ಬೆಂಗಳೂರು ಯೂನಿವರ್ಸಿಟಿ ಪದವೀಧರ ಈಗ ಆ್ಯಪಲ್​ AI ವಿಭಾಗದ ಉಪಾಧ್ಯಕ್ಷ: ಯಾರು ಈ ಅಮರ್ ಸುಬ್ರಮಣ್ಯ? Amar Subramanya

ಬೆಂಗಳೂರು: ಆ್ಯಪಲ್ ( Apple ) ಮೆಷಿನ್ ಲರ್ನಿಂಗ್ ಮತ್ತು AI ಸ್ಟ್ರಾಟಜಿಯ ಹಿರಿಯ ಉಪಾಧ್ಯಕ್ಷ ಸ್ಥಾನದಿಂದ ಜಾನ್ ಗಿಯಾನಾಂಡ್ರಿಯಾ ಕೆಳಗಿಳಿಯುತ್ತಿದ್ದಾರೆ ಎಂದು ಘೋಷಣೆಯಾದಾಗ ತಂತ್ರಜ್ಞಾನ ಜಗತ್ತು ಒಂದು ಕ್ಷಣ ಮೌನಕ್ಕೆ ಜಾರಿತು. ಏಕೆಂದರೆ, ಹಲವು ವರ್ಷಗಳಿಂದ ಆ್ಯಪಲ್‌ನ AI ಅನ್ನು ರೂಪಿಸುತ್ತಿರುವ ಗಿಯಾನಾಂಡ್ರಿಯಾ, ತಂತ್ರಜ್ಞಾನ ಜಗತ್ತಿನಲ್ಲೇ ತನ್ನದೇಯಾದ ಛಾಪನ್ನು ಮೂಡಿಸಿರುವಂತಹ ವ್ಯಕ್ತಿ.

ಗಿಯಾನಾಂಡ್ರಿಯಾ ಕೆಳಗಿಳಿದರೆ ಅವರ ಸ್ಥಾನವನ್ನು ಯಾರು ತುಂಬಬಲ್ಲರು ಎಂಬ ಲೆಕ್ಕಾಚಾರದ ನಡುವೆ ಗೂಗಲ್ ಮತ್ತು ಮೈಕ್ರೋಸಾಫ್ಟ್‌ನಲ್ಲಿ ಅದ್ಭುತ ಟ್ರ್ಯಾಕ್ ರೆಕಾರ್ಡ್ ಹೊಂದಿರುವ ಭಾರತೀಯ ಮೂಲದ AI ತಜ್ಞ ಅಮರ್ ಸುಬ್ರಹ್ಮಣ್ಯ ಹೆಸರು ಕೇಳಿಬಂದಿದೆ. ಹೌದು, ಆಪಲ್‌ನ AI ವಿಭಾಗದ ಉಪಾಧ್ಯಕ್ಷರಾಗಿ ಸುಬ್ರಮಣ್ಯ ಅವರು ನೇಮಕವಾಗಿದ್ದಾರೆ.

ಅಮರ್ ಅವರು ಬೆಂಗಳೂರು ವಿಶ್ವವಿದ್ಯಾಲಯದಲ್ಲಿ 1997 ಮತ್ತು 2001ರ ನಡುವೆ ಎಲೆಕ್ಟ್ರಿಕಲ್, ಎಲೆಕ್ಟ್ರಾನಿಕ್ಸ್ ಮತ್ತು ಸಂವಹನಗಳಲ್ಲಿ ತಮ್ಮ ಬ್ಯಾಚುಲರ್ ಆಫ್ ಎಂಜಿನಿಯರಿಂಗ್​ನ್ನು ಪೂರ್ಣಗೊಳಿಸಿದರು.

ಬೆಂಗಳೂರಿನಲ್ಲಿ ಪದವಿ ಪಡೆದ ನಂತರ, ಕಂಪ್ಯೂಟರ್ ಸೈನ್ಸ್‌ನಲ್ಲಿ ಪಿಎಚ್‌ಡಿ ಪಡೆಯಲು ವಾಷಿಂಗ್ಟನ್ ವಿಶ್ವವಿದ್ಯಾಲಯಕ್ಕೆ ತೆರಳಿದ ಅಮರ್, AIಗೆ ತರಬೇತಿ ನೀಡುವ ಒಂದು ವಿಧಾನದ ಬಗ್ಗೆ ಅಧ್ಯಯನ ನಡೆಸಿದರು. ಇದರ ಜತೆಗೆ ಶ್ರವ್ಯ-ದೃಶ್ಯ ಮಾದರಿಗಳನ್ನು ಸಹ ಪ್ರಯೋಗಿಸಿ, ಮಲ್ಟಿಮೋಡಲ್ AI ನ ಆರಂಭಿಕ ರೂಪಗಳನ್ನು ಅನ್ವೇಷಿಸಿದರು. ಅಮರ್​ನ ಈ ಅಧ್ಯಯನವು 2007ರಲ್ಲಿ ಪ್ರತಿಷ್ಠಿತ ಮೈಕ್ರೋಸಾಫ್ಟ್ ರಿಸರ್ಚ್ ಗ್ರಾಜುಯೇಟ್ ಫೆಲೋಶಿಪ್​ ಅನ್ನು ಮತ್ತು 2009ರಲ್ಲಿ ತಮ್ಮ ಪಿಎಚ್‌ಡಿ ಮುಗಿಸುವ ಹೊತ್ತಿಗೆ, ಸಂಕೀರ್ಣ ಸಿದ್ಧಾಂತವನ್ನೂ ಪ್ರಾಯೋಗಿಕ ಪರಿಹಾರಗಳಾಗಿ ಪರಿವರ್ತಿಸಬಲ್ಲ ಸಂಶೋಧಕರಾಗಿ ಖ್ಯಾತಿ ಗಳಿಸಿದ್ದರು.

ತಂತ್ರಜ್ಞಾನ ವಲಯದಲ್ಲಿ ದೊಡ್ಡ ಹೆಸರನ್ನು ಗಳಿಸುವ ಮೊದಲು, ಅಮರ್ ಅವರು ಐಬಿಎಂನಲ್ಲಿ ಸಾಫ್ಟ್‌ವೇರ್ ಎಂಜಿನಿಯರ್​ ಆಗಿ ಕೆಲಸಕ್ಕೆ ಸೇರಿಕೊಂಡರು. ಕೆಲ ಸಮಯದ ನಂತರ ಮೈಕ್ರೋಸಾಫ್ಟ್​ನಲ್ಲಿ ಮೊದಲು ಇಂಟರ್ನ್ ಆಗಿ ನಂತರ ಸಂದರ್ಶಕ ಸಂಶೋಧಕರಾಗಿ ಆಡಿಯೋ-ವಿಶುವಲ್ ಮಾದರಿಗಳು ಮತ್ತು ಮೂಲಭೂತ ಯಂತ್ರ ಕಲಿಕೆಯ ಪರಿಕಲ್ಪನೆಗಳನ್ನು ಅನ್ವೇಷಿಸಿದರು.

2009ರಲ್ಲಿ ಅಮರ್ ಅವರು ಗೂಗಲ್‌ಗೆ ಸೇರಿದರು ಮತ್ತು ಅಲ್ಲಿ ಅವರ ವೃತ್ತಿಜೀವನವು ಉತ್ತುಂಗಕ್ಕೇರಿತು. ಮುಂದಿನ 16 ವರ್ಷಗಳಲ್ಲಿ, ಅವರು ಸ್ಟಾಫ್ ರಿಸರ್ಚ್ ಸೈಂಟಿಸ್ಟ್‌ನಿಂದ ಎಂಜಿನಿಯರಿಂಗ್ ಉಪಾಧ್ಯಕ್ಷ ಸ್ಥಾನಕ್ಕೆ ಏರಿದರು. ಈ ಹಿಂದೆ ಗೂಗಲ್‌ನ ಜೆಮಿನಿ ಅಸಿಸ್ಟೆಂಟ್‌ ತಂಡವನ್ನು ಮುನ್ನಡೆಸಿದ್ದು ಇದೇ ಅಮರ್! ಜನರು ಪ್ರತಿದಿನ ಬಳಸಬಹುದಾದ ಉತ್ಪನ್ನಗಳ ಭಾಷಾಂತರಿಸುವಲ್ಲಿ ಅಮರ್​ ಕೆಲಸ ಮಾಡಿದರು.

ಜುಲೈ 2025ರಲ್ಲಿ, ಅಮರ್ ಮೈಕ್ರೋಸಾಫ್ಟ್‌ನಲ್ಲಿ AI ನ ಕಾರ್ಪೊರೇಟ್ ಉಪಾಧ್ಯಕ್ಷರ ಪಾತ್ರವನ್ನು ವಹಿಸಿಕೊಂಡರು. ಮೈಕ್ರೋಸಾಫ್ಟ್ ಕೋಪಿಲಟ್‌ನಂತಹ ಉತ್ಪನ್ನಗಳಲ್ಲಿ ಫೌಂಡೇಶನ್ ಮಾದರಿಗಳು ಮತ್ತು AI ಏಕೀಕರಣದ ಮೇಲೆ ಕೇಂದ್ರೀಕರಿಸಿದರು. ಅವರು ಆರು ತಿಂಗಳಿಗಿಂತ ಕಡಿಮೆ ಕಾಲ ಅಲ್ಲಿದ್ದರೂ ಸಹ, ತಂಡಗಳನ್ನು ಮುನ್ನಡೆಸುವ ಮತ್ತು ಉನ್ನತ ಮಟ್ಟದಲ್ಲಿ AI ಕಾರ್ಯತಂತ್ರವನ್ನು ರೂಪಿಸುವ ಸಾಮರ್ಥ್ಯವಿರುವ ತಂತ್ರಜ್ಞರಾಗಿ ಖ್ಯಾತಿಯನ್ನು ಗಳಿಸಿದರು.

ಈಗ ಸುಬ್ರಮಣ್ಯ ಆ್ಯಪಲ್ ಸೇರಿದ್ದಾರೆ. ಗಿಯಾನಾಂಡ್ರಿಯಾ ಹಿಂದೆ ಸರಿಯುತ್ತಿದ್ದಂತೆ ಸುಬ್ರಹ್ಮಣ್ಯ ಅದರತ್ತ ಹೆಜ್ಜೆ ಹಾಕಿದ್ದಾರೆ. ಕಂಪನಿಯ ಕೆಲವು ನಿರ್ಣಾಯಕ AI ಯೋಜನೆಗಳ ಮೇಲೆ ಹಿಡಿತ ಸಾಧಿಸಲಿದ್ದು, ಆ್ಯಪಲ್‌ನ ಅಧಿಕೃತ ಪ್ರಕಟಣೆಯ ಪ್ರಕಾರ, ಅಮರ್ ಆ್ಯಪಲ್ ಫೌಂಡೇಶನ್ ಮಾದರಿಗಳು, ML ಸಂಶೋಧನೆ ಮತ್ತು AI ಸುರಕ್ಷತೆ ಮತ್ತು ಮೌಲ್ಯಮಾಪನದ ಮೇಲೆ ತಮ್ಮ ಗಮನವನ್ನು ಕೇಂದ್ರೀಕರಿಸಲಿದ್ದಾರೆ, (ಏಜೆನ್ಸೀಸ್​).