ಆರ್ಥಿಕ ಕೋಟೆ ಧೂಳೀಪಟ? ಇರಾನ್‌ನ ಶಕ್ತಿ ಕೇಂದ್ರವನ್ನೇ ಟಾರ್ಗೆಟ್ ಮಾಡಿದ ಅಮೆರಿಕ-ಇಸ್ರೇಲ್ ಜಂಟಿ ದಾಳಿ! Kharg Island

ಮಂಗಳವಾರ ಮುಂಜಾನೆ ಇರಾನ್‌ನ ಪ್ರಮುಖ ತೈಲ ರಫ್ತು ಕೇಂದ್ರವಾದ ಖಾರ್ಗ್ ದ್ವೀಪದ ಮೇಲೆ ಸರಣಿ ವೈಮಾನಿಕ ದಾಳಿಗಳು ನಡೆದಿವೆ ಎಂದು ಇರಾನ್‌ನ 'ಮೆಹರ್ ನ್ಯೂಸ್' ವರದಿ ಮಾಡಿದೆ. ಪರ್ಷಿಯನ್ ಕೊಲ್ಲಿಯ ಉತ್ತರ ಭಾಗದಲ್ಲಿರುವ ಈ ದ್ವೀಪವು ಇರಾನ್‌ನ ಶೇ. 90ಕ್ಕೂ ಹೆಚ್ಚು ಕಚ್ಚಾ ತೈಲ ರಫ್ತಿಗೆ ಆಧಾರವಾಗಿದೆ.

ಖಾರ್ಗ್ ದ್ವೀಪದ ದಾಳಿಯ ಬೆನ್ನಲ್ಲೇ ಇಸ್ರೇಲ್ ಸೇನೆ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿದೆ. ಇರಾನ್‌ನಾದ್ಯಂತ ಇರುವ ಭಯೋತ್ಪಾದಕ ಆಡಳಿತದ ಹತ್ತಾರು ಮೂಲಸೌಕರ್ಯ ಕೇಂದ್ರಗಳ ಮೇಲೆ ವ್ಯಾಪಕ ದಾಳಿಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಲಾಗಿದೆ ಎಂದು ಐಡಿಎಫ್ ತಿಳಿಸಿದೆ. ಇದು ಕೇವಲ ಒಂದು ಪ್ರದೇಶಕ್ಕೆ ಸೀಮಿತವಾಗಿರದೆ, ಇಡೀ ಇರಾನ್‌ನ ಆಯಕಟ್ಟಿನ ನೆಲೆಗಳನ್ನು ಗುರಿಯಾಗಿಸಿಕೊಂಡಿದೆ ಎಂಬುದು ಸ್ಪಷ್ಟವಾಗಿದೆ.

ಕೇವಲ ತೈಲ ಕೇಂದ್ರಗಳಷ್ಟೇ ಅಲ್ಲದೆ, ಇರಾನ್‌ನ ಸಾರಿಗೆ ಮತ್ತು ಸಂವಹನ ವ್ಯವಸ್ಥೆಯನ್ನೂ ಶತ್ರು ಪಡೆಗಳು ಗುರಿಯಾಗಿಸಿಕೊಂಡಿವೆ.

ಕೋಮ್: ಇರಾನ್‌ನ ಪವಿತ್ರ ನಗರವೆನಿಸಿದ ಕೋಮ್‌ನ ಹೊರವಲಯದಲ್ಲಿರುವ ಪ್ರಮುಖ ಸೇತುವೆಯೊಂದನ್ನು ಅಮೆರಿಕ-ಇಸ್ರೇಲ್ ಕ್ಷಿಪಣಿಗಳು ಧ್ವಂಸಗೊಳಿಸಿವೆ.

ಕಾಶಾನ್: ಇಸ್ಫಹಾನ್ ಪ್ರಾಂತ್ಯದ ಕಾಶಾನ್ ನಗರದ ಯಹ್ಯಾ ಅಬಾದ್ ರೈಲ್ವೆ ಸೇತುವೆಯ ಮೇಲೆ ನಡೆದ ದಾಳಿಯಲ್ಲಿ ಇಬ್ಬರು ಮೃತಪಟ್ಟಿದ್ದು, ಮೂವರು ಗಂಭೀರವಾಗಿ ಗಾಯಗೊಂಡಿದ್ದಾರೆ.

ಈ ದಾಳಿಗಳ ಮೂಲಕ ಇರಾನ್‌ನ ಒಳನಾಡಿನ ಸೇನಾ ಚಲನವಲನಗಳನ್ನು ಮತ್ತು ಜನಸಾಮಾನ್ಯರ ಸಂಚಾರವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸುವ ಸಂಚು ರೂಪಿಸಲಾಗಿದೆ.

ಡೊನಾಲ್ಡ್ ಟ್ರಂಪ್ ಅವರು ಹೋರ್ಮುಜ್ ಜಲಸಂಧಿಯನ್ನು ಮುಕ್ತಗೊಳಿಸಲು ಮಂಗಳವಾರ ರಾತ್ರಿ 8 ಗಂಟೆಯ ಗಡುವನ್ನು ನೀಡಿದ್ದರು. ಒಂದು ವೇಳೆ ಇರಾನ್ ಮಾತು ಕೇಳದಿದ್ದರೆ, ಆ ದೇಶದ ಪ್ರತಿಯೊಂದು ಸೇತುವೆ ಮತ್ತು ವಿದ್ಯುತ್ ಸ್ಥಾವರವನ್ನು ಉರಿಯುತ್ತಿರುವ, ಸ್ಫೋಟಗೊಳ್ಳುತ್ತಿರುವ ಮತ್ತು ಎಂದಿಗೂ ಬಳಸಲಾಗದ ಸ್ಥಿತಿಗೆ ತರುವುದಾಗಿ ಟ್ರಂಪ್ ಎಚ್ಚರಿಸಿದ್ದರು. ಈಗ ನಡೆಯುತ್ತಿರುವ ದಾಳಿಗಳು ಆ ಎಚ್ಚರಿಕೆಯ ಟೀಸರ್ ಎಂಬಂತೆ ಭಾಸವಾಗುತ್ತಿವೆ.

ಖಾರ್ಗ್ ದ್ವೀಪದ ಮೇಲಿನ ದಾಳಿಯಿಂದಾಗಿ ಜಾಗತಿಕ ತೈಲ ಪೂರೈಕೆಯಲ್ಲಿ ವ್ಯತ್ಯಯವಾಗುವ ಭೀತಿ ಎದುರಾಗಿದೆ. ಇರಾನ್‌ನ ತೈಲ ರಫ್ತು ಸ್ಥಗಿತಗೊಂಡರೆ ಜಗತ್ತಿನಾದ್ಯಂತ ಪೆಟ್ರೋಲ್, ಡೀಸೆಲ್ ಬೆಲೆ ಗಗನಕ್ಕೇರುವ ಸಾಧ್ಯತೆಯಿದೆ. ಭಾರತ ಸೇರಿದಂತೆ ಹಲವು ದೇಶಗಳು ಈ ಬೆಳವಣಿಗೆಯನ್ನು ಆತಂಕದಿಂದ ಗಮನಿಸುತ್ತಿವೆ.