ಎಲಾನ್​ ಮಸ್ಕ್ ಸಂಪತ್ತು ಇವರ ಮುಂದೆ ಜುಜುಬಿ! ಮಸ್ಕ್ ಆಸ್ತಿಗಿಂತ ನೂರು ಪಟ್ಟು ಅಧಿಕ ಸಂಪತ್ತು ಹೊಂದಿದ್ದ ರಾಜರು ಇವರೇ...Elon Musk

Elon Musk : ವಿಶ್ವದ ನಂ.1 ಧನಿಕ, ಉದ್ಯಮಿ ಎಲಾನ್ ಮಸ್ಕ್ ಅವರ ಒಡೆತನದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ 'ಸ್ಪೇಸ್‌ಎಕ್ಸ್' (SpaceX) ಷೇರು ಮಾರುಕಟ್ಟೆಗೆ ಭರ್ಜರಿ ಐಪಿಒ (IPO) ಮೂಲಕ ಪದಾರ್ಪಣೆ ಮಾಡಿದ್ದು, ಜಾಗತಿಕ ಕಾರ್ಪೊರೇಟ್ ಇತಿಹಾಸದಲ್ಲೇ ಹೊಸ ದಾಖಲೆ ಬರೆದಿದೆ. ಈ ಐಪಿಒ ಯಶಸ್ಸಿನಿಂದಾಗಿ ಸ್ಪೇಸ್‌ಎಕ್ಸ್ ಸಂಸ್ಥೆಯ ಮೌಲ್ಯವು ಬರೋಬ್ಬರಿ 2 ಟ್ರಿಲಿಯನ್ ಡಾಲರ್ ದಾಟಿದ್ದು, ಇದರ ಬೆನ್ನಲ್ಲೇ ಎಲಾನ್ ಮಸ್ಕ್ ಅವರ ವೈಯಕ್ತಿಕ ಆಸ್ತಿ ಮೌಲ್ಯವೂ ಸಹ 1 ಟ್ರಿಲಿಯನ್ ಡಾಲರ್ ( ಭಾರತೀಯ ರೂಪಾಯಿಗಳಲ್ಲಿ ಅಂದಾಜು 93 ಲಕ್ಷ ಕೋಟಿ ರೂ.ಗಿಂತ ಅಧಿಕ) ಗಡಿಯನ್ನು ದಾಟಿದೆ. ಈ ಮೂಲಕ ಆಧುನಿಕ ಜಗತ್ತಿನ ಮತ್ತು ಮಾನವ ಇತಿಹಾಸದ "ಅಧಿಕೃತ ಮೊದಲ ಟ್ರಿಲಿಯನೇರ್" (ಲಕ್ಷ ಕೋಟ್ಯಧಿಪತಿ) ಎಂಬ ಅಪರೂಪದ ಹೆಗ್ಗಳಿಕೆಗೆ ಪಾತ್ರರಾಗುವ ಮೂಲಕ ಎಲಾನ್ ಮಸ್ಕ್ ಜಾಗತಿಕ ಮಟ್ಟದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದ್ದಾರೆ.

ಆದಾಗ್ಯೂ, ಇತಿಹಾಸಕಾರರು ಎಲಾನ್ ಮಸ್ಕ್ ಅವರ ಈ ಐತಿಹಾಸಿಕ ಸಾಧನೆಯನ್ನು ವಿಭಿನ್ನ ದೃಷ್ಟಿಕೋನದಿಂದ ವಿಶ್ಲೇಷಿಸುತ್ತಿದ್ದಾರೆ. ಇಂದಿನ ಅಮೆರಿಕನ್ ಡಾಲರ್ ಮೌಲ್ಯಕ್ಕೆ ಹೋಲಿಸಿ ಲೆಕ್ಕಾಚಾರ ಹಾಕಿದರೆ, ಇತಿಹಾಸದಲ್ಲಿ ಜಗತ್ತನ್ನು ಆಳಿದ ಹಲವು ಚಕ್ರವರ್ತಿಗಳು, ರಾಜರು ಮತ್ತು ಸುಲ್ತಾನರು ಹೊಂದಿದ್ದ ಸಂಪತ್ತು ಎಲಾನ್ ಮಸ್ಕ್ ಅವರ ಇಂದಿನ ಆಸ್ತಿಗಿಂತಲೂ ಎಷ್ಟೋ ಪಟ್ಟು ಹೆಚ್ಚಾಗಿತ್ತು ಎಂದು ಇತಿಹಾಸಕಾರರು ಅಭಿಪ್ರಾಯಪಡುತ್ತಾರೆ. ಅವರು ಆಳಿದ ಸಾಮ್ರಾಜ್ಯದ ವಿಸ್ತೀರ್ಣ, ಆ ಕಾಲದಲ್ಲಿದ್ದ ತೆರಿಗೆ ವ್ಯವಸ್ಥೆ, ನೈಸರ್ಗಿಕ ಸಂಪನ್ಮೂಲಗಳ ಮೇಲಿನ ಸಂಪೂರ್ಣ ನಿಯಂತ್ರಣ ಮತ್ತು ಅಂತಾರಾಷ್ಟ್ರೀಯ ವ್ಯಾಪಾರದ ಮೇಲಿದ್ದ ಪ್ರಭಾವದ ಆಧಾರದ ಮೇಲೆ ಅವರ ಸಂಪತ್ತನ್ನು ಅಂದಾಜಿಸಲಾಗಿದೆ.

ರಾಜರ ಕಾಲದಲ್ಲಿ ವೈಯಕ್ತಿಕ ಸಂಪತ್ತು ಮತ್ತು ದೇಶದ ಸಂಪತ್ತಿನ ನಡುವೆ ಯಾವುದೇ ವ್ಯತ್ಯಾಸವಿರಲಿಲ್ಲ, ಇಡೀ ಸಾಮ್ರಾಜ್ಯದ ಖಜಾನೆಯೇ ರಾಜನ ಸ್ವತ್ತಾಗಿತ್ತು. ಉದಾಹರಣೆಗೆ, ಇತಿಹಾಸದಲ್ಲೇ ಅತ್ಯಂತ ಶ್ರೀಮಂತ ವ್ಯಕ್ತಿ ಎಂದು ಪರಿಗಣಿಸಲಾದ ಆಫ್ರಿಕಾದ ಮಾಲಿ ಸಾಮ್ರಾಜ್ಯದ ದೊರೆ 'ಮನ್ಸಾ ಮೂಸಾ', ಇಡೀ ಜಗತ್ತಿನ ಚಿನ್ನದ ಮಾರುಕಟ್ಟೆಯನ್ನೇ ನಿಯಂತ್ರಿಸುತ್ತಿದ್ದ ರೋಮನ್ ಚಕ್ರವರ್ತಿ 'ಅಗಸ್ಟಸ್ ಸೀಸರ್' ಹಾಗೂ ಭಾರತವನ್ನು ಆಳಿದ ಮೊಘಲ್ ಬಾದಷಾ 'ಅಕ್ಬರ್' ಮುಂತಾದವರ ಆಸ್ತಿ ಮೌಲ್ಯವನ್ನು ಇಂದಿನ ಮಾರುಕಟ್ಟೆಗೆ ಹೋಲಿಸಿದರೆ ಅದು ನೂರಾರು ಟ್ರಿಲಿಯನ್ ಡಾಲರ್‌ಗಳಷ್ಟಾಗುತ್ತದೆ. ಹೀಗಾಗಿ, ಆಧುನಿಕ ಕಾರ್ಪೊರೇಟ್ ಜಗತ್ತಿನಲ್ಲಿ ಮಸ್ಕ್ ಮೊದಲ ಟ್ರಿಲಿಯನೇರ್ ಆಗಿರಬಹುದು, ಆದರೆ ಇತಿಹಾಸದ ಪುಟಗಳನ್ನು ತಿರುವಿದರೆ ಅವರಿಗಿಂತಲೂ ಶ್ರೀಮಂತ ದೊರೆಗಳು ಜಗತ್ತನ್ನು ಆಳಿ ಹೋಗಿದ್ದಾರೆ ಎಂದು ಇತಿಹಾಸಕಾರರು ನೆನಪಿಸುತ್ತಿದ್ದಾರೆ.

ಇತಿಹಾಸಕಾರರ ಪ್ರಕಾರ, ರಷ್ಯಾದ ಕ್ಯಾಥರಿನ್ ದಿ ಗ್ರೇಟ್, ರೋಮನ್ ಚಕ್ರವರ್ತಿ ಅಗಸ್ಟಸ್ ಸೀಸರ್, ಸೋವಿಯತ್ ನಾಯಕ ಜೋಸೆಫ್ ಸ್ಟಾಲಿನ್, ಚೀನಾದ ಸಾಮ್ರಾಜ್ಞಿ ವೂ ಝೆಟಿಯನ್, ಭಾರತದ ಮೊಘಲ್ ಬಾದಷಾ ಅಕ್ಬರ್ ಮತ್ತು ಮಾಲಿ ಸಾಮ್ರಾಜ್ಯದ ದೊರೆ ಮನ್ಸಾ ಮೂಸಾ ಅವರಂತಹ ಐತಿಹಾಸಿಕ ಆಡಳಿತಗಾರರು ಇಂದಿನ ಮೌಲ್ಯದಲ್ಲಿ ನೂರಾರು ಟ್ರಿಲಿಯನ್ ಡಾಲರ್ ಸಂಪತ್ತನ್ನು ನಿಯಂತ್ರಿಸುತ್ತಿದ್ದರು.

ಈ ಇತಿಹಾಸ ಪ್ರಸಿದ್ಧ ವ್ಯಕ್ತಿಗಳ ಆಸ್ತಿಯು ಕೇವಲ ಅವರ ವೈಯಕ್ತಿಕ ಖಜಾನೆಯಷ್ಟೇ ಆಗಿರದೆ, ಅವರು ಆಳುತ್ತಿದ್ದ ಇಡೀ ಸಾಮ್ರಾಜ್ಯದ ಭೌಗೋಳಿಕ ವಿಸ್ತೀರ್ಣ, ಜಾಗತಿಕ ಆರ್ಥಿಕತೆಯ ಮೇಲಿದ್ದ ಅವರ ಸಂಪೂರ್ಣ ಹಿಡಿತ ಮತ್ತು ಆ ಕಾಲದ ಬೃಹತ್ ಆರ್ಥಿಕ ಸಾಮರ್ಥ್ಯವನ್ನು ಪ್ರತಿಬಿಂಬಿಸುತ್ತದೆ ಎಂದು ಇತಿಹಾಸಕಾರರು ವಿವರಿಸಿದ್ದಾರೆ.

ಜಾಗತಿಕ ಇತಿಹಾಸದ ಅತ್ಯಂತ ಶ್ರೀಮಂತ ಆಡಳಿತಗಾರರ ಪಟ್ಟಿಯಲ್ಲಿ ಮಂಗೋಲಿಯಾದ ಕ್ರೂರ ಹಾಗೂ ಪರಾಕ್ರಮಿ ದೊರೆ ಗೆಂಘಿಸ್ ಖಾನ್ ಹೆಸರು ಪ್ರಮುಖವಾಗಿ ಎದ್ದು ಕಾಣುತ್ತದೆ. ಏಷ್ಯಾ ಮತ್ತು ಯುರೋಪ್ ಖಂಡಗಳಾದ್ಯಂತ ವಿಶಾಲವಾಗಿ ಹರಡಿದ್ದ ಬೃಹತ್ ಮಂಗೋಲ್ ಸಾಮ್ರಾಜ್ಯವನ್ನು ಕಟ್ಟಿ ಬೆಳೆಸಿದ್ದ ಗೆಂಘಿಸ್ ಖಾನ್ ಹೊಂದಿದ್ದ ಸಂಪತ್ತಿನ ಮೌಲ್ಯ, ಇಂದಿನ ಲೆಕ್ಕಾಚಾರದಲ್ಲಿ ನೂರಾರು ಟ್ರಿಲಿಯನ್ ಡಾಲರ್‌ಗಳಿಗೆ ಸಮಾನವಾಗಿತ್ತು ಎಂದು ಕೆಲವು ಇತಿಹಾಸಕಾರರು ಅಂದಾಜಿಸುತ್ತಾರೆ. ಅದೇ ರೀತಿ, ಚೀನಾದ ಸಾಂಗ್ ರಾಜವಂಶದ ಚಕ್ರವರ್ತಿ ಶೆನ್‌ಜಾಂಗ್ ಕೂಡ ಆ ಕಾಲದಲ್ಲೇ ಇಡೀ ಜಗತ್ತಿನ ಒಟ್ಟು ಜಿಡಿಪಿಯ ಸಿಂಹಪಾಲು ಆರ್ಥಿಕತೆಯನ್ನು ನಿಯಂತ್ರಿಸುತ್ತಿದ್ದ ಬಲಿಷ್ಠ ಹಾಗೂ ಅಪಾರ ಆಸ್ತಿಯ ಒಡೆಯನಾಗಿ ಗುರುತಿಸಿಕೊಂಡಿದ್ದಾರೆ.

ಆಧುನಿಕ ಜಗತ್ತಿನ ಕಾರ್ಪೊರೇಟ್ ಇತಿಹಾಸದಲ್ಲಿ ಎಲಾನ್ ಮಸ್ಕ್ ಅವರು ಅಧಿಕೃತವಾಗಿ "ಮೊದಲ ಟ್ರಿಲಿಯನೇರ್" ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿರಬಹುದು. ಆದರೆ, ಜಾಗತಿಕ ಇತಿಹಾಸದ ಪುಟಗಳನ್ನು ತಿರುವಿ ನೋಡಿದಾಗ ಇವರಿಗಿಂತಲೂ ಎಷ್ಟೋ ಪಟ್ಟು ಹೆಚ್ಚು ಸಂಪತ್ತು, ಭೂಮಿ ಮತ್ತು ನೈಸರ್ಗಿಕ ಸಂಪನ್ಮೂಲಗಳನ್ನು ತಮ್ಮ ಮುಷ್ಟಿಯಲ್ಲಿಟ್ಟುಕೊಂಡು ಇಡೀ ಸಾಮ್ರಾಜ್ಯವನ್ನೇ ಆಳಿದ ರಾಜ-ಮಹಾರಾಜರು ಹಾಗೂ ಚಕ್ರವರ್ತಿಗಳು ಈಗಾಗಲೇ ಇದ್ದಾರೆ ಎಂಬ ಇತಿಹಾಸಕಾರರ ವಾದವು ಪ್ರಸ್ತುತ ಜಾಗತಿಕ ಮಟ್ಟದಲ್ಲಿ ಅತ್ಯಂತ ಕುತೂಹಲಕಾರಿ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ.

ಅಂದಹಾಗೆ, ಉದ್ಯಮಿ ಎಲಾನ್​ ಮಸ್ಕ್​ ಅವರು ವಿಶ್ವದ ಮೊದಲ ಟ್ರಿಲಿಯನೇರ್​ ಆಗಿ ಹೊರಹೊಮ್ಮಿದ್ದಾರೆ. ಟೆಸ್ಲಾ, ಸ್ಪೇಸ್​ ಎಕ್ಸ್​, ಎಕ್ಸ್​​ ಹಾಗೂ ಕೃತಕ ಬುದ್ಧಿಮತ್ತೆ ಕ್ಷೇತ್ರದ ಕಂಪನಿಗಳ ಯಶಸ್ಸಿನ ಬೆನ್ನಲ್ಲೇ ಮೊದಲ ಟ್ರಿಲೇನಿಯರ್​​ ಎಂಬ ಹೆಗ್ಗಳಿಕೆಗೆ ಮಸ್ಕ್​ ಪಾತ್ರರಾಗಿದ್ದಾರೆ. ಮಸ್ಕ್ ಅವರ ಒಟ್ಟು ಆಸ್ತಿ ಮೌಲ್ಯ 1.1 ಟ್ರಿಲಿಯನ್ ಡಾಲರ್ ತಲುಪಿದೆ ಎಂದು ವರದಿಗಳು ತಿಳಿಸಿವೆ. ಇದುವರೆಗೆ ಜಗತ್ತಿನ ಯಾವುದೇ ವ್ಯಕ್ತಿ ಟ್ರಿಲಿಯನ್ ಡಾಲರ್ ಆಸ್ತಿ ಗಡಿ ದಾಟಿರಲಿಲ್ಲ. ಇದೇ ಕಾರಣಕ್ಕೆ ಎಲಾನ್ ಮಸ್ಕ್ ಅವರ ಈ ಸಾಧನೆ ಜಾಗತಿಕ ಮಟ್ಟದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಒಂದು ಟ್ರಿಲಿಯನ್ ಅಂದರೆ ಬರೋಬ್ಬರಿ 1000 ಬಿಲಿಯನ್. ಇದು ಭಾರತೀಯ ರೂಪಾಯಿಗಳಲ್ಲಿ 93.5 ಲಕ್ಷ ಕೋಟಿ ರೂಪಾಯಿಗಳು ಆಗುತ್ತವೆ. ಈ ಮೊತ್ತವು ವಿಶ್ವದ ಬಹುತೇಕ ದೇಶಗಳ ವಾರ್ಷಿಕ ಸರ್ಕಾರದ ಬಜೆಟ್‌ಗಳಿಗಿಂತಲೂ ದೊಡ್ಡದಾಗಿದೆ ಎನ್ನಲಾಗಿದೆ, (ಏಜೆನ್ಸೀಸ್​).