಆತ ಪಣ ತೊಟ್ಟನು.

ಕೊನೆಗೆ ಆತ ಬಳಸಿದ ಅಸ್ತ್ರವೇ ಮನೆಯಲ್ಲಿ ಓಡಾಡುತ್ತಿದ್ದ ರೋಬಾಟ್ ವ್ಯಾಕ್ಯೂಮ್ ಕ್ಲೀನರ್! ಮೊಬೈಲ್ ಆ್ಯಪ್ ಮೂಲಕ ಈ ಸ್ಮಾರ್ಟ್ ಕ್ಲೀನರ್ ಅನ್ನು ನಿಯಂತ್ರಿಸುತ್ತಾ, ಅದರಲ್ಲಿದ್ದ ಕ್ಯಾಮೆರಾ ಹಾಗೂ ರೆಕಾರ್ಡಿಂಗ್ ಸಹಾಯದಿಂದ ಹೆಂಡತಿಯ ಕೃತ್ಯವನ್ನು ಕಣ್ಣಾರೆ ಕಂಡನು. ತನ್ನ ಹೆಂಡತಿ ಬೇರೆ ಪುರುಷನೊಂದಿಗೆ ಅಕ್ರಮ ಸಂಬಂಧ ಹೊಂದಿರುವುದನ್ನು ಸಾಬೀತುಪಡಿಸುವ ಸ್ಪಷ್ಟ ವಿಡಿಯೋ ದೃಶ್ಯಗಳು ಆತನ ಕೈಸೇರಿದವು. ತಕ್ಷಣವೇ ಈ ಸಾಕ್ಷ್ಯಗಳನ್ನು ಸಿವಿಲ್ ಕೋರ್ಟ್‌ಗೆ ಒದಗಿಸಿದ ಪತಿಗೆ ನ್ಯಾಯ ಸಿಕ್ಕಿತು ಮತ್ತು ವಂಚನೆ ಎಸಗಿದ ಹೆಂಡತಿಗೆ 15 ಲಕ್ಷ ರೂಪಾಯಿ ಪರಿಹಾರ ನೀಡುವಂತೆ ಕೋರ್ಟ್ ಆದೇಶಿಸಿತು.

ಆದರೆ ಕಥೆ ಇಲ್ಲಿಗೆ ಮುಗಿಯಲಿಲ್ಲ, ತಂತ್ರಜ್ಞಾನದ ಬಳಕೆ ಗಂಡನಿಗೆ ತಿರುಗುಬಾಣವಾಯಿತು! ಹೆಂಡತಿ ಸುಮ್ಮನೆ ಕೂರದೆ, ತನ್ನ ಒಪ್ಪಿಗೆಯಿಲ್ಲದೆ ತನ್ನ ಖಾಸಗಿ ದೃಶ್ಯಗಳನ್ನು ರಹಸ್ಯವಾಗಿ ರೆಕಾರ್ಡ್ ಮಾಡಲಾಗಿದೆ ಎಂದು ಪತಿಯ ವಿರುದ್ಧವೇ ಪ್ರತಿದೂರು ದಾಖಲಿಸಿದಳು. ಕಾನೂನಿನ ಕಣ್ಣಿನಲ್ಲಿ ರಹಸ್ಯವಾಗಿ ಖಾಸಗಿ ದೃಶ್ಯ ಸೆರೆಹಿಡಿಯುವುದು ಅಪರಾಧವಾದ್ದರಿಂದ, ಕೋರ್ಟ್ ಪತಿಗೆ ಐದು ತಿಂಗಳ ಜೈಲು ಶಿಕ್ಷೆ ಹಾಗೂ 4.5 ಲಕ್ಷ ರೂಪಾಯಿ ದಂಡ ವಿಧಿಸಿತು. ಒಟ್ಟಿನಲ್ಲಿ, ಅಕ್ರಮ ಸಂಬಂಧದ ಸತ್ಯ ಬಯಲು ಮಾಡಿದ ಗಂಡನಿಗೆ ರೋಬಾಟ್ ವ್ಯಾಕ್ಯೂಮ್ ಕ್ಲೀನರ್ ಕೊನೆಗೂ ಜೈಲು ದಾರಿಯನ್ನು ಸಹ ತೋರಿಸಿತು. (ಏಜೆನ್ಸೀಸ್​).