ಈ ಜಗತ್ತಿನಲ್ಲಿ ಮೊಟ್ಟ ಮೊದಲು ಚಿನ್ನದ ಆಭರಣ ಧರಿಸಿದವರು ಯಾರು ಗೊತ್ತಾ? ಅಧ್ಯಯನದಿಂದ ಸತ್ಯ ಬಯಲು! Gold Jewelry

Gold Jewelry : ಇಂದು ಚಿನ್ನ ಮತ್ತು ಬೆಳ್ಳಿಯ ಬೆಲೆ ಏರುತ್ತಿರುವ ವೇಗವನ್ನು ನೋಡಿದರೆ ಮುಂದೊಂದು ದಿನ ಜನ ಸಾಮಾನ್ಯರು, ವಸ್ತು ಸಂಗ್ರಹಾಲಯದಲ್ಲಿ ಕಾಣಸಿಗುವ ವಸ್ತುಗಳಂತೆ ಚಿನ್ನವನ್ನು ನೋಡಿ ಕೇವಲ ಖುಷಿಪಟ್ಟುಕೊಳ್ಳಬೇಕಾಗುತ್ತದೆ. ಅದನ್ನು ಖರೀದಿ ಮಾಡುವುದು ದೂರದ ಮಾತು ಎಂಬಂತಾಗುತ್ತದೆ.

ಹೌದು, ಕೇವಲ ಒಂದೆರೆಡು ವರ್ಷದ ಹಿಂದೆ ಪ್ರತಿ ಗ್ರಾಂಗೆ 5 ಸಾವಿರ ರೂ. ಇದ್ದ ಚಿನ್ನ, ಇಂದು 15 ಸಾವಿರ ಗಡಿ ದಾಟಿದೆ. ಅನೇಕ ಜನರು ಬ್ಯಾಂಕುಗಳಲ್ಲಿ ತಮ್ಮ ಹೂಡಿಕೆಯಾಗಿ ಚಿನ್ನವನ್ನು ಹೆಚ್ಚಾಗಿ ಬಳಸುತ್ತಿದ್ದಾರೆ. ಮಾರುಕಟ್ಟೆಯಲ್ಲಿ ಚಿನ್ನಕ್ಕೆ ಭಾರಿ ಬೇಡಿಕೆ ಸೃಷ್ಟಿಯಾಗಿದೆ. ಹೀಗಾಗಿ ಚಿನ್ನ ಇಂದು ದುಬಾರಿಯಾಗಿ, ಜನ ಸಾಮಾನ್ಯರ ಕೈನಿಂದ ದೂರ ಸರಿಯುತ್ತಿದೆ. ಇದೇ ರೀತಿ ಬೇಡಿಕೆ ಹೆಚ್ಚಾದರೆ ಚಿನ್ನದ ಬೆಲೆಯೂ ಸಹ ಹೆಚ್ಚಾಗುತ್ತದೆ.

ಅಂದಹಾಗೆ, ಪ್ರಪಂಚದ ಎಲ್ಲ ಪ್ರಮುಖ ನಾಗರಿಕತೆಗಳು ಚಿನ್ನವನ್ನು ಶಕ್ತಿ, ಸೌಂದರ್ಯ, ಶುದ್ಧತೆ ಮತ್ತು ಸಾಧನೆಯ ಸಂಕೇತವೆಂದು ಗುರುತಿಸಿವೆ ಎಂದರೆ ಅತಿಶಯೋಕ್ತಿಯಲ್ಲ. ಆದರೆ, ಈ ಜಗತ್ತಿನಲ್ಲಿ ಮೊದಲು ಚಿನ್ನವನ್ನು ಬಳಸಿದವರು ಯಾರೆಂಬುದನ್ನು ನೀವು ಎಂದಾದರೂ ಯೋಚನೆ ಮಾಡಿದ್ದೀರಾ? ಇಲ್ಲ ಎನ್ನುವುದಾದರೆ, ನಾವಿಂದು ಈ ಕುರಿತಾದ ಆಸಕ್ತಿದಾಯಕ ಮಾಹಿತಿಗಳನ್ನು ತಿಳಿದುಕೊಳ್ಳೋಣ.

ವೈದ್ಯಕೀಯ ಚಿಕಿತ್ಸೆ ಅಥವಾ ರೋಗಗಳನ್ನು ಗುಣಪಡಿಸುವ ಉದ್ದೇಶಗಳಿಗಾಗಿ ಅರಂಭದಲ್ಲಿ ಚಿನ್ನವನ್ನು ಬಳಸಲಾಗುತ್ತಿತ್ತು. ಈಜಿಪ್ಟ್ ನಾಗರಿಕತೆ ಚಿಕಿತ್ಸೆಗಾಗಿ ಚಿನ್ನವನ್ನು ಬಳಸುತ್ತಿತ್ತು ಎಂದು ಇತಿಹಾಸವು ಸೂಚಿಸುತ್ತದೆ. ಅಂದರೆ, ಅವರು ಚಿನ್ನವನ್ನು ಬಳಿಸಿದ ವಿಶ್ವದ ಮೊದಲ ಜನರು ಎಂದು ಹೇಳಲಾಗುತ್ತದೆ.

ಇದನ್ನು ಕೇಳಿದ ಮೇಲೆ ಪ್ರತಿಯೊಬ್ಬರಲ್ಲೂ ಒಂದು ಪ್ರಶ್ನೆ ಮೂಡುತ್ತದೆ. ಅದೇನೆಂದರೆ, ಮಾನವರು ಮೊದಲು ಚಿನ್ನವನ್ನು ಆಭರಣವಾಗಿ ಯಾವಾಗ ಬಳಸಿದರು ಅನ್ನೋದು. ಇದಕ್ಕೆ ಪೂರ್ವ ಯುರೋಪಿನ ವರ್ಣ ಹೆಸರಿನ ನಗರದಲ್ಲಿ ಪತ್ತೆಯಾದ ಅಪರೂಪದ ನಿಧಿಯಿಂದ ಉತ್ತರ ಸಿಕ್ಕಿದೆ.

ವಿಶ್ವದ ಅತ್ಯಂತ ಹಳೆಯ ಚಿನ್ನದ ಆಭರಣವೆಂದರೆ 1972 ಮತ್ತು 1991 ರ ನಡುವೆ ಬಲ್ಗೇರಿಯಾದ ಕಪ್ಪು ಸಮುದ್ರದ ಕರಾವಳಿಯಲ್ಲಿರುವ ವರ್ಣ ನಗರದಲ್ಲಿ ಪತ್ತೆಯಾದ ಸಮಾಧಿಯಲ್ಲಿ ಸಿಕ್ಕ ಆಭರಣಗಳು. ಇದು ವಿಶ್ವದ ಅತ್ಯಂತ ಹಳೆಯ ಚಿನ್ನದ ಆಭರಣಗಳನ್ನು ಹೊಂದಿದೆ ಎಂದು ತಿಳಿದುಬಂದಿದೆ.

ಅಲ್ಲಿ ಕಂಡುಬಂದ ಆಭರಣಗಳು 6,000 ವರ್ಷಗಳಿಗೂ ಹಳೆಯವು. ಆ ಕಾಲದ ಜನರು ಚಿನ್ನವನ್ನು ಕರಗಿಸಿ ರೂಪಿಸುವ ತಂತ್ರವನ್ನು ತಿಳಿದಿದ್ದರು ಎಂಬುದು ಸಂಶೋಧಕರನ್ನು ಆಶ್ಚರ್ಯಗೊಳಿಸಿತು ಮತ್ತು ಸಮಾಧಿಯಲ್ಲಿ ಹೆಚ್ಚಿನ ಪ್ರಮಾಣದ ಚಿನ್ನವಿರುವುದರಿಂದ, ಅದು ಉನ್ನತ ಹುದ್ದೆಯಲ್ಲಿರುವ ವ್ಯಕ್ತಿಯ ಸಮಾಧಿಯಾಗಿರಬಹುದು ಎಂದು ಊಹಿಸಲಾಗಿದೆ.

ಈ ಆವಿಷ್ಕಾರವು 6,000 ವರ್ಷಗಳ ಹಿಂದೆ ಮಾನವರು ಚಿನ್ನವನ್ನು ಅಲಂಕಾರ ಮತ್ತು ಶಕ್ತಿಯ ಸಂಕೇತವಾಗಿ ಬಳಸುತ್ತಿದ್ದರು ಮತ್ತು ಪ್ರಾಚೀನ ಸಮಾಜಗಳಲ್ಲಿಯೂ ಸಹ ಅಸಮಾನತೆ ಇತ್ತು ಎಂಬುದನ್ನು ಸೂಚಿಸುತ್ತದೆ. ಸಂಪತ್ತು ಮತ್ತು ಅಧಿಕಾರವು ಕೆಲವರ ಕೈಯಲ್ಲಿ ಕೇಂದ್ರೀಕೃತವಾಗಿತ್ತು ಎಂಬುದನ್ನು ಈ ಸಮಾಧಿಗಳು ಮತ್ತೊಮ್ಮೆ ಜಗತ್ತಿಗೆ ಪ್ರದರ್ಶಿಸಿವೆ, (ಏಜೆನ್ಸೀಸ್​).