ಆದರೆ, ಕೇವಲ ಮತಕ್ಕಾಗಿ ಒಬ್ಬ ಮಹಿಳೆಯ ಕುಟುಂಬದ ಆಂತರಿಕ ನೋವನ್ನು ಬೀದಿಗೆ ತಂದ ರಾಮಸ್ವಾಮಿ ನಡೆಗೆ ಜನರಿಂದ ಮಾತ್ರವಲ್ಲ, ಸ್ವತಃ ಅವರದೇ ರಿಪಬ್ಲಿಕನ್ ಪಕ್ಷದ ನಾಯಕರಿಂದಲೂ ತೀವ್ರ ವಿರೋಧ ವ್ಯಕ್ತವಾಯಿತು. ಹಾಲಿ ರಿಪಬ್ಲಿಕನ್ ಗವರ್ನರ್ ಮೈಕ್ ಡಿವೈನ್, "ಇದು ಅತ್ಯಂತ ಅಸಹ್ಯಕರ ಮತ್ತು ಆತಂಕಕಾರಿ ನಡೆ" ಎಂದು ರಾಮಸ್ವಾಮಿ ವಿರುದ್ಧ ಆಕ್ರೋಶ ಹೊರಹಾಕಿದ್ದರು. ಈ ಒಂದೇ ಒಂದು ಜಾಹೀರಾತು ಜನರಲ್ಲಿ ರಾಮಸ್ವಾಮಿ ಬಗ್ಗೆ ತೀವ್ರ ಅಸಮಾಧಾನ ಮೂಡಿಸಿತು.
ಟ್ರಂಪ್–ವ್ಯಾನ್ಸ್ ಜೋಡಿಯ ತಂತ್ರವೂ ಉಲ್ಟಾ!
ಓಹಿಯೋ, ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಅವರ ತವರು ರಾಜ್ಯ. ಹೀಗಾಗಿ ಟ್ರಂಪ್ ಮತ್ತು ವ್ಯಾನ್ಸ್ ಇಬ್ಬರೂ ರಾಮಸ್ವಾಮಿ ಪರ ಭರ್ಜರಿ ಬ್ಯಾಟಿಂಗ್ ಮಾಡಿದ್ದರು. 2024ರ ಚುನಾವಣೆಯಲ್ಲಿ ಟ್ರಂಪ್ ಇಲ್ಲಿ ಶೇಕಡಾ 11 ರಷ್ಟು ದೊಡ್ಡ ಅಂತರದಿಂದ ಗೆದ್ದಿದ್ದರು. ಆದರೂ ರಾಮಸ್ವಾಮಿಯನ್ನು ಗೆಲ್ಲಿಸಲು ಟ್ರಂಪ್ ವರ್ಚಸ್ಸಿಗೆ ಸಾಧ್ಯವಾಗಲಿಲ್ಲ.
ಇನ್ನೊಂದೆಡೆ, ಆಮಿ ಆಕ್ಟನ್ ಅವರು ರಾಮಸ್ವಾಮಿಯನ್ನು "ಜನಸಾಮಾನ್ಯರ ಕಷ್ಟ ಗೊತ್ತಿಲ್ಲದ ಬಿಲಿಯನೇರ್" ಎಂದು ಕರೆಯುತ್ತಾ, ಅವರೊಂದಿಗೆ ಬಹಿರಂಗ ಚರ್ಚೆಗೂ ಇಳಿಯದೆ ತಿರಸ್ಕರಿಸಿದ್ದರು. ಬದಲಿಗೆ, ಕಾರ್ಮಿಕರಿಗೆ ತೆರಿಗೆ ವಿನಾಯಿತಿ, ಸಾಮಾನ್ಯರಿಗೆ ಆಸ್ತಿ ತೆರಿಗೆ ಪರಿಹಾರ ಮತ್ತು ಕಡಿಮೆ ದರದಲ್ಲಿ ಔಷಧಿ ಸಿಗುವಂತಹ ಜನಪರ ಭರವಸೆಗಳನ್ನೇ ತಮ್ಮ ಅಸ್ತ್ರವನ್ನಾಗಿಸಿಕೊಂಡರು. ಕೊರೊನಾ ಸಂದರ್ಭದಲ್ಲಿ ಓಹಿಯೋ ಆರೋಗ್ಯ ಇಲಾಖೆಯ ಮುಖ್ಯಸ್ಥೆಯಾಗಿ ಅವರು ಮಾಡಿದ ಸೇವೆ ಕೂಡ ಜನರಿಗೆ ಹತ್ತಿರವಾಗಿತ್ತು.
