ಹೊರ್ಮುಜ್​ನಲ್ಲಿ ಡೆತ್ ವಾರಂಟ್ ಜಾರಿ! ಇರಾನ್ ನೌಕೆಗಳನ್ನು ಕಂಡ ಕೂಡಲೇ ಹೊಡೆದುರುಳಿಸಲು ಟ್ರಂಪ್ ಆರ್ಡರ್! Donald Trump

ಈ ಬಗ್ಗೆ ತಮ್ಮ 'ಟ್ರೂತ್ ಸೋಶಿಯಲ್' ಖಾತೆಯಲ್ಲಿ ಪೋಸ್ಟ್​ ಮಾಡಿರುವ ಟ್ರಂಪ್, ಅಮೆರಿಕದ ನೌಕಾಪಡೆಗೆ ಯಾವುದೇ ಮುಲಾಜಿಲ್ಲದೆ ಕಠಿಣ ಕ್ರಮ ಕೈಗೊಳ್ಳಲು ಸೂಚಿಸಿದ್ದಾರೆ.

ಇರಾನ್‌ನ ನೌಕಾಪಡೆಯ ಸಣ್ಣ ಬೋಟ್‌ಗಳು ಹೊರ್ಮುಜ್ ಜಲಸಂಧಿಯಲ್ಲಿ ಅಕ್ರಮವಾಗಿ ಮೈನ್‌ಗಳನ್ನು ಅಳವಡಿಸುತ್ತಿರುವ ವರದಿಗಳ ಬೆನ್ನಲ್ಲೇ ಟ್ರಂಪ್ ಈ ಕ್ರಮಕ್ಕೆ ಮುಂದಾಗಿದ್ದಾರೆ. ನಮ್ಮ ನೌಕಾಪಡೆಗೆ ನಾನು ಆದೇಶ ನೀಡಿದ್ದೇನೆ. ಜಲಸಂಧಿಯಲ್ಲಿ ಮೈನ್ ಅಳವಡಿಸುವ ಇರಾನ್‌ನ ಯಾವುದೇ ನೌಕೆಗಳನ್ನು ಕಂಡ ಕೂಡಲೇ ಹೊಡೆದುರುಳಿಸಿ. ಅಲ್ಲಿ ಯಾವುದೇ ಹಿಂಜರಿಕೆ ಇರಬಾರದು. ಈಗಾಗಲೇ ಇರಾನ್‌ನ ಬಹುತೇಕ ನೌಕೆಗಳು ಸಮುದ್ರದ ತಳ ಸೇರಿವೆ ಎಂದು ಟ್ರಂಪ್ ಗುಡುಗಿದ್ದಾರೆ.

ಒಂದೆಡೆ ಯುದ್ಧದ ಭೀತಿ ಇದ್ದರೆ, ಮತ್ತೊಂದೆಡೆ ರಾಜತಾಂತ್ರಿಕ ಪ್ರಯತ್ನಗಳು ನಡೆಯುತ್ತಿವೆ. ಇರಾನ್ ನಾಯಕತ್ವಕ್ಕೆ ಮಾತುಕತೆಗೆ ಸಿದ್ಧತೆ ನಡೆಸಲು ಕಾಲಾವಕಾಶ ನೀಡುವಂತೆ ಪಾಕಿಸ್ತಾನ ಮಾಡಿದ್ದ ಮನವಿಯನ್ನು ಪುರಸ್ಕರಿಸಿದ ಟ್ರಂಪ್, ಇರಾನ್ ವಿರುದ್ಧದ ಕದನ ವಿರಾಮವನ್ನು ಅನಿರ್ದಿಷ್ಟಾವಧಿಗೆ ವಿಸ್ತರಿಸಿದ್ದಾರೆ.

ಆದರೆ, ಈ ಕದನ ವಿರಾಮದ ನಡುವೆಯೇ ಬುಧವಾರ ಇರಾನ್ ಪಡೆಗಳು ಮೂರು ಹಡಗುಗಳ ಮೇಲೆ ಗುಂಡಿನ ದಾಳಿ ನಡೆಸಿ, ಎರಡು ಹಡಗುಗಳನ್ನು ವಶಪಡಿಸಿಕೊಂಡಿರುವುದು ಅಮೆರಿಕವನ್ನು ಕೆರಳಿಸಿದೆ. ಇರಾನ್‌ನ ತಸ್ನಿಮ್ ಸುದ್ದಿ ಸಂಸ್ಥೆಯ ಪ್ರಕಾರ, ಇರಾನ್ ಅಧಿಕೃತವಾಗಿ ಯಾವುದೇ ಕದನ ವಿರಾಮ ವಿಸ್ತರಣೆಗೆ ಒಪ್ಪಿಗೆ ಸೂಚಿಸಿಲ್ಲ ಎಂಬುದು ಮತ್ತೊಂದು ಗೊಂದಲಕ್ಕೆ ಕಾರಣವಾಗಿದೆ.

ನ್ಯೂಯಾರ್ಕ್ ಪೋಸ್ಟ್ ವರದಿಯ ಪ್ರಕಾರ, ಅಮೆರಿಕ ಮತ್ತು ಇರಾನ್ ನಡುವಿನ ಎರಡನೇ ಸುತ್ತಿನ ಮಾತುಕತೆಗಳು ಶುಕ್ರವಾರವೇ ನಡೆಯುವ ಸಾಧ್ಯತೆಯಿದೆ. ಮುಂದಿನ 36 ರಿಂದ 72 ಗಂಟೆಗಳ ಒಳಗೆ ಈ ಪ್ರಕ್ರಿಯೆ ಆರಂಭವಾಗಬಹುದು ಎಂದು ಟ್ರಂಪ್ ಸುಳಿವು ನೀಡಿದ್ದಾರೆ. ಪಾಕಿಸ್ತಾನದ ಇಸ್ಲಾಮಾಬಾದ್‌ನಲ್ಲಿ ಈ ಮಾತುಕತೆ ನಡೆಯಬೇಕಿದ್ದು, ಅಮೆರಿಕದ ಪರವಾಗಿ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಅವರು ನಿಯೋಗವನ್ನು ಮುನ್ನಡೆಸಬೇಕಿದೆ.

ಆದರೆ, ಇರಾನ್ ವಿದೇಶಾಂಗ ಸಚಿವಾಲಯದ ವಕ್ತಾರ ಎಸ್ಮಾಯಿಲ್ ಬಕಾಯಿ, ಈ ಬಗ್ಗೆ ಅನಿಶ್ಚಿತತೆ ವ್ಯಕ್ತಪಡಿಸಿದ್ದಾರೆ. ಇಸ್ಲಾಮಾಬಾದ್‌ಗೆ ಹೋಗುವುದು ನಮ್ಮ ರಾಷ್ಟ್ರೀಯ ಹಿತಾಸಕ್ತಿಗೆ ಪೂರಕವಾಗಿದ್ದರೆ ಮಾತ್ರ ನಾವು ಹೋಗುತ್ತೇವೆ. ಸದ್ಯಕ್ಕೆ ನಾವು ಯಾವುದೇ ನಿರ್ಧಾರ ಕೈಗೊಂಡಿಲ್ಲ ಎಂದು ಬಿಬಿಸಿಗೆ ತಿಳಿಸಿದ್ದಾರೆ. ಅಮೆರಿಕಕ್ಕೆ ಮಾತುಕತೆಯಲ್ಲಿ ಪ್ರಾಮಾಣಿಕತೆ ಇಲ್ಲ ಎಂದು ಇರಾನ್ ದೂರುತ್ತಿದೆ.

ಫೆಬ್ರವರಿ 28 ರಂದು ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ವೈಮಾನಿಕ ದಾಳಿಗಳೊಂದಿಗೆ ಆರಂಭವಾದ ಈ ಇರಾನ್ ಯುದ್ಧವು ಈಗ ನಿರ್ಣಾಯಕ ಹಂತಕ್ಕೆ ಬಂದಿದೆ. ಏಪ್ರಿಲ್ 11 ಮತ್ತು 12 ರಂದು ನಡೆದ ಮೊದಲ ಸುತ್ತಿನ ಮಾತುಕತೆಗಳು ವಿಫಲವಾಗಿದ್ದವು. ಈಗ ಹಾರ್ಮುಜ್ ಜಲಸಂಧಿಯನ್ನು ಮುಚ್ಚಲು ಇರಾನ್ ಪ್ರಯತ್ನಿಸಿದರೆ, ಅದು ಜಾಗತಿಕ ತೈಲ ಮಾರುಕಟ್ಟೆಯ ಮೇಲೆ ಭೀಕರ ಪರಿಣಾಮ ಬೀರಲಿದೆ.

ಒಂದೆಡೆ ಮಾತುಕತೆಯ ಆಹ್ವಾನ, ಮತ್ತೊಂದೆಡೆ 'ಶೂಟ್ ಅಂಡ್ ಕಿಲ್' ಆದೇಶವು ಟ್ರಂಪ್ ಅವರ ಈ ದ್ವಿಮುಖ ನೀತಿಯು ಇರಾನ್ ಮೇಲೆ ಒತ್ತಡ ಹೇರುವ ತಂತ್ರವೇ ಅಥವಾ ಪೂರ್ಣ ಪ್ರಮಾಣದ ಯುದ್ಧಕ್ಕೆ ನಾಂದಿಯೇ ಎಂಬುದು ಇಡೀ ಜಗತ್ತನ್ನು ಆತಂಕಕ್ಕೆ ತಳ್ಳಿದೆ,(ಏಜೆನ್ಸೀಸ್).