ಡೈನೋಸಾರ್‌ಗಳಿಗೂ ಮುನ್ನ ಭೂಮಿಗೆ ಅಪ್ಪಳಿಸಿತ್ತು ದೈತ್ಯ ಉಲ್ಕೆ! 300 ಕೋಟಿ ವರ್ಷದ ಪುರಾತನ ಕುಳಿ ಪತ್ತೆ

ಕರ್ಟಿನ್ ವಿಶ್ವವಿದ್ಯಾಲಯದ ಭೂ ಮತ್ತು ಗ್ರಹ ವಿಜ್ಞಾನ ವಿಭಾಗದ ಸಂಶೋಧಕರು ಹಾಗೂ ವೆಸ್ಟರ್ನ್ ಆಸ್ಟ್ರೇಲಿಯಾ ಭೂವೈಜ್ಞಾನಿಕ ಸಮೀಕ್ಷೆ (GSWA) ತಂಡ ಜಂಟಿಯಾಗಿ ಈ ಅಧ್ಯಯನ ನಡೆಸಿದೆ. ಸಂಶೋಧನಾ ತಂಡವು ಜಿರ್ಕಾನ್ (Zircon) ಮತ್ತು ಅಪಟೈಟ್ (Apatite) ಎಂಬ ಎರಡು ಖನಿಜಗಳನ್ನು ಪರೀಕ್ಷಿಸಿ, ಉಲ್ಕೆ ಅಪ್ಪಳಿಸಿದ ಸಮಯ ಸುಮಾರು 300 ಕೋಟಿ ವರ್ಷಗಳ ಹಿಂದೆ ಎಂಬುದನ್ನು ದೃಢಪಡಿಸಿದೆ. ಸಂಶೋಧನಾ ತಂಡದ ಮುಖ್ಯಸ್ಥ ಪ್ರೊ. ಕ್ರಿಸ್ ಕಿರ್ಕ್‌ಲ್ಯಾಂಡ್ ಅವರ ಪ್ರಕಾರ, ಈ ಸ್ಥಳವು ಉಲ್ಕೆ ಅಪ್ಪಳಿಸಿದ ಪ್ರದೇಶ ಎಂಬುದು ಹಿಂದೆ ಗೊತ್ತಿದ್ದರೂ ಅದರ ನಿಖರ ವಯಸ್ಸು ಇದುವರೆಗೆ ತಿಳಿದಿರಲಿಲ್ಲ.

ಜಿರ್ಕಾನ್ ಖನಿಜಗಳು ಕೋಟ್ಯಂತರ ವರ್ಷಗಳ ಕಾಲ ತಮ್ಮ ರಚನೆಯನ್ನು ಉಳಿಸಿಕೊಳ್ಳುವ ಸಾಮರ್ಥ್ಯ ಹೊಂದಿವೆ. ಉಲ್ಕೆ ಅಪ್ಪಳಿಸಿದಾಗ ಉಂಟಾದ ತೀವ್ರ ಶಾಖದಿಂದ ಕೆಲವು ಜಿರ್ಕಾನ್ ಖನಿಜಗಳ ರೂಪ ಬದಲಾಗಿದ್ದು, ಅವುಗಳಲ್ಲಿ ಆ ಘಟನೆಯ ಕಾಲದ ಗುರುತು ಉಳಿದಿದೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ. ಇದರ ಜೊತೆಗೆ, ಉಲ್ಕೆಯ ಅಪ್ಪಳಿಕೆಯಿಂದ ಹಾನಿಗೊಳಗಾದ ಬಂಡೆಗಳ ಮೂಲಕ ಹರಿದ ಬಿಸಿ ದ್ರವಗಳಿಂದ ರೂಪುಗೊಂಡ ಅಪಟೈಟ್ ಖನಿಜಗಳನ್ನೂ ಪರೀಕ್ಷಿಸಲಾಯಿತು. ಈ ಎರಡೂ ಪರೀಕ್ಷೆಗಳಲ್ಲಿ ಒಂದೇ ಕಾಲಾವಧಿ ಪತ್ತೆಯಾಗಿರುವುದರಿಂದ ಸಂಶೋಧನೆಗೆ ಮತ್ತಷ್ಟು ಬಲ ಸಿಕ್ಕಿದೆ ಎಂದು ಪ್ರೊ. ಕಿರ್ಕ್‌ಲ್ಯಾಂಡ್ ಹೇಳಿದ್ದಾರೆ.

ಈ ಅಧ್ಯಯನದ ಪ್ರಕಾರ, ನಾರ್ತ್ ಪೋಲ್ ಡೋಮ್ ಭೂಮಿಯಲ್ಲೇ ಇದುವರೆಗೆ ಪತ್ತೆಯಾಗಿರುವ ಅತ್ಯಂತ ಹಳೆಯ ಉಲ್ಕೆ ಅಪ್ಪಳಿಸಿದ ಕುಳಿಯಾಗಿದೆ. ಅಲ್ಲದೆ, ಭೂಮಿಯ ಆರಂಭಿಕ ಯುಗವಾದ ಆರ್ಕಿಯನ್ (Archean) ಕಾಲಕ್ಕೆ ಸೇರಿದ ಏಕೈಕ ಗುರುತಿಸಲ್ಪಟ್ಟ ಉಲ್ಕೆ ಕುಳಿಯಾಗಿದೆ.ಈ ಬೃಹತ್ ಉಲ್ಕೆ ಅಪ್ಪಳಿಕೆಗಳು ಭೂಮಿಯ ಆರಂಭಿಕ ಖಂಡಗಳ ನಿರ್ಮಾಣ ಹಾಗೂ ಮೇಲ್ಮೈ ರೂಪುಗೊಳ್ಳುವಿಕೆಯಲ್ಲಿ ಪ್ರಮುಖ ಪಾತ್ರ ವಹಿಸಿರಬಹುದು ಎಂದು ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ.

ಕೋಟ್ಯಂತರ ವರ್ಷಗಳ ಕಾಲ ಶಾಖ, ಒತ್ತಡ ಮತ್ತು ಭೂಗರ್ಭದ ಬದಲಾವಣೆಗಳಿಂದ ಇಂತಹ ಕುಳಿಗಳ ವಯಸ್ಸು ಪತ್ತೆಹಚ್ಚುವುದು ಅತ್ಯಂತ ಕಷ್ಟಕರ. ಆದರೆ ಈ ಸಂಶೋಧನೆಯಿಂದ ಉಲ್ಕೆ ಅಪ್ಪಳಿಸಿದ ನಿಖರ ಸಮಯವನ್ನು ಗುರುತಿಸಲು ಸಾಧ್ಯವಾಗಿದೆ ಎಂದು ತಂಡ ತಿಳಿಸಿದೆ.

ಜಿಎಸ್‌ಡಬ್ಲ್ಯುಎ ಭೂವಿಜ್ಞಾನ ನಿರ್ದೇಶಕ ಡಾ. ಸೈಮನ್ ಜಾನ್ಸನ್, ಈ ಸಂಶೋಧನೆ ಭೂಮಿಯ ಆರಂಭಿಕ ಇತಿಹಾಸದ ಬಗ್ಗೆ ಹೊಸ ಮಾಹಿತಿ ನೀಡುವ ಅಪರೂಪದ ಸಾಧನೆಯಾಗಿದೆ ಎಂದು ಹೇಳಿದ್ದಾರೆ. "How old is the North Pole Dome impact, Western Australia?" ಎಂಬ ಶೀರ್ಷಿಕೆಯ ಅಧ್ಯಯನವು Geology ವಿಜ್ಞಾನ ಪತ್ರಿಕೆಯಲ್ಲಿ ಪ್ರಕಟವಾಗಿದೆ,(ಏಜೆನ್ಸೀಸ್​​).