ಈಶಾನ್ಯ ದೆಹಲಿ ಹಿಂಸಾಚಾರಕ್ಕೆ ಬಲಿಯಾದ ಗುಪ್ತಚರ ದಳದ ಅಧಿಕಾರಿ; ಇಂದು ಮೋರಿಯಲ್ಲಿ ಸಿಕ್ತು ಅವರ ಮೃತದೇಹ

ನವದೆಹಲಿ: ಕಳೆದ ಮೂರುದಿನಗಳಿಂದ ಈಶಾನ್ಯ ದೆಹಲಿಯಲ್ಲಿ ಸಿಎಎ ಪರ-ವಿರೋಧಿ ಬಣಗಳ ಪ್ರತಿಭಟನೆ ನಡೆಯುತ್ತಿದೆ.

ಪರಿಸ್ಥಿತಿ ನಿಯಂತ್ರಿಸಲು ಬಂದ ಪೊಲೀಸರು, ರಕ್ಷಣಾ ಸಿಬ್ಬಂದಿ ಮೇಲೆ ಉದ್ರಿಕ್ತರ ಗುಂಪು ದಾಳಿ ಮಾಡುತ್ತಿದೆ. ಕಲ್ಲು ತೂರಾಟ, ಆ್ಯಸಿಡ್​ ದಾಳಿ ಮಾಡುತ್ತಿದೆ.

ಈ ಗಲಭೆಯಲ್ಲಿ ಪೊಲೀಸ್ ಪೇದೆಯೊಬ್ಬ ಮೃತಪಟ್ಟಿದ್ದು ವರದಿಯಾಗಿದೆ. ನಿನ್ನೆ ಪ್ಯಾರಾಮಿಲಿಟರಿ ಸೈನಿಕನೋರ್ವನ ಮೇಲೆ ಆ್ಯಸಿಡ್​ ದಾಳಿಯಾಗಿತ್ತು. ಇಂದು ಬೆಳಗ್ಗೆ ಗುಪ್ತಚರ ಇಲಾಖೆ ಅಧಿಕಾರಿಯೋರ್ವನ ಮೃತದೇಹ ಮೋರಿಯಲ್ಲಿ ಪತ್ತೆಯಾಗಿದೆ.

ಈ ಮೃತ ಅಧಿಕಾರಿಯನ್ನು ಅಂಕಿತ್​ ಶರ್ಮಾ ಎಂದು ಗುರುತಿಸಲಾಗಿದೆ. ಅಂಕಿತ್​ ಶರ್ಮಾ ಮಂಗಳವಾರ ಸಂಜೆ ಮನೆಗೆ ಹೋಗುತ್ತಿದ್ದಾಗ, ಚಾಂದ್​ ಬಾಘ್​ ಸೇತುವೆ ಮೇಲೆ ಅವರ ಮೇಲೆ ಪ್ರತಿಭಟನಾಕಾರರ ಗುಂಪು ಹಲ್ಲೆ ಮಾಡಿದೆ. ಈ ವೇಳೆ ಮೃತಪಟ್ಟ ಅವರನ್ನು ಮೋರಿಯೊಳಗೆ ಎಸೆದು ಹೋಗಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಮಂಗಳವಾರದಿಂದಲೂ ಕಾಣೆಯಾಗಿದ್ದ ಅಂಕಿತ್​ ಶರ್ಮಾರನ್ನು ಮನೆಯವರು ಹುಡುಕುತ್ತಿದ್ದರು. ಇಂದು ಮೃತದೇಹ ಸಿಕ್ಕಬಳಿಕ ಮಾತನಾಡಿದ ಅಂಕಿತ್​ ಅವರ ತಂದೆ ರವೀಂದ್ರ ಶರ್ಮಾ, ತಮ್ಮ ಮಗನ ಮೇಲೆ ಹಲ್ಲೆ ನಡೆಸಿದವರು ಆಮ್​ ಆದ್ಮಿ ಪಾರ್ಟಿ ಬೆಂಬಲಿಗರು ಎಂದು ಆರೋಪಿಸಿದ್ದಾರೆ.